दक्ष शिक्षक उत्पादनका लागि प्याब्सनको लाइब्रेरी विकास तालिम

A+ A A-

दक्षण शिक्षक उत्पादनका लागि निजी तथा आवासीय विद्यालय अर्गनाइजेसन, नेपाल (प्याब्सन) ले लाइब्रेरी विकास तालिम सुरु गरेको छ ।

अक्सब्रिज ललितपुरमा आयोजित एक औपचारिक कार्यक्रम गरी तालिमको उद्घाटन गरेको हो । लाइब्रेरी विकास फोरमका अध्यक्ष यज्ञराज भट्टले तालिम दिने प्याब्सनले जानकारी दिएको छ ।

गत साउनमा फोरमसँग प्याब्सनले करिब ५ हजार विद्यालयका शिक्षकहरूलाई लाइब्रेरी विकास तालिम दिन गरेको सम्झौता गरेको थियो । सोही अनुसार सुरु भएको तालिम एक महिनासम्म चल्नेछ ।

तालिममा लाइब्रेरीको अर्थपूर्ण सञ्चालन र विद्यालयमा यसको प्रभावकारी प्रयोगबारे सीप सिकाइने आयोजकको भनाइ छ । विद्यालयका प्रत्येक शिक्षकमा लाइब्रेरीको ज्ञान भएमा मात्र शिक्षण सिकाइ प्रभावकारी बनाउन सकिने भएकाले तालिम आवश्यक भएको प्याब्सनका उपाध्यक्ष तथा तालिम विभाग संयोजक कृष्ण अधिकारीले बताए ।

तालिम अवधिभर अनलाइन र अफलाइन लाइब्रेरी सञ्चालनको विषयमा प्रशिक्षार्थीहरूले ज्ञान लिने उनले बताए ।

कार्यक्रममा बोल्दै प्याब्सनका केन्द्रीय सचिव रबिन्स शर्माले लाइब्रेरीको विकासबिना कुनै पनि शैक्षिक संस्था र देश विकासको कल्पना गर्न नसकिने उल्लेख गरे । उनले प्याब्सनले सुरु गरेको यो अभियान देशभर फैलिने र त्यसले समग्र देशको शैक्षिक उन्नयनमा महत्त्वपूर्ण भूमिका खेल्ने विश्वास व्यक्त गरे ।

त्यस्तै, प्याब्सनका केन्द्रीय महासचिव आरबी कटुवालले शैक्षिक रूपान्तरणका लागि प्याब्सनले काम गर्दै आएको उल्लेख गर्दै त्यसैको निरन्तरता स्वरूप विभिन्न संस्थाहरूसँग साझेदारी गरी तालिम तथा क्षमता अभिवृद्धि कार्यक्रम सञ्चालन गर्न लागिएको बताए ।

लाइब्रेरी विकास फोरमका अध्यक्ष यज्ञराज भट्टले नेपाली शिक्षा प्रणाली परीक्षामुखी मात्रै भएको र ज्ञान सीप अनि पढ्ने बानीको विकास हुन नसकेको उल्लेख गरे ।

अन्य देशमा विद्यालय निर्माणसँगै लाइब्रेरीको परिकल्पना गरिने भए पनि नेपालमा लाइब्रेरीलाई प्राथमिकतामा नराख्ने गरेको उल्लेख गरे । आजको दिनमा बढी सूचना हुने मान्छे नै धनी कहलिने र त्यसका लागि लाइब्रेरीको विकास गर्नुपर्ने हुँदा प्याब्सनसँगको सहकार्यले सार्थकता पाउने विश्वास व्यक्त गरे ।

ललितपुर प्याब्सनका अध्यक्ष निरोज महर्जनको सभापतित्व तथा केन्द्रीय प्याब्सनका उपाध्यक्ष तथा तालिम विभाग संयोजक कृष्ण अधिकारीको प्रमुख आतिथ्यमा उद्घाटन कार्यक्रम सम्पन्न भएको हो ।

प्रकाशित मिति: मंगलबार, मंसिर १३, २०७९ १८:१४