ओलीले तीन महिनाअघि नै भनेका थिए- कब्जा गर्छन्, चापाकोटका बुथ जोगाउनू

A+ A A-

विवादका कारण मतदानको १० दिनदेखि रोकिएको स्याङ्जा २ को मतगणना सुरु हुँदैछ । नेकपा एमाले, राष्ट्रिय स्वतन्त्र पार्टीले नेपाली कांग्रेसले सत्ता र शक्ति प्रयोग गरेर बुथ कब्जा गरेको भन्दै पुनः मतदानको माग गरेका थिए । तर, आयोगले मतगणना गर्ने निर्णय गरेको छ ।

स्याङ्जा क्षेत्र नम्बर २ मा चापाकोट नगरपालिका, गल्याङ नगरपालिका, वालिङ नगरपालिका वडा नम्बर १, २, ५, ६, ७, ८, ९, १०, ११, १२, १३, १४, भिरकोट नगरपालिकाको वडा नम्बर ५, ६, ७, ८ र ९ र कालीगण्डकी गाउँपालिका पर्छन् ।

स्याङ्जाको चापाकोट नगरपालिका–३ को दिसिङकोट आधारभूत विद्यालय, चापाकोट ४ को राम मन्दिर मावि, चापाकोट–५ को जनसक्रिय आधारभूत विद्यालय र दिनदयालु आधारभूत विद्यालय मतदान केन्द्रमा कांग्रेसले कब्जा गरेको एमालेको आरोप छ । एमालेको भनाइलाई आधार मान्ने हो भने यी मतदान केन्द्रमा ४ हजार ४७७ मतदाता थिए र तीमध्ये ४ हजार २७० अर्थात् ९५.३७ प्रतिशत मत खसेको छ ।

चापाकोट ठाउँ कांग्रेसको पकड क्षेत्र मानिन्छ । चापाकोटमा चुनावबखत हुने गतिविधिबारे जानकार एमाले अध्यक्ष केपी शर्मा ओलीले पार्टीपंक्तिलाई बुथ जोगाउन निर्देशन दिएका थिए । पोखरामा गत २८ भदौमा नेपाल लोकतान्त्रिक तमु संघको दोस्रो राष्ट्रिय सम्मेलन थियो । त्यही कार्यक्रममा बोल्दै अध्यक्ष ओलीले चापाकोटका मतदान केन्द्रमा सधैँ बुथ कब्जा हुने गरेको दाबी गर्दै भोट जोगाउन कार्यकर्तालाई भनेका थिए ।

त्यो कार्यक्रममा हाल स्याङ्जा–२ बाट उम्मेदवार रहेकी नेतृ पद्‌मा अर्याल पनि थिइन् । चापाकोटका मतदाताले आफूले चाहेको ठाउँमा मत हाल्नै नपाउने गरेको अध्यक्ष ओलीको भनाइ थियो । ‘स्याङ्जाका चापाकोटलगायत बुथ रक्षा गर्नुस् । त्यहाँका मतदाताले आफ्नो भोट मन लागेको ठाउँमा खसाउन पाएका छैनन् । मान्छेको हातखुट्टा भाँच्न लगाउँछन्,’ ओलीले भनेका थिए, ‘छिमेकमा मान्छे मारेर अरुलाई तर्साउने गरिएको छ । चुनाव हुनै नदिएर अबिरजात्रा गर्ने गरिएको छ । त्यहाँ लज्जाजनक काम हुन्छ । सरकारको ध्यानाकर्षण गराउँछु । चापकोट क्षेत्रका मतदाताले भोट हाल्नै पाउँदैनन् ।’

‘यत्रो मगरको संगठन, महिलाको संगठन, विद्यार्थीको संगठन हुँदाहुँदै बुथ कसैले कब्जा गर्छ भने त्यो हाम्रो कमजोरी हुनेछ । हामीले त्यो कमजोरी देखाउने होइन । हामीले त्यो कमजोरी नदेखाउने बाटोतिर लाग्नुपर्छ,’ ओलीले भनेका थिए ।

एमालेले चापाकोटको ३, ४ र ५ नम्बर वडामा बुथ कब्जाको आरोप लगाएको छ त्यहाँ कांग्रेस निकै बलियो देखिन्छ । चापाकोट नगरपालिकामा १० वटा वडा पर्छन् । गत स्थानीय तहको चुनावलाई आधार मान्दा १० मध्ये चापाकोट वडा नम्बर ९ मात्रै एमाले बलियो भएको ठाउँ हो । गत वैशाखको स्थानीय तह चुनावमा ५ वटा वडा एमालेले जितेको थियो । एमालेले जितेका वडामा बढीमा ८ देखि डेढ सय मतसम्मको अग्रता छ । चापाकोट ९ मा भने एमालेले कांग्रेस उम्मेदवारलाई करिब ५ सय मतले हराएका छन् ।

अचम्म के छ भने एमालेले अहिले जुन ३ वटा वडामा बुथ कब्जा भएको दाबी गरेको छ त्यहाँ कांग्रेसका वडाध्यक्ष उम्मेदवारले अपत्यारिलो मतान्तरले चुनाव जितेका थिए । कांग्रेससँग एमाले उम्मेदवार चापाकोट–३ मा ७६२, चापाकोट–४ मा ९७९ र चापाकोट–५ मा ६१२ मतान्तरले पराजित भएका थिए । त्यतिबेला पनि एमालेले बुथ कब्जाको आरोप लगाएको थियो ।

२०७४ सालमा पनि चापाकोटमा बुथ कब्जा भएको भन्दै तत्कालीन बाम गठबन्धनले पुनः मतदानको माग गरेको थियो । त्यतिबेला पनि नेतृ अर्याल नै उम्मेदवार थिइन् । उनीसँग तत्कालीन उपप्रधानमन्त्री एवं शिक्षामन्त्री कांग्रेसका गोपालमान श्रेष्ठ प्रतिस्पर्धामा थिए । स्याङ्जा–२ मा नेकपा एमालेकी नेतृ पद्माकुमारी अर्याल, नेपाली कांग्रेसका धनराज गुरुङ, राष्ट्रिय स्वतन्त्र पार्टीका टिकराज गुरुङसहित १२ जना उम्मेदवार प्रतिस्पर्धामा छन् ।

प्रकाशित मिति: बुधबार, मंसिर १४, २०७९ १६:४७