मुख्यमन्त्री कार्यालयको ठाडो आदेशपछि ७० अंक ल्याएपछि पास हुने ट्रायलको नयाँ निर्देशिका अलमलमा

मुख्यमन्त्री कार्यालयको ठाडो आदेशपछि ७० अंक ल्याएपछि पास हुने ट्रायलको नयाँ निर्देशिका अलमलमा

A+ A A-

आगामी आइतबारदेखि लागू गर्ने भनिएको सवारी चालक अनुमतिपत्र परीक्षा सञ्चालन कार्यविधि निर्देशिका, २०७७ (संशोधित) अलपत्र परेको छ ।

श्रम, रोजगार तथा यातायात मन्त्रालयले आइतबारदेखि लागू गर्न मातहतका कार्यालयलाई मंसिर १४ गते पत्र काटेको थियो । तर, मुख्यमन्त्री कार्यालयले निर्देशिका तत्काल लागू नगर्न पत्र काटेपछि स्थगित गर्न लागिएको यातायात मन्त्रालयका प्रवक्ता हरिहर पोख्रेलले जानकारी दिए ।

‘तत्काल लागू नगराउन मुख्यमत्री कार्यालयबाट आज पत्र आएको छ,’ उनले भने । यसअघि पनि धेरै पटक निर्देशिका लागू गर्ने भनिए पनि पटक-पटक रोकिएको थियो । पछिल्लो पटक असोज १ गतेदेखि निर्देशिका लागू गर्न श्रम, रोजगार तथा यातायात मन्त्रालय, बागमतीले पहल गरेको थियो ।

मन्त्रालयले मातहतका यातायात कार्यालयलाई पत्र पठाइसकेको अवस्थामा मुख्यमन्त्री कार्यालयले मौखिक रूपमा तत्काल सञ्चालन नगर्न निर्देशन दिएको थियो । यातायात व्यवस्था विभागले चैत २०७७ मै निर्देशिका जारी गरे पनि तयारी नपुगेको कुनै प्रदेशले लागू गरेका थिएनन् ।

निर्देशिका जारी भएको डेढ वर्षपछि २३ साउन २०७९ मा तत्कालीन भौतिक पूर्वाधार तथा यातायातमन्त्री मोहम्मद इस्तियाक राईले निर्देशिका लागू गर्न पहल गरेका थिए । उनले सातै प्रदेशका यातायातमन्त्रीलाई निर्देशिका लागू गर्न सहमत गराएका थिए । अव्यावहारिक प्रयोगात्मक परीक्षाका कारण सेवाग्राही सानो गल्तीमा पनि फेल भई विचौलियाको चङ्गुलमा फस्ने भन्दै यातायात व्यवस्था विभागका तत्कालीन महानिर्देशक नमराज घिमिरेले निर्देशिका संशोधन गर्न पहल गरेका थिए ।

कसरी दिइन्छ अंक ?

सवारीचालक अनुमतिपत्र परीक्षा सञ्चालन कार्यविधि निर्देशिका, २०७७ (संशोधित) अनुसार परीक्षार्थीहरू सानो गल्तीमा फेल हुने छैनन् । परीक्षार्थीले लिखित परीक्षामा १०० पूर्णाङ्क ६० अंक ल्याउनुपर्छ भने प्रयोगात्मक परीक्षा (ट्रायल)लाई सातवटा चरणमा छुट्याइएको छ । यी सात चरण कटाउँदा परीक्षार्थीले ७० अंक ल्याउनुपर्नेछ ।

ट्रायलमा कसरी हुन्छ पास/फेल ?

ए र के वर्ग (मोटरसाइकल र स्कुटर)को हकमा पहिलो चरणको घुमाउरो ८ को अंकभार २० कायम गरिएको छ । एकपटक अंकित रेखा छोएमा ५ र एकपटक खुट्टाले भुईंमा टेकेमा ५ अंक काटिनेछ । त्यस्तै, एकपटकभन्दा धेरै अंकित रेखा छोएमा, सवारीको टायर अंकित रेखाभन्दा बाहिर गएमा, एकपटकभन्दा धेरै खुट्टाले भुईंमा टेकेमा, ठीक दिशा वा ठीक तरिकाबाट ८ नघुमाएमा र सवारीको स्टार्ट बन्द भएको अवस्थामा भने परीक्षार्थीलाई अनुत्तीर्ण घोषणा गरिनेछ ।

दोस्रो चरणको साँघुरो फलेकको अंकभार १० कायम गरिएको छ । यो चरणमा खुट्टाले भुईंमा टेकेमा र फलेकको लम्बाइ पार गर्नुअगावै सवारी फलेकबाहिर निस्केमा परीक्षार्थीलाई अनुत्तीर्ण घोषणा गरिनेछ ।

त्यस्तै, तेस्रो चरणको यू–टर्नको अंकभार १० कायम गरिएको छ । यसमा इन्डिकेटर लाइट नबालेमा १० अंक घटाइनेछ भने अंकित रेखा छोएमा अनुत्तीर्ण घोषणा गरिनेछ । चौथो चरणको ट्राफिक संकेतको अंकभार १५ छ । संकेत पालना नगरे १५ नम्बर घटाइनेछ भने फेल भने हुने छैन ।

त्यसैगरी, पाचौँ चरणमा रहेको बम्पसको अंकभार १५ छ । यसमा एकपटकसम्म खुट्टाले भुईंमा टेकेमा ५ र एकपटकसम्म स्टार्ट बन्द भएमा ५ अंक काटिनेछ । त्यस्तै, एकपटकभन्दा धेरै खुट्टाले भुईंमा टेकेमा र एकपटकभन्दा धेरै स्टार्ट बन्द भएमा अनुत्तीर्ण घोषणा गरिनेछ ।

छैटौँ चरणमा रहेको ¥याम्प (उकालो÷ओरालो) को अंकभार २० छ । यसमा तोकिएको रेखा नाघी सवारी रोकेमा वा नरोकी अघि बढेमा, रोकिएको अवस्थामा सवारी अगाडि र पछाडिको टायर ६ इन्चभन्दा धेरै सरेमा, उकालो पार गरी ओरालो झर्ने क्रममा रेखा नाघी सवारी रोकेमा वा सवारी नरोकी अघि बढेमा र एक पटकभन्दा धेरै स्टार्ट बन्द भएमा परीक्षार्थी फेल हुनेछ ।

त्यस्तै, अन्तिम चरणमा परीक्षार्थीको व्यावहारिक पक्षको समग्र मूल्याङ्कनका लागि अंकभार १० कायम गरिएको छ । यसमा सवारी चलाउनुपूर्व ब्रेक, टायर र ऐनाहरूमा सामान्य निरीक्षण नगरे ३, हेल्मेटको लक नलगाई सवारी चलाए ४ र अस्वाभाविक गतिमा वा असंयमित रूपमा सवारी चलाए ३ नम्बर काटिनेछ । बी क्याटगोरी (कार, जिप भ्यान) का लागि पनि सातवटा चरण बनाएको छ । पहिलो चरणको घुमाउरो ८ को अंकभार २० छ । यसमा दुई पटकसम्म अंकित रेखा छोएमा ५-५ अंक काटिनेछ ।

त्यस्तै, एक पटकभन्दा धेरै अंकित रेखा छोएमा, सवारीको टायर अंकित रेखाभन्दा बाहिर गएमा, ठीक दिशा वा ठीक तरिकाबाट ८ नघुमाएमा, अगाडि बढ्ने क्रममा सवारीलाई पछाडि सारेमा भने परीक्षार्थीलाई अनुत्तीर्ण गरिनेछ ।

त्यसैगरी, दोस्रो चरणको उबडखाबडको अंकभार १० कायम गरिएको छ । यसमा एकपटकसम्म स्टार्ट बन्द भएमा ५ अंक काटिनेछ भने एकपटकभन्दा धेरै स्टार्ट बन्द भएका परीक्षार्थीलाई फेल गरिनेछ ।

तेस्रो चरणमा यू–टर्नको अंकभार १० छ । यसमा ट्रेनिङ इन्डिकेटर लाइट नबालेमा १० अंक घटाइनेछ भने अंकित रेखा छोएमा अनुत्तीर्ण गरिनेछ । त्यस्तै, चौथो चरणको ट्राफिक संकेतको अंकभार १५ कायम गरिएको छ । संकेत पालना नगरे १५ नम्बर घटाइए पनि फेल भने नगरिने बताइएको छ ।

पाचौँ चरणमा रहेको र्‍याम्प (उकालो/ओरालो) को अंकभार १५ छ । यसमा तोकिएको रेखा नाघी सवारी रोकेमा वा नरोकी अघि बढेमा, रोकिएको अवस्थामा सवारी अगाडि र पछाडिको टायर ६ इन्चभन्दा धेरै सरेमा, उकालो पार गरी ओरालो झर्ने क्रममा रेखा नाघी सवारी रोकेमा वा सवारी नरोकी अघि बढेमा र एक पटकभन्दा धेरै स्टार्ट बन्द भएमा परीक्षार्थी फेल हुनेछ ।

छैटौँ चरणमा रहेको ग्यारेज पार्किङको अंकभार २० छ । यसमा सवारीलाई पछाडि गुडाउने क्रममा एकपटकसम्म अगाडि सरेमा १० नम्बर काटिनेछ भने पछाडि गुडाउने क्रममा एकपटकभन्दा धेरै अगाडि सरेमा र अंकित रेखा छोएमा परीक्षार्थी फेल हुनेछ ।

त्यसैगरी, सातौँ र अन्तिम चरणमा परीक्षार्थीको व्यावहारिक पक्षको समग्र मूल्याङ्कनका लागि अंकभार १० कायम गरिएको छ । यसमा सवारी चलाउनुपूर्व ब्रेक, टायर र ऐनाहरूका सामान्य निरीक्षण नगरे, सिटबेल्ट नलगाई चलाएमा ४ र अस्वाभाविक गतिमा वा असंयमित रूपमा सवारी चलाएमा ३ नम्बर काटिनेछ ।

प्रकाशित मिति: शुक्रबार, मंसिर १६, २०७९ १५:५३