ठूला दलको प्रतिनिधिसभाको समानुपातिक मत घण्टीमा, प्रदेशको हलोमा ट्रान्सफर

A+ A A-

प्रमुख दलहरूले प्रदेशको समानुपातिकतर्फ बढी मत पाए पनि प्रतिनिधिसभाको समानुपातिकतर्फ कम मत पाएका छन् । मत गणना जारी रहँदा एमालेले ७ प्रदेशमा २९ लाख ३६ हजार मत पाउँदा प्रतिनिधिसभाको समानुपातिकतर्फ २७ लाख ७३ हजार ९९९ मत ल्याएको छ । प्रदेशमा भन्दा संघमा १ लाख ६२ हजार मत कम पाएको छ ।

समानुपातिकतर्फ दोस्रो स्थानमा रहेको कांग्रेसले २५ लाख ८० हजार मत ल्याउदा संघमा २६ लाख ४४ हजार ल्याएको छ । कांग्रेसले भने संघमा भन्दा प्रदेशमा कम पाएको छ । संघमा भन्दा प्रदेशमा कांग्रेसले ६३ हजार मत कम पाएको छ । माओवादीले प्रदेशमा १२ लाख ३ हजार ल्याउँदा संघमा ११ लाख ६१ हजार मत ल्याएको छ । प्रदेशमा भन्दा संघमा ४२ हजार कम मत पाएको छ ।

एकीकृत समाजवादीले प्रतिनिधिसभामा थ्रेसहोल्ड कटाउन सकेको छैन । ३ प्रतिशत पुर्‍याउन संघर्ष गरिरहेको छ । उसले प्रतिनिधिसभाको समानुपातिकमा २ लाख ९४ हजार ल्याउँदा प्रदेशमा ३ लाख ६९ हजार मत पाएको छ । प्रदेशमा पाएको मत नेकपा एसले प्रतिनिधिसभाको सामानुपातिकमा गएको भए सहजै राष्ट्रिय दल बन्ने थियो ।

राष्ट्रिय प्रजातन्त्र पार्टीले भने प्रतिनिधिसभाको समानुपातिकमा भन्दा प्रदेशतर्फ बढी मत ल्याएको छ । प्रदेशमा ७ लाख ९० हजार मत ल्याउँदा प्रतिनिधिसभाको समानुपातिकमा ५ लाख ८५ हजार पाएको छ ।

यो पनि : समानुपातिकमा एमालेले ६ र कांग्रेसले ७ प्रतिशत मत गुमाए, गुमाएको मत घण्टी र हलोलाई

प्रदेशको तुलनामा प्रतिनिधिसभाको समानुपातिकमा २ लाख कम मत राप्रपाले पाएको छ । जसपाले पनि प्रतिनिधिसभाको समानुपातिकमा कम मत पाएको छ । उसले प्रदेशमा ४ लाख ४२ हजार मत प्रतिनिधिसभामा ४ लाख २० हजार पाएको छ । जसपाले करिब २१ हजार कम मत प्रतिनिधिसभामा पाएको छ ।

रास्वपा, राप्रपा, जनमत र नागरिक उन्मुक्तिमा मत ट्रान्सफर

मुख्य दलहरूले गुमाएको मत नयाँ पार्टीमा ट्रान्सफर भएको देखिन्छ । राष्ट्रिय स्वतन्त्र पार्टीले प्रदेशमा उम्मेदवार नउठाएका कारण दलहरूले प्रदेशमा बढी मत पाएको तथ्यांकले देखाउँछ । प्रदेशमा घण्टी नभएकाले धेरै मत हलोमा गएको देखिन्छ । मधेसमा भने जनतम पार्टी र नागरिक उन्मुक्ति पार्टीले पाएका छन् । लोसपाको मत जनमत र नागरिक उन्मुक्तिमा ट्रान्सफर भएको देखिन्छ । लोसपा यसपटक राष्ट्रिय दल नबन्ने निश्चितजस्तै भएको छ । हालसम्म उसले प्रतिनिधिसभाको समानुपातिकमा १ लाख ६७ हजार मात्र पाएको छ ।

प्रदेश १ मा राप्रपामा ट्रान्सफर

जारी मत गणनामा प्रदेश १ मा एमाले पहिलो स्थानमा छ । उसले ६ लाख ६५ हजार मत पाउँदा दोस्रो स्थानमा रहेको कांग्रेसले ५ लाख ६२ हजार मत पाएको छ । तेस्रो स्थानमा रहेको राप्रपाले १ लाख ९८ हजार मत पाउँदा माओवादीले १ लाख ८१ हजार पाएको छ । प्रदेश १ मा ठूला पार्टीको मत राप्रपामा ट्रान्सफर भएको देखिन्छ ।

मधेस प्रदेशमा जनमतमा ट्रान्सफर

मधेस प्रदेशमा कांग्रेस पहिलो र एमाले दोस्रो स्थानमा छ । तर, जनमत पार्टीले ठूला दललाई टक्कर दिइरहेको छ । तेस्रो स्थानमा रहेको जनमतले ३ लाख २९ हजार पाएको छ । चौथोमा रहेको जसपाले २ लाख ९८ हजार मत पाउँदा पाँचौँमा रहेको माओवादीले १ लाख ८० हजार मत पाएको छ ।

बागमती, गण्डकी र लुम्बिनी प्रदेशमा राप्रपामा ट्रान्सफर

बागमती प्रदेशमा कांग्रेस र एमालेको मत राप्रपामा गएको देखिन्छ । बागमतीमा एमाले र कांग्रेस पहिलो र दोस्रो स्थानमा रहँदा तेस्रो स्थानमा राप्रपा रहेको छ । एमालेले ५ लाख ६२ हजार, कांग्रेसले ४ लाख ७१ हजार र राप्रपाले २ लाख ७२ हजार पाएको छ । माओवादी चौथो स्थानमा छ । उसले २ लाख ७० हजार पाएको छ ।

गण्डकी प्रदेशमा पनि ठूला दलको मत राप्रपामा ट्रान्सफर भएको छ । पहिलो एमालेले ३ लाख ५२ हजार, दोस्रो कांग्रेसले ३ लाख ३१ हजार र तेस्रो माओवादीले १ लाख १५ हजार मत पाएको छ । चौथोमा रहेको राप्रपाले ५८ हजार मत पाएको छ ।

लुम्बिनीमा पनि राप्रपामा मत ट्रान्सफर भएको छ । लुम्बिनीमा एमालेले ५ लाख ७० हजार, कांग्रेसले ४ लाख ९९ हजार, माओवादीले १ लाख ९८ हजार र राप्रपाले १ लाख २७ हजार मत पाएको छ । त्यसैगरी, लुम्बिनीमा नागरिक उन्मुक्ति पार्टीमा पनि मत ट्रान्सफर भएको छ । उन्मुक्तिले १ लाख २५ हजार मत पाएको छ ।

कर्णालीमा नेकपा एसमा ट्रान्सफर

कर्णाली प्रदेशमा भने नेकपा एसमा मत ट्रान्सफर भएको छ । एमालेले १ लाख ८३ हजार, कांग्रेसले १ लाख ७० हजार, माओवादीले १ लाख ३७ हजार मत ल्याउँदा चौथोमा रहेको नेकपा एसले ३५ हजार मत पाएको छ । नेकपा एससँगै कर्णालीमा राप्रपामा पनि मत गएको छ । राप्रपाले २५ हजार मत पाएको छ ।

सुदूरपश्चिम प्रदेशमा नागरिक उन्मुक्तिमा ट्रान्सफर

सुदूरपश्चिम प्रदेशमा नागरिक ठूला पार्टीको मत नागरिक उन्मुक्ति पार्टीमा ट्रान्सफर भएको छ । पहिलोमा एमालेले २ लाख ४८ हजार, कांग्रेसले २ लाख ४३ हजार, माओवादीले १ लाख १८ हजार मत पाउँदा उन्मुक्ति पार्टीले ९८ हजार मत पाएको छ । त्यसैगरी राप्रपामा ४३ हजार मत गएको छ । जारी मत गणनाको तथ्यांकले प्रदेशमा नयाँ पार्टी र राप्रपामा धेरै गएको देखिन्छ ।

प्रकाशित मिति: शुक्रबार, मंसिर १६, २०७९ १७:४६