सिक्लेसका चिबा मनबहादुरः मदन भण्डारीलाई सुनेपछि कम्युनिस्ट, दोस्रोपटक संसद

सिक्लेसका चिबा मनबहादुरः मदन भण्डारीलाई सुनेपछि कम्युनिस्ट, दोस्रोपटक संसद

A+ A A-

कास्कीको ताङतिङ गाउँका मास्टर जसबहादुर गुरुङ ठिटालाई कम्युनिस्ट बनाउन २०३० को दशकदेखि नै सक्रिय थिए । भर्खरको केटा भेटेपछि जसबहादुर कम्युनिस्ट सिद्धान्त, विचार सुनाउँथे, बुझाउँथे । उनले त्यतिबेला कम्युनिस्ट बनाएकाहरू आज वडादेखि संसद भवनसम्म पुगेका छन् ।

जसबहादुरले कम्युनिस्ट बनाएकामध्ये एक हुन् सिक्लेसका मनबहादुर गुरुङ । मनबहादुर गत ४ मंसिरको चुनावमार्फत कास्की १ बाट प्रतिनिधिसभा सदस्य निर्वाचित भएका छन् । उनी नेकपा एमालेबाट प्रतिनिधिसभा सदस्य उम्मेदवार थिए ।

दोस्रोपटक संसद छिर्न लागेका मनबहादुरको कम्युनिस्ट हुनुको यात्राका किस्सा भने गज्जबका छन् । त्यतिबेला भर्खर २३-२४ वर्ष पुगेका मनबहादुरलाई कम्युनिस्ट बनाउन जसबहादुर दुई दिन उनकै घरमा बसेका थिए । ‘सिक्लेसमा एउटा केटा छ भन्ने थाहा पाएपछि म गएँ,’ जसबहादुर सम्झन्छन्, ‘दुई रात बसेर फकाएपछि उसले हुन्छ भन्यो । अनि मैले मालेको सदस्यता दिएँ ।’

गुरुङ गाउँ सिक्लेसको एउटा टोल गैरीथरका मनबहादुर मुखिया परिवारका सन्तान हुन् । गन्नेमान्ने परिवारमा २०२३ साल १ वैशाखमा जन्मिएका उनका दाजुभाइ लाहुरे भए । उनी गाउँतिरै बसे । पार्टी संगठनलाई बलियो बनाउने जिम्मा बोकेका जसबहादुर मनबहादुर टाठा छन् भन्ने सुनेपछि उनको घर पुगेका थिए । ‘मैले त्यतिबेला मदन भण्डारीले गरेको भाषणको क्यासेट लिएर गएको थिएँ । त्यो सुनाएर कम्युनिस्ट भनेको यस्तो हो भनेँ । त्योसहित अरु विभिन्न कारणले ऊ पार्टीमा आउन तयार भयो । यो बहुदल आएपछि २०४७ सालतिरको कुरा हो,’ जसबहादुर सुनाउँछन् ।

मदन भण्डारीको भाषण सुनेर प्रभावित भएका मनबहादुर त्यसपछि गाउँमा पार्टीका काममा सक्रिय भए । त्यतिबेला राजनीति गर्नेहरू कम हुन्थे । २०५४ सालमा चुनाव हुँदै थियो । मनबहादुरले गाविस अध्यक्षको टिकट पाए । २०५४ सालमा कास्कीको तत्कालीन पार्चे गाविसको अध्यक्ष जिते ।

गुरुङ भाषामा गन्नेमान्ने मान्छेलाई ‘चिबा’ भन्छन् । मुखियाको सन्तान, गाविस अध्यक्ष र माननीय पनि भएकाले मनबहादुरलाई सिक्लेसीहरू चिबा भनेरै बोलाउँछन् । २०७४ सालको चुनावमा प्रदेश सांसद भएका यी सिक्लेसी नेता यसपटक प्रतिनिधिसभा सदस्य चुनिएका छन् । मनबहादुर पार्टीको कास्की जिल्ला अध्यक्ष हुन् । उनी इलाका कमिटी, गाउँ कमिटी, जिल्ला कमिटी सदस्य, उपाध्यक्ष हुँदै अध्यक्ष बनेका हुन् । २०५९ सम्म पाँच वर्ष पार्चे गाविसको अध्यक्ष भएका उनी त्यसपछि अन्नपूर्ण संरक्षण क्षेत्रको सिक्लेस क्षेत्रको प्रमुख बनेका थिए ।

२०६४ र २०७० को चुनावमा पार्टीका उम्मेदवारलाई जिताउन कस्सिए । २०७४ सालमा उनले गण्डकी प्रदेशसभा सदस्यको टिकट पाए । मनबहादुर कास्की १ 'ख' बाट प्रदेशसभा सदस्य निर्वाचित भएका थिए । मनबहादुरलाई प्रदेश होस् वा संघको चुनाव एउटा कुरा समान भएको छ । उनको दुवै चुनावमा प्रतिस्पर्धी कांग्रेस जिल्ला सभापति परेका छन् र दुवै चुनाव मनबहादुरले जितेका छन् ।

२०७४ सालमा उनले नेपाली कांग्रेसका तत्कालीन जिल्ला सभापति कृष्णबहादुर केसीलाई ४ हजार १४७ मतान्तरले हराएका थिए । त्यो चुनावमा मनबहादुरले १७ हजार २४९ र कृष्णले १३ हजार १०२ मत पाएका थिए । यतिबेला भने मनबहादुर एमालेको जिल्ला अध्यक्ष भइसकेका थिएनन् ।

गत ४ मंसिरको कास्की १ को प्रतिनिधिसभाको चुनाव अझ रोचक थियो । किनकि यो निर्वाचन क्षेत्रमा दुई ठूला पार्टी एमाले र कांग्रेसका जिल्ला नेतृत्व चुनावी मैदानमा थिए । एमाले जिल्ला अध्यक्षसमेत रहेका मनबहादुरले कांग्रेस कास्की जिल्ला सभापति किशोरदत्त बराललाई २ हजार ५१९ मतान्तरले पराजित गरेका हुन् । गुरुङले २५ हजार ७०८ र बरालले २३ हजार १८९ मत पाएको निर्वाचन आयोगले जनाएको छ ।

स्थानीय तहमा वडाध्यक्षले पाएको मत हेर्दा कास्की १ मा गठबन्धन ६ हजार मतले अगाडि थियो । तर, मनबहादुरले त्यो नतिजा उल्ट्याएर साढे २ हजार मतले प्रतिस्पर्धीलाई हराएर संसदको यात्रा तय गरेका छन् ।

प्रकाशित मिति: मंगलबार, मंसिर १३, २०७९ १६:३१