प्रत्यक्ष चुनाव जितेर पहिलोपटक संसद छिर्दैछन् यी नयाँ अनुहार

A+ A A-

प्रतिनिधिसभा सदस्य निर्वाचनको अन्तिम मतपरिणाम १६५ मध्ये १६१ स्थानको आएको छ । दोलखाका केही केन्द्रमा फेरि मतदान हुने भएको छ भने स्याङ्जा २ र बाजुराको मतगणना हुन बाँकी छ । सुनसरी ४ को मत गणना जारी छ ।

अहिलेसम्म अन्तिम मतपरिणाम आएकामध्ये कांग्रेसले सबैभन्दा बढी ५४ सिट जितेको छ । दोस्रो स्थानमा रहेको एमालेले ४४ सिट जित्दा माओवादी केन्द्र १७, नेकपा एकीकृत समाजवादीले १०, राष्ट्रिय स्वतन्त्र पार्टी, राप्रपा र जसपाले ७-७ सिट जितेका छन् ।

लोसपाले चार, नागरिक उन्मुक्ति पार्टीले ३, जनमत पार्टी, नेपाल मजदुर किसान पार्टी र राष्ट्रिय जनमोर्चाले १-१ सिट जितेका छन् । रौतहट २ र ३, सर्लाही ४, बर्दिया २ र मोरङ ५ मा स्वतन्त्र उम्मेदवारले जितेका छन् । यसपटकको निर्वाचनबाट कसैले नचिताएको परिणाम आएको राजनीतिक दल र विश्लेषकहरू बताउँछन् । यो चुनवाबाट दुई नयाँ दल राष्ट्रिय स्वतन्त्र पार्टी र जनमत पार्टीले प्रतिनिधिसभामा प्रतिनिधित्व गर्दैछन् । रास्वपा र जनमत पार्टीबाहेक अन्य दलबाट पनि नयाँ अनुहार संसदमा पुगेका छन् । राजनीतिमा सधैँ पुराना अनुहारप्रति यो पटक मतदाताले फरक निर्णय गरेका छन् । सकेसम्म नयाँ र पुराना दलका नयाँ अनुहारलाई मत दिएर मतदाताले संसदमा पठाएका छन् ।

कांग्रेस महामन्त्री विश्वप्रकाश शर्मा, एमालेका ठाकुर गैरेदेखि राष्ट्रिय स्वतन्त्र पार्टीका सभापति रवि लामिछानेसम्मले पहिलोपटक संसदको यात्रा तय गरेका छन् । कांग्रेसका प्रदीप पौडेल, एमालेका महेश बर्तौला, माओवादी केन्द्रका सुबोध सापकोटा, नागरिक उन्मुक्ति पार्टीकी रञ्जिता श्रेष्ठ, रास्वपाकी तोसिमा कार्की र सोविता गौतमसम्मका युवाहरूलाई मतदाताले संसदमा पठाएका छन् ।

१. विश्वप्रकाश शर्मा

झापा १ बाट चुनाव जितेका विश्वप्रकाश शर्मा नेपाली कांग्रेसका महामन्त्री हुन् । उनी २०७० र २०७४ को चुनावमा पराजित भएका थिए । एमालेका अग्नि खरेललाई पराजित गर्दै तेस्रो प्रयासमा पहिलो पटक संसदको ढोका खोल्न सफल भएका हुन् ।

२. लेखनाथ दाहाल (राजन)

सिन्धुली २ बाट प्रतिनिधिसभा सदस्यमा निर्वाचित लेखनाथ दाहाल माओवादी केन्द्रका नेता हुन् । माओवादीका युवा नेता दाहाल पहिलो पटक संघीय संसदमा छिरेका हुन् । उनले एमालेका मनोजजंग थापालाई पराजित गर्दै संसदको यात्रा तय गरेका हुन् । अघिल्लो पटक प्रदेशसभा सदस्य भएका उनी पहिलो पटक प्रतिनिधिसभा सदस्यमा निर्वाचित भएका हुन् ।

३.महेश बर्तौला

एमालेका युवा नेता महेश बर्तौलाले मकवानपुर २ बाट चुनाव जितेका छन् । आफ्ना राजनीतिक गुरु नेकपा एकीकृत समाजवादीका विरोध खतिवडालाई पराजित गरेर एमालेका बर्तौलाले संसदको यात्रा तय गरेका हुन् । अनेरास्ववियुको राजनीतिबाट पार्टी राजनीतिमा आएका बर्तौलाको यो पहिलो चुनावी अनुभव पनि हो । उसो त उनले अखिलको अध्यक्ष हुन चाहेका थिए । तर, अध्यक्ष हुन पाएनन् । एमालेबाट उम्मेदवार बनेका उनलाई मतदाताले सांसद बनाएर पठाएका हुन् ।

४. शिशिर खनाल

राष्ट्रिय स्वतन्त्र पार्टीबाट चुनाव जितेका शिशिर खनालको पहिलो संसद यात्रा हो । काठमाडौं ६ मा एमालेका सर्वेन्द्र खनाल र कांग्रेसका भीमसेनदास प्रधानलाई पराजित गर्दै रास्वपाका खनालले संसदको ढोका खोलेका हुन् । चुनाव हुनुभन्दा पाँच महिना अघि स्थापना भएको रास्वपाले छोटो समयमै काठमाडौं निर्वाचन क्षेत्र नम्बर २, ६, ७, ८ र ललितपुरको ३ मा जित हासिले गरेको हो ।

५. गणेश पराजुली

काठमाडौं ७ बाट राष्ट्रिय स्वतन्त्र पार्टीका युवा नेता गणेश पराजुलीले चुनाव जितेका छन् । उनी पनि युवा र नयाँ अनुहार हुन् । पूर्वप्रधानमन्त्री डा. बाबुराम भट्टराईकी छोरी मानुषी यमी भट्टराई र एमालेका श्याम कुमार घिमिरेलाई पराजित गर्दै रास्वपाका पराजुलीले पहिलो पटक संसदको यात्रा तय गरेका हुन् ।

६. रवि लामिछाने

चितवन २ बाट चुनाव जितेका रवि लामिछाने लामो समय पत्रकारिता गरेका व्यक्ति हुन् । पत्रकारिता छोडेर राष्ट्रिय स्वतन्त्र पार्टी स्थापना गरेका लामिछाने उक्त पार्टीको सभापति हुन् । रविले एमालेका कृष्णभक्त पोखरेल र बहालवाला राज्यमन्त्री उमेश श्रेष्ठलाई पराजित गर्दै संसदको यात्रा तय गरेका हुन् । उनको पार्टीले छोटो समयमा नै सफलता प्राप्त गरेको छ । उनका लागि पनि संसदको यात्रा पहिलो र नौलो हुनेछ ।

७. हरि ढकाल

चितवन १ बाट राष्ट्रिय स्वतन्त्र पार्टीका हरि ढकाल निर्वाचित भएका छन् । एमाले उपाध्यक्ष तथा पूर्वअर्थमन्त्री सुरेन्द्र पाण्डे र कांग्रेस नेता विश्वनाथ पौडेललाई पराजित गर्दै ढकालले संसदको ढोका खोलेका हुन् । उनी पनि राजनीति र संसदका लागि नयाँ अनुहार हुन् ।

८. ठाकुर गैरे

एमालेका युवा नेता ठाकुर गैरे पहिलो पटक संसदमा पुगेका छन् । संसदीय निर्वाचनमै पहिलो पटक भिडेका गैरेले एकीकृत समाजवादीका सोमप्रसाद पाण्डेलाई पराजित गर्न सफल भए । पाण्डे एमाले छोडेर एकीकृत समाजवादीमा लागेका नेता हुन् । यसअघिका चुनावमा पाण्डेलाई जिताउन लाग्ने गैरे यसपटक उनकै प्रतिद्वन्द्वी बने । अखिलको अध्यक्षसमेत भएका गैरे राजनीतिमा पुराना भए पनि संसदको अनुभव भने पहिलो हुनेछ । उनले पाल्पा २ बाट चुनाव जितेका हुन् ।

९.सूर्य थापा

नेकपा एमालेका युवा नेता सूर्य थापाले प्युठानबाट पहिलो पटक चुनाव जितेका छन् । उनको पनि संसदको यात्रा पहिलो हो । एमाले अध्यक्ष केपी शर्मा ओलीनिकट मानिने थापाले सत्ता गठबन्धनका तर्फबाट उम्मेदवार बनेकी राष्ट्रिय जनमोर्चाकी उपाध्यक्ष दुर्गा पौडेललाई पराजित गरेर संसदको ढोका खोलेका हुन् ।

१०. डा. तोसिमा कार्की

राष्ट्रिय स्वतन्त्र पार्टीकी नेतृ डा. तोसिमा कार्की ललितपुर ३ बाट निर्वाचित भइन् । कार्कीले बहालवाला ऊर्जामन्त्री पम्फा भुसाल र एमालेकी अमृत खड्कालाई पराजित गर्दै संसदको ढोका खोलेकी हुन् । तोसिमा डाक्टरी पेसा छोडेर राजनीतिमा आएकी हुन् । उनी लामो समयसम्म डा. गोविन्द केसीको आन्दोलनसँग पनि जोडिएकी थिइन् । उनको पनि संसदको पहिलो यात्रा हो ।

१२.सोविता गौतम

रास्वपाकी केन्द्रीय सदस्य सोविता गौतम काठमाडौं २ बाट निर्वाचित भइन् । पूर्वसभामुख ओनसरी घर्तीलाई हराएर २७ वर्षको उमेरमै संसदको यात्रा तय गर्न सफल भएकी हुन् । भ्रष्टाचारको मुद्दा उठाएर चुनाव जितेकी गौतमको पनि राजनीति र संसदको यात्रा नौलो नै हो ।

१३. ज्ञानेन्द्र शाही

सामाजिक अभियन्ता हुँदै राप्रपा छिरेका ज्ञानेन्द्र शाहीले जुम्लाबाट चुनाव जितेका छन् । भ्रष्टाचार विरोधी आन्दोलन चलाउँदै आएका शाहीको पनि संसदको यात्रा पहिलो हो । शाहीले माओवादी केन्द्रकी गोमा गौतम कुँवर र एमालेका रतननाथ योगीलाई पराजित गर्दै संसद छिर्ने बाटो खोलेका हुन् ।

१४.धवल शमशेर राणा

राप्रपाका महामन्त्री धवल शमशेर राणाले बाँके २ बाट चुनाव जितेका छन् । राणाले जसपाका मोहम्मद इश्तियाक राई र कांग्रेसकासुदीप नरसिंह राणालाई पराजित गर्दै संसदको ढोका खोलेका हुन् । नेपालगञ्ज उपमहानगरपालिकाको मेयर भइसकेका राणाको संसदको यात्रा भने पहिलो हो ।

१५. दीपक सिंह

मकवानपुर १ बाट चुनाव जितेका दिपक सिंहको पनि संसद यात्रा पहिलो नै हो । गत वैशाख ३० मा सम्पन्न स्थानीय तहको चुनावमा हेटौँडा उपमहानगरपालिकाको मेयरमा पराजित भएका थिए सिंह । कांग्रेसकी महालक्ष्मी उपाध्याय डिना र राप्रपा नेपालका कमल थापालाई पराजित गर्दै सिंह संसदको ढोका खोल्न सफल भएका हुन् ।

१६. प्रदीप पौडेल

तनहुँबाट काठमाडौं आएर चुनाव जितेका नेता हुन् कांग्रेसका प्रदीप पौडेल । काठमाडौं ५ मा एमालेका वरिष्ठ उपाध्यक्ष ईश्वर पोखरेललाई पराजित गर्दै पौडेलले पहिलो पटक संसदको यात्रा तय गरेका हुन् । नेविसंघका पूर्वअध्यक्ष पौडेल २०७४ सालको चुनावमा प्रदेशसभाको चुनाव लडेका थिए । तर, पाँच मतले पराजित भएका थिए । पराजित भएपछि पौडेलले सर्वोच्च अदालतमा मुद्दा दर्ता गरेका थिए । तर, त्यो मुद्दाको फैसला नहुँदै पौडेल काठमाडौं ५ बाट प्रतिनिधिसभा सदस्यमा निर्वाचित हुन सफल भए ।

१७. रञ्जिता श्रेष्ठ

कैलाली १ बाट नागरिक उन्मुक्ति पार्टीकी रञ्जिता श्रेष्ठ निर्वाचित भएकी छन् । उनी पार्टी अध्यक्ष पनि हुन् । कांग्रेसका रामजनम चौधरीलाई पराजित गरेर श्रेष्ठ पहिलो पटक संसदमा पुगेकी हुन् । श्रेष्ठ रेशमलाल चौधरीकी पत्नी हुन् । जेलभित्र बसेका रेशमले श्रीमतीका नाममा नयाँ पार्टी खोल्न लगाएर चुनावमा पठाएका थिए । यो पार्टीले प्रत्यक्षमा तीन सिट जितेको छ ।

१८. सीके राउत

सीके राउत जनमत पार्टीबाट सप्तरी क्षेत्र नम्बर २ बाट प्रतिनिधिसभा सदस्यमा निर्वाचित भएका छन् । राउत जनमत पार्टीका अध्यक्ष पनि हुन् । चुनाव जितिसकेपछि किसानको मुद्दालाई प्राथमिकताका साथ उठाउने उनले बताएका छन् । कुनै समय देश टुक्र्याउने भन्दै विखण्डकारी नारा बोकेका राउत अहिले भने चुनाव जितेर संसदमा पुगेका छन् । उनी पनि पहिलो पटक संसद छिर्दैछन् ।

१९. महेश बस्नेत

इलाम १ बाट निर्वाचित एमालेका महेश बस्नेतले प्रतिनिधिसभाको चुनाव जितेका छन् । बस्नेतले नेकपा एकीकृत समाजवादीका नेता झलनाथ खनाललाई पराजित गर्दै संसदको ढोका खोलेका हुन् । खनाल एमालेका पूर्वअध्यक्ष पनि हुन् । पार्टी विभाजन हुँदा खनाल एमाले छोडेर एकीकृत समाजवादीतिर लागेका हुन् । बस्नेत २०७४ को स्थानीय निर्वाचनमा इलाम नगरपालिकाको मेयरमा पनि विजयी भएका थिए । बस्नेतले मेयर भएर काम गर्दा स्थानीयबीच राम्रै सम्बन्ध बनाएकाले प्रतिनिधि सभाको चुनाव जितेको बताइन्छ ।

प्रकाशित मिति: बुधबार, मंसिर १४, २०७९ १३:५१