मधेस प्रदेशसभामा निर्वाचित यी हुन् ३६ नयाँ अनुहार

A+ A A-

मधेस प्रदेशसभाको प्रत्यक्षतर्फ ६४ वटै निर्वाचन क्षेत्रको अन्तिम मतपरिणाम सार्वजनिक भएको छ । प्रत्यक्षमा १५ सिट जितेर एमाले मधेस प्रदेशसभामा पहिलो पार्टी बनेको छ । दोस्रो दल बनेको कांग्रेसको १३ सिट छ भने प्रत्यक्षमा जसपाले ९, लोसपाले ७, जनमत पार्टीले ६, माओवादी केन्द्र ४ र नेकपा एकीकृत समाजवादीले ४ सिट जितेको छ ।

मधेस प्रदेशसभामा प्रत्यक्ष चुनाव लडेर जितेका ६४ मध्ये ३६ जना नयाँ अनुहार हुन् । अर्थात्, उनीहरूले पहिलोपटक प्रदेशसभाको यात्रा तय गरेका छन् । बाँकी २८ मध्ये अधिकांश दोस्रो पटक निर्वाचित भएका हुन् भने कोही समानुपातिकतर्फबाट सांसद बने सकेका छन् ।

सप्तरीबाट जितेका ६ जना नयाँ अनुहार हुन् । सप्तरी १ 'क' बाट एमालेका राजकुमार लेखी, सप्तरी १ को 'ख' बाट जनमत पार्टीका सकिय मियाँ, सप्तरी २ 'क' बाट जनमत पार्टीकै सतीशकुमार सिंह, २ 'ख' बाट जनमत पार्टीकै महेश प्रसाद यादव प्रदेशसभामा निर्वाचित नयाँ अनुहार हुन् । सप्तरी ३ 'ख' बाट निर्वाचित जनमत पार्टीका शम्भुकुमार साह र सप्तरी ४ 'ख' बाट निर्वाचित स्वतन्त्र उम्मेदवार अनिरुद्धकुमार सिंहले पनि पहिलोपटक प्रदेशसभाको ढोका खोलेका हुन् ।

सिरहा ३ को 'ख' बाट नेकपा एसका प्रमोदकुमार यादव दोस्रो पटक निर्वाचित भएका हुन् भने बाँकी सात जना नयाँ अनुहार छन् । सिरहा १ 'क' बाट एमालेका राजेन्द्र प्रसाद चौधरी थारु, 'ख' बाट जसपाका राजकुमार गुप्ता, सिरहा २ 'क' बाट जनमत पार्टीका सञ्जयकुमार यादव र 'ख' बाट एमालेका शत्रुधन प्रसाद सिंह पनि नयाँ अनुहार हुन् । सिरहा ३ 'क' बाट एमालेका मनोज कुमार सिंह, सिरहा ४ को 'क' बाट जनमत पार्टीका त्रिभुवन साह र सिरहा ४ 'ख' बाट लोसपाका रामबाबु यादवले पहिलो पटक संसदको यात्रा तय गरेका हुन् ।

धनुषाबाट निर्वाचित हुनेमा पाँच जना नयाँ अनुहार छन् । धनुषा १ 'क' बाट कांग्रेसका सञ्जयकुमार महतो, २ 'क' बाट एमालेका लखन दास तत्मा, धनुषा ३ 'ख' बाट निर्वाचित एमालेका दीपेन्द्र कुमार ठाकुर, ४ 'क' बाट कांग्रेसका शेषनारायण यादव र ४ 'ख' बाट निर्वाचित एमालेका हरिनारायण महतोले पहिलोपटक संसदको यात्रा तय गरेका हुन् ।

महोत्तरी ४ 'ख' बाट एमालेका सरोज कुमार यादवले पहिलोपटक संसदको ढोका खोलेका छन् ।महोत्तरीबाट प्रदेशसभाका ८ सिटमा ७ जना पुरानै अनुहार दोहोरिएका छन् । सर्लाही २ 'क' बाट कांग्रेसका जंगीलाल राय, 'ख' बाट कांग्रेसकै कौशल किशोर राय, ३ 'क' बाट स्वतन्त्र उम्मेदवार जवाहर लाल कुशवाहा र ४ 'ख' बाट निर्वाचित माओवादी केन्द्रका फकिरा महतो पनि पहिलोपटक निर्वाचित सांसद हुन् ।

रौतहटबाट एक जना मात्रै दोस्रोपटक प्रदेशसभामा निर्वाचित भएका छन् भने बाँकी ७ जना नयाँ अनुहार नै हुन् । रौतहट १ 'क' बाट कांग्रेसका नागेन्द्र साह, 'ख' बाट कांग्रेसकै कृष्णप्रसाद यादव, २ 'क' बाट एमालेका मोहम्मद जैद आलम र २ 'ख' बाट निर्वाचित नेकपा एसका कनिश पटेल प्रदेशसभाका लागि नयाँ अनुहार हुन् । त्यसैगरी, रौतहट ३ 'क' बाट स्वतन्त्र उम्मेदवार केशव राय, ३ 'ख' बाट कांग्रेसका सुनिल कुमार यादव र ४ 'क' बाट माओवादी केन्द्रका युवराज भट्टराई पहिलोपटक प्रदेशसभामा निर्वाचित भएका हुन् ।

बाराबाट यसपटक प्रदेशसभामा दुई जना नयाँ अनुहारले चुनाव जितेका छन् । बाँकी ६ जना प्रत्यक्ष र समानुपातिकमार्फत यसअघि नै सांसद भइसकेका निर्वाचित भएका छन् । बारा ३ 'क' बाट एमालेका रविन्द्र दास श्रेष्ठ र ४ 'क' बाट एमालेका देवनारायण थारु प्रदेशसभाका नयाँ अनुहार हुन् ।

पर्साबाट मधेस प्रदेशसभामा निर्वाचित चार जना नयाँ अनुहार हुन् । पर्सा १ 'क' बाट माओवादी केन्द्रका रहबर अन्सारी, २ 'क' बाट कांग्रेसका श्याम प्रसाद पटेल, ३ 'क' बाट स्वतन्त्र उम्मेदवार प्रमोद कुमार जयसवाल र ३ 'ख' बाट निर्वाचित कांग्रेसका जर्नादन सिंह क्षेत्री पनि मधेस प्रदेशसभाका नयाँ अनुहार हुन् ।

प्रकाशित मिति: बिहीबार, मंसिर १५, २०७९ १३:४७