बाजे पुस्ता र नाति पुस्ता एकसाथ संसद्‌मा

A+ A A-

४ मंसिरमा सम्पन्‍न प्रदेशसभा तथा प्रतिनिधिसभाको निर्वाचनपछि प्रतिनिधिसभाका १६२ निर्वाचन क्षेत्रको अन्तिम परिणाम आएको छ । यो निर्वाचनले स्थापित भनिएका कतिपय दललाई धक्का दिएको छ भने नयाँ दलहरूलाई राम्रै मत दिएको छ । त्यस्तै राप्रपा नेपालको पुनरोदय गराएको छ । जसका कारण संसद्‌को अंकगणित पेचिलो हुने देखिएको छ ।

यो निर्वाचनमा युवा भर्सेस पाको उमेर पनि देखियो । ठूला दलहरूले युवाहरू उठाएको निर्वाचन क्षेत्रमा अर्को उम्मेदवारलाई निकै चुनौती दखियो । योपटकको निर्वाचनमा वयोवृद्ध उमेरका नेताहरूका साथसाथै उनीहरूको नाती पुस्ताका नेताहरू पनि प्रतिनिधिसभामा पुगेका छन् ।

हालसम्मको परिणाममा ४० वर्षमुनिका १० जना युवा र ७५ वर्षमाथिका सात जना नेता प्रतिनिधिसभा सदस्यमा निर्वाचित भएका छन् । ४० वर्षमुनिको उमेर समूहका नवनिर्वाचित सांसद नयाँ पार्टीका बढी छन् भने ७५ वर्षमाथिका भने पुराना दलका नेताहरू छन् ।

यहाँ ४० वर्षमुनि र ७५ वर्षमाथिका निर्वाचित सांसदहरूका बारेमा चर्चा गरिएको छ ।

२७ वर्षीया सोविता, ८५ वर्षीय महिन्द्र राय यादव

प्रत्यक्ष निर्वाचन प्रणालीबाट प्रतिनिधिसभा सदस्यमा निर्वाचित हुने सबैभन्दा कान्छो उमेरकी हुन् सोविता गौतम । त्यस्तै निर्वाचन आयोगको तथ्यांकलाई आधार मान्दा सबैभन्दा वृद्ध सांसद हुन् नेपाल समाजवादी पार्टीका नेता महेन्द्र राय यादव । यादव माओवादी केन्द्रको चिह्नबाट निर्वाचन लडेका कारणले माओवादीका सांसदको रूपमा गणना हुनेछ ।

सोविता गौतम

महेन्द्र राय यादव

विजेता : काठमाडौं निर्वाचन क्षेत्र नम्बर २

जन्ममिति : ३ असार २०५२
जन्मस्थान : दोलखा
स्थायी ठेगाना : दोलखा तामाकोसी गाउँपालिका, जामुने
बाबु/आमाको नाम : कृष्णप्रसाद गौतम
राजनीतिक दल : राष्ट्रिय स्वतन्त्र पार्टी
शैक्षिक योग्यता : स्‍नातक (कानुन)
अनुभव :
१. अधिवक्ता भई काम गरेको
२. पत्रकारिता गरेको
३. सामाजिक संघसंस्थामा मुख्य भूमिकामा रही बोर्ड सञ्चालन गरेको
४. पर्यटन व्यवसाय सञ्चालन गरेको

विजेता : सर्लाही– २

जन्ममिति : २४ वैशाख १९९४
जन्मस्थान : सर्लाही
स्थायी ठेगाना : सर्लाही हरिपुर्वा नगरपालिका
बाबु/आमाको नाम : शुभकरण यादव
पति/पत्नीको नाम, थर : ममतादेवी यादव
राजनीतिक दल : नेपाल कम्युनिस्ट पार्टी (माओवादी केन्द्र)
शैक्षिक योग्यता : एसएलसी
अनुभव : पूर्वमन्त्री

चित्रबहादुर र महन्थसँग २९ वर्षीय योगेश गौचन

संसद्‌मा अर्को कान्छो उमेरका विजेता हुन् योगेश गौचन । त्यही संसद्‌मा अर्का वयोवृद्ध विजेता हुन्, चित्रबहादुर केसी र महन्थ ठाकुर । योगेश गौचन भर्खर २९ वर्ष पुगे भने महन्थ र चित्रबहादुर ८० वर्ष कटिसकेका छन् ।

७८ वर्षीय रामचन्द्र र ३० वर्षीय ज्ञानेन्द्र

अघिल्लो निर्वाचनमा तनहुँबाट पराजित भएका रामचन्द्र पौडेल अहिले पुन: विजयी भएका छन् । संसदीय राजनीतिमा रामचन्द्र पौडेल २०४८ सालपछिका सबै निर्वाचनमा उम्मेदवार रहेका छन् भने २०७४ बाहेक सबै चुनावमा जितेका छन् । उनी अहिले संसद्‌मा चौथो बढी उमेरको पात्र मध्येमा पर्छन् । यता पहिलोपटक निर्वाचन लडेर विजेता भएका ज्ञानेन्द्रबहादुर शाही तेस्रो कान्छो उम्मेदवार हुन् ।

७७ वर्षीय शेरबहादुर र मंगलप्रसाद ३३ वर्षकी तोसिमा

राष्ट्रिय स्वतन्त्र पार्टीकी उम्मेदवार तोसिमा कार्कीले ललितपुरबाट युवाको पहिचान बोकेर विजेता हुँदैगर्दा सरकारले वृद्धभत्ता दिनुपर्ने उमेर तोकेको भन्दा पनि १० वर्ष नाघेका शेरबहादुर देउवा र मंगलप्रसाद गुप्ताले क्रमश: कांग्रेस र एमालेको तर्फबाट डँडेल्धुरा र कपिलवस्तुबाट निर्वाचित भएका छन् ।

अर्जुन, अरुन र अमन

एकसाथ प्रतिनिधिसभाको सदस्यमा निर्वाचित भएका छन्– अर्जुननरसिंह केसी, अरुणकुमार चौधरी र अमनलाल मोदी । अमनलाल यसअघि पनि संसद्‌को अनुभव बटुलेका थिए भने नागरिक उन्मुक्ति पार्टीबाट विजेता अरुनकुमार चौधरी पहिलोपटक संसद्‌ प्रवेश गर्दैछन् । उनीहरूसँग २०३८ सालमा नै राष्ट्रिय पञ्चायतमा प्रवेश पाएका अर्जुननरसिंह केसी पनि विजेता छन् ।

४० वर्षीय दुई विजेता दुवै एमालेका

संसद्‌मा दुई जना पात्रा उम्मेदवारी दिँदाको बखतमा ४० वर्षीय छन् । ती दुवै जना नेकपा एमालेको तर्फबाट विजेता हुन् । ४० वर्षीय महेशकुमार बर्तौला मकवानपुरबाट निर्वाचित हुँदै गर्दा एमालेकै अर्का ४० वर्षीय उम्मेदवार ज्वालाकुमारी साह बारा ३ बाट निर्वाचित भएकी छन् ।

०००

यो निर्वाचनमा स्थापित दलका नेताहरूलाई युवाले चुनौती दिएको देखिएको छ । मुख्य रूपमा चर्चामा हरेका पार्टीबाट युवा पुस्ताले टिकट पाउँदै गर्दा वयोवृद्ध बनेका धेरै उम्मेदवार भने पराजित भएका छन् ।

२०४८ सालदेखि पटक पटक उम्मेदवार बन्दै चुनाब जित्दै २०७९ मा पनि प्रतिस्पर्धामा रहेका १३ स्थापित दलका नेताहरू अहिले पराजित भएका छन् ।

प्रकाशित मिति: शुक्रबार, मंसिर १६, २०७९ १७:४४