समानुपातिकमा एमालेले ६ र कांग्रेसले ७ प्रतिशत मत गुमाए, गुमाएको मत घण्टी र हलोलाई

समानुपातिकमा एमालेले ६ र कांग्रेसले ७ प्रतिशत मत गुमाए, गुमाएको मत घण्टी र हलोलाई

A+ A A-

निर्वाचन आयोगको पछिल्लो तथ्यांकअनुसार समानुपातिकतर्फ ९३ लाख २१ हजार मतगणना भएको छ । अब करिब १६ लाख मतगणना हुन बाँकी छ । जसमा एमाले पहिलो, कांग्रेस दोस्रो, माओवादी तेस्रो, रास्वपा चौथो, राप्रपा पाँचौँ, जसपा छैटौँ स्थानमा छन् । यी ६ दलले थ्रेस होल्ड कटाएका छन् भने जनमत पार्टी र एकीकृत समाजवादी थ्रेसहोल्ड कटाउन संघर्षरत छन् । १६ लाख मात्र गणना हुन बाँकी भएकाले यी दुई दलले थ्रेसहोल्ड कटाउने सम्भावना न्यून बन्दै गएको छ ।

गत २०७४ को चुनावमा ५ वटा दलले मात्र थ्रेसहोल्ड कटाएका थिए । जम्मा सदर मतको ३ प्रतिशत मत ल्याउने दल मात्र राष्ट्रिय दल हुन पाउँछन् । ४ गते भएको मतदानमा ६१ प्रतिशत मत खसेको आयोगको भनाइ छ । जसमा १ करोड ९ लाख ७३ हजार मतदाता मतदानमा सहभागी भएका थिए । जम्मा मतदाता १ करोड ७९ लाख ८८ हजार ५ सय ७० थियो ।

अघिल्लो चुनावमा १ करोड ५४ लाख २७ हजार मतदाता रहेकोमा यसपटक बढेर १ करोड ७९ लाख ८८ हजार ५ सय ७० पुगेको छ । २०७४ को चुनावमा समानुपातिकमा ९५ लाख ४४ हजार ७७९ मत सदर भएको थियो । यसपटक मतदाताको संख्या बढे पनि दलहरूले प्राप्त गरेको मत घटेको छ ।

एमालेले ६ प्रतिशत गुमायो

हालसम्मको मतपरिणामअनुसार समानुपातिकमा एमाले अगाडि छ । यो समाचार तयार पार्दासम्म उसले २५ लाख ३८ हजार मत पाएको छ । यो २७.२३ प्रतिशत हो । यही अनुपात कायम रहेमा एमालेले समानुपातिबाट ३६ सिट पाउने देखिन्छ ।

२०७४ को चुनावमा एमालेले ३३.२४ प्रतिशत मत ल्याउदा ४१ सिट पाएको थियो । अघिल्लो चुनावको तुलनामा एमालेले यसपटक ६.०१ प्रतिशत कम मत पाएको छ । अघिल्लो चुनावमा ३१ लाख ७३ हजार ४ सय ९४ मत ल्याएको थियो ।

कांग्रेसले ७ प्रतिशत गुमायो

नेपाली कांग्रेसले हालसम्म २४ लाख २ हजार मत पाएको छ । यो २५.७७ प्रतिशत हो । २०७४ को चुनावभन्दा ७ प्रतिशत मत कम कांग्रेसले पाएको छ ।

अघिल्लो चुनावमा कांग्रेसले ३२.७७ प्रतिशत अर्थात् ३१ लाख २८ हजार ३८९ मत पाएको थियो । यसपटक कांग्रेसले पनि समानुपातिकको सिट संख्या कम हुने भएको छ । यही अनुपात कायम रहेमा कांग्रेसले ३४ सिट पाउनेछ । २०७४ मा कांग्रेसले समानुपातिकबाट ४० सिट पाएको थियो ।

माओवादीले २.२० प्रतिशत गुमायो

मओवादी केन्द्रलाई पहिलोपटक चुनावमा सहभागी भएको राष्ट्रिय स्वतन्त्र पार्टीले पछ्याइरहेको छ । कहिले रास्वपा त कहिले माओवादी तेस्रो स्थानका लागि संघर्ष गरिरहेका छन् ।

यो समाचार तयार पार्दासम्म माओवादी तेस्रो स्थानमा उक्लिएको छ । उसले १० लाख ६६ हजार मत ल्याएको छ । यो ११.४४ प्रतितश हो । २०७४ को चुनावभन्दा माओवादीले २.२० प्रतिशत कम मत पाउने देखिन्छ । करिब १६ लाख मत गन्न बाँकी रहदा राष्ट्रिय स्वतन्त्र पार्टी अगाडि आएन भने माओवादीले १५ सिट पाउन सक्छ । अघिल्लो चुनावमा माओवादीले १७ सिट समानुपातिकमा पाएको थियो ।

जसपाले १.४१ प्रतिशत गुमायो

जनता समाजवादी पार्टीले हालसम्म ३ लाख २७ हजार मत पाएको छ । यो ३.५१ प्रतिशत हो । तत्कालीन संघीय समाजवादी फोरम हाल जसपाले अघिल्लो चुनावमा ४.९२ प्रतिशत पाएको थियो । यसपटक १.४१ प्रतिशत मत गुमाउने भएको छ । यसपटक जसपाले ४ सिट पाउने देखिन्छ । अघिल्लो चुनावमा ६ सिट पाएको थियो ।

लोसपा राष्ट्रिय दल नै नबन्ने सम्भावना

यसपटक लोकतन्त्रि समाजवादी पार्टी राष्ट्रिय दल नै नबन्ने लक्षण देखिएको छ । हालसम्म उसले १ लाख २७ हजार मत पाएको छ । २०७४ मा राष्ट्रिय जनता पार्टी नेपाल रहेको हाल लोसपाले १.३७ प्रतिशत मत पाएको छ । अघिल्लो चुनावमा राजपाले ४.९४ प्रतिशत अर्थात् ४ लाख ७२ हजार २ सय ५४ मत पाएको थियो ।

ठूला दलले गुमाएको मत घण्टी र हलोलाई

कांग्रेस, एमाले र माओवादीले गुमाएको मत नयाँ पार्टी राष्ट्रिय स्वतन्त्र पार्टी र अर्को राष्ट्रिय प्रजातन्त्र पार्टीमा गएको देखिन्छ । अघिल्लो पटक राष्ट्रिय पार्टी बन्न नसकेको राप्रपा यसपटक राष्ट्रिय पार्टी बन्ने निश्चित भएको छ । हालसम्म उसले ५ लाख ४६ हजार मत पाएको छ ।

पहिलोपटक चुनावमा सहभागी भएको राष्ट्रिय स्वतन्त्र पार्टीले माओवादीको नजिकनजिक पुगेको छ । उसले १० लाख ६४ हजार मत पाएको छ । यदि रास्वपाले अहिलेकै अनुपातमा अन्तिमसम्म रहेमा १४ सिट र राप्रपाले ७ सिट पाउने देखिन्छ ।

नेकपा एस र जनमत पार्टीलई थ्रेसहोल्ड कटाउन मुस्किल

माधव नेपाल नेतृत्वको एकीकृत समाजवादी र जनमत पार्टी थ्रेस होल्ड कटाउन संघर्ष गरिरहेका छन् । १६ लाख मतगणना हुन बाँकी रहँदा जनमत पार्टीले २ लाख ६४ हजार र एकीकृत समाजवादीले २ लाख ५२ हजार मत ल्याएका छन् । राष्ट्रिय पार्टी बन्न यी दलललाई ५० हजार मत आवश्यक छ । दुवै पार्टीले अब ५०/५० हजार मत ल्याएमा राष्ट्रिय पार्टी बन्नेछन् ।

यी पार्टी राष्ट्रिय दल बनेमा रास्वपा, राप्रपा र जसपाले अहिलेसम्म पाएको सिटमा कम हुनेछ । प्रतिनिधिसभामा समानुपातिकबाट ११० संसद् चयन हुनेछन् ।

प्रकाशित मिति: सोमबार, मंसिर १२, २०७९ १५:०८