एकीकृत समाजवादीलाई गठबन्धनबाट ९१ प्रतिशतसम्म मत 'ट्रान्सफर'

A+ A A-

सत्ता गठबन्धनबाट भागवण्डामा १९ सिट पाएको एकीकृत समाजवादीले १० सिटमा जित निकाल्यो । यो भनेको ५२ प्रतिशतभन्दा बढी हुन आउँछ । सो पार्टीका सम्मानित नेता झलनाथ खनाल मत गन्दागन्दै उठेर हिँडे । खनालले एमालेका उम्मेदवार महेश बस्नेतलाई हराउन सकेनन् । बस्नेतले २५ हजार ७५३ मत ल्याउँदा खनालले २३ हजार ८९ मत ल्याए । खनाल २ हजार ६६४ मतले पछि परे । समानुपातिकमा सो क्षेत्रमा एकीकृत समाजवादीले ८ हजार २१ मत पाएको छ । खनालले अन्य दलबाट १५ हजार ६८ मत पाएको देखिन्छ ।

तर, एकीकृत समाजवादी कानुनी प्रक्रियामा जाने भएको छ । ‘इलाममा विसंगति देखियो, उहाँले विज्ञप्तिमा कुरा राख्नुभएको छ । त्यसमा कानुनी उपचारको तरिका अपनाएर जाने र पुनः मतदानको उहाँले माग गर्नुभएको छ,’ पार्टीमा छलफलपछि अध्यक्ष माधवकुमार नेपालले भने ।

कांग्रेस कार्यकर्ताले मत ट्रान्सफर नगरेको नेपालले आरोप लगाए । उनले ३ हजार मत कहाँ गयो भनेर खोजी गरेका छन् । ‘कांग्रेससँग छलफल गर्दा मूर्खहरूले केके गरे केके । पार्टीको अनुशासन भएन । ३ हजार मत कहाँ गयो ?,’ उनले भने ।

निर्वाचन अधिकृतले गणना गरेर प्रकाशित गरेको तथ्यले समानुपातिकमा एकीकृत समाजवादीको ८ हजार २१, कांग्रेसको १६ हजार ४५० र माओवादीको १ हजार ४४९ मत जोड्दा २६ हजार १२० हुने हिसाब खनालको छ । ‘मतदाताहरू तलमाथि भएको थाहा छैन,’ खनालले भने, ‘गठबन्धनमा स्टकस्टक गरेर लड्ने हो, इलाममा त्यो देखिनँ ।’

मतगणना कसरी गर्ने भनेर निर्वाचन अधिकृतले नसोधेको खनालले बताए । ‘सबै मत एकै ठाएँमा खन्याएर गणना गर्न थालियो । यो मेथडभित्र गडबडी हुनुपर्छ । २५ मत पेटिका खन्याउँदा ४३७ मत मत गायब भयो । यही हो धाँधलीरहित चुनाव ?,’ उनले भने, ‘सबै दलले देखे, एमालेले देखेन । किनकि उसलाई फाइदा भयो ।’

एकीकृत समाजवादीलाई ९१ प्रतिशतसम्म मत ट्रान्सफर भएको देखिन्छ ।

दाङ १ बाट निर्वाचित मेटमणि चौधरीलाई अन्य दलबाट २३ हजार ३५८ मत ट्रान्सफर भएको छ । समानुपातिकमा एकीकृत समाजवादीले ३ हजार २१८ मात्र मत ल्याएको छ । उनले २६ हजार ५७६ मत ल्याएर निर्वाचित भए । उनका निकटतम प्रतिस्पर्धी एमालेकी शान्ता चौधरीले २१ हजार ४९३ ल्याइन् । यो क्षेत्रमा ८७ प्रतिशत मत ट्रान्सफर भएको देखिन्छ ।

धादिङ १ बाट निर्वाचित राजेन्द्र पाण्डे ३६ हजार १८ मत ल्याएर निर्वाचित भए । उनका निकटतम प्रतिस्पर्धी भूमिप्रसाद त्रिपाठीले २७ हजार २७ हजार ९१५ ल्याए । समानुपातिकमा एकीकृत समाजवादीले ६ हजार ३५ मत ल्याएको छ । धादिङमा सो पार्टीलाई २९ हजार ९८३ मत ट्रान्सफर भएको देखिन्छ । यो क्षेत्रमा ८३ प्रतिशत मत ट्रान्सफर भएको देखिन्छ ।

सल्यान १ मा प्रकाश ज्वाला ३५ हजार ७०७ मत ल्याएर निर्वाचित भए । उनको निकटतम प्रतिस्पर्धी स्वतन्त्र उम्मेदवारले २९ हजार ७२९ मत ल्याए । समानुपातिकमा सो पार्टीले ५ हजार ९७० मत पाएको छ । सो क्षेत्रमा एकीकृत समाजवादीलाई गठबन्धनबाट २७ हजार ७३७ ट्रान्सफर भएको देखिन्छ । यो क्षेत्रमा ७७ प्रतिशत मत ट्रान्सफर भएको देखिन्छ ।

डोल्पामा एकीकृत समाजवादीका धनबहादुर बुढा ११ हजार २९२ मत ल्याएर विजयी भए । उनका निकटतम प्रतिस्पर्धी एमालेका गणेशबहादुर शाहीले ५ हजार ५०५ मत ल्याए । समानुपातिकमा एकीकृत समाजवादीले १ हजार ८२४ मत पाएको छ । यसरी हेर्दा ९ हजार ४६८ मत गठबन्धनबाट ट्रान्सफर भएको देखिन्छ । यो क्षेत्रमा ८३ प्रतिशत मत ट्रान्सफर भएको देखिन्छ ।

बारा ४ मा एकीकृत समाजवादीका कृष्णकुमार श्रेष्ठ ३० हजार ३४१ मत ल्याएर विजयी भए । उनका निकटतम प्रतिस्पर्धी एमालेका एकवाल मियाँले २० हजार ३३६ मत ल्याए । समानुपातिकमा एकीकृत समाजवादीले ४ हजार ६९१ मत पाएको छ । सो क्षेत्रमा २५ हजार ६५० मत गठबन्धनका अन्य दलबाट ट्रान्सफर भएको देखिन्छ । यो क्षेत्रमा ८४ प्रतिशत मत ट्रान्सफर भएको देखिन्छ ।

दैलेख १ मा एकीकृत समाजवादीका अम्मरबहादुर थापा १८ हजार २९७ मत ल्याएर विजयी भए । उनका निकटतम प्रतिस्पर्धी एमालेका रवीन्द्र शर्माले १७ हजार ४४५ मत ल्याए । समानुपातिकमा १ हजार ७५ मत ल्याएको छ । यसरी हेर्दा सो क्षेत्रमा एकीकृत समाजवादीलाई गठबन्धनबाट १५ हजार १३१ अर्थात् ८२ प्रतिशत मत ट्रान्सफर भएको देखिन्छ ।

अछाम १ मा शेरबहादुर कुवँर १९ हजार ५३४ मत ल्याएर विजयी भए । उनका निकटतम प्रतिस्पर्धी एमालेका झपट बोहोराले १५ हजार ४५ मत ल्याए । समानुपातिकमा एकीकृत समाजवादीले २ हजार ७४७ मत ल्याएको छ । सो क्षेत्रमा गठबन्धनबाट १६ हजार ७८७ ट्रान्सफर भएको देखिन्छ । यो क्षेत्रमा ८५ प्रतिशत मत ट्रान्सफर भएको देखिन्छ ।

बझाङ १ मा एकीकृत समाजवादीका भानुभक्त जोशी २८ हजार ४१३ मत ल्याएर विजयी भए । उनका निकटतम प्रतिस्पर्धी एमालेका ऐन महरले २७ हजार ४१२ मत ल्याए । समानुपातिकमा एकीकृत समाजवादीले ५ हजार १ मत पाएको छ । यसरी हेर्दा सो क्षेत्रमा २३ हजार ४१२ अर्थात् ८२ प्रतिशत मत ट्रान्सफर भएको देखिन्छ ।

डोटीमा एकीकृत समाजवादीका प्रेमबहादुर आले २७ हजार २१० मत ल्याएर विजयी भए । उनका निकटतम प्रतिस्पर्धी एमालेकी गौरी ओलीले २३ हजार ४ मत ल्याइन् । सो क्षेत्रमा एकीकृत समाजवादीले २ हजार ३७३ मत पाएको छ । यसरी हेर्दा सो क्षेत्रमा २४ हजार ८३७ अर्थात् ९१ प्रतिशत मत ट्रान्सफर भएको देखिन्छ ।

रौतहट १ मा पार्टी अध्यक्ष माधवकुमार नेपाल ३३ हजार ५२२ मत ल्याएर विजयी भए । उनका निकटतम प्रतिस्पर्धी एमालेका अजय गुप्ताले २६ हजार ९२२ मत ल्याए । समानुपातिकमा एकीकृत समाजवादीले ९ हजार ५७८ मत पाएको छ । यसरी हेर्दा सो क्षेत्रमा एकीकृत समाजवादीलाई २३ हजार ९४४ अर्थात् ७१ प्रतिशतभन्दा बढी मत ट्रान्सफर भएको देखिन्छ ।

प्रकाशित मिति: बुधबार, मंसिर १४, २०७९ १९:१४