हेराल्ड कलेजको दीक्षान्त समारोह : ३ सय ९६ जना दीक्षित

A+ A A-

हेराल्ड कलेज काठमाडौंको दीक्षान्त समारोह २०२२ सम्पन्न भएको छ । समारोहमा स्नातक (ग्र्याजुएट) तह पूरा गरेका ३ सय ९६ जना दीक्षित भएका छन् ।

दीक्षित विद्यार्थीहरूलाई बेलायतस्थित उल्भरहेम्टन विश्वविद्यालयका सहउपकुलपति (प्रो. भाइस चान्सलर) टिम स्टिलले दीक्षान्तको प्रमाणपत्र प्रदान गरेका थिए ।

दीक्षित विद्यार्थीहरूमध्ये ३६१ जना बीएस्सी (अनर्स) कम्प्युटर साइन्स र ३५ जना बीएस्सी (अनर्स) इन्टरनेसनल बिजनेस म्यानेजमेन्ट विषयका रहेको कलेजले जनाएको छ ।

कार्यक्रममा विद्यार्थीका अभिभावक, शिक्षकलगायतको उपस्थिति थियो ।

दीक्षित उत्कृष्ट विद्यार्थीहरूलाई इनोभेट नेपाल ग्रुपले छात्रवृत्ति उपलब्ध गराएको छ । त्यसैगरी, हेराल्ड कलेजमा अन्तर्राष्ट्रिय एमबीए अध्ययन गर्नसमेत छात्रवृत्तिकोे व्यवस्था गरेको छ ।

सो अवसरमा कलेजका प्रमुख कार्यकारी अधिकृत (सीईओ) प्रकाश श्रेष्ठले नेपालमा उत्कृष्ट र गुणस्तरीय शिक्षा प्रदान गर्न सफल हेराल्ड कलेजका विद्यार्थीले भविष्यमा सजिलै रोजगारी हासिल गर्न सक्ने बताए । उनले दीक्षित सबै विद्यार्थीको उज्ज्वल भविष्यका लागि शुभकामनासमेत दिए ।

त्यस्तै, प्रमुख अतिथि विश्वविद्यालयका प्रो भाइस चान्सलर टिम स्टिलले नेपालमा उत्कृष्ट शिक्षा दिन सफल हेराल्ड कलेजको सम्पुर्ण टिमलाई धन्यवाद दिए । उनले भने, ‘म यो गौरव गर्न चाहन्छु कि विश्वविद्यालयको सोचअनुसार कलेजले शिक्षा दिन सकेको छ, दीक्षित विद्यार्थीलाई प्रमाणपत्र दिन पाएकोमा खुसी लागेको छ ।'

हेराल्ड कलेजलाई दिएको सम्बन्धन र यस कलेजले दिएको शिक्षाले नेपालको शिक्षा क्षेत्रमा ठूलो योगदान पुगेको उनको भनाइ थियो ।

टिम स्टिलका अनुसार सो विश्वविद्यालयको सम्बन्धनप्राप्त कलेजबाट उत्तीर्ण विद्यार्थीमध्ये ९६ प्रतिशतले रोजगारी हासिल गरेका छन्, हेराल्ड कलेज पनि त्यसैको उहाहरण हो ।

हेराल्ड कलेज काठमाडौंले चारवर्षे ब्याचलर अफ इन्टरनेसल बिजनेस म्यानेजमेन्ट, तीनवर्षे बीएस्सी (अनर्स) कम्प्युटर साइन्स र दुईवर्षे अन्तर्राष्ट्रिय एमबीए कक्षा सञ्चालन गरिरहेको छ ।

प्रकाशित मिति: बुधबार, मंसिर १४, २०७९ १९:४८