गच्छदारको संसदीय रेकर्डमा भगवतीले लगाएको ब्रेक

A+ A A-

विराटनगर, नेपाली कांग्रेसको संगठन विस्तारको ‘हेडक्वार्टर’ । जसले प्रजातन्त्रको जग बसाउने काम गर्‍यो । त्यही विराटनगरको ८-१० किलोमिटर उत्तरमा दुहबी बजार छ । थारू बाहुल्य उक्त क्षेत्रमा २० को दशकमा ‘थारू’ समुदायबाट उतिबेला न त ठूला राजनीतिक व्यक्ति थिए, न थारू समुदायको उत्रो ठूलो राजनीतिक ‘स्पेस’ नै ।

प्रजातन्त्रलाई राजा महेन्द्रले ‘कु’ गरेपछि हक्की स्वभावको थारू युवा कांग्रेसमा आवश्यक थियो । प्रजातन्त्र पुनर्स्थापना गर्न थारू समुदायको समर्थन खोजेको त्यो बेलाको ट्युनिङ मिल्ने पात्र निस्किए, विजयकुमार गच्छदार । विराटनगरको महेन्द्र मोरङ क्याम्पसको राजनीतिका कारण तत्कालीन कोइराला निवाससँग गच्छदार नजिक थिए ।

पञ्चायतकालमा गिरिजाप्रसाद कोइराला भारत निर्वासनमा जाँदा गच्छदार पनि भारत पुगेका थिए । उनी २०३५ मा कोइरालासँगै नेपाल फर्किए । त्यति बेलादेखि नै गच्छदार पार्टीको मूल राजनीतिमा सक्रिय भए । बिस्तारै राजनीतिक घटनाक्रम फेरियो । पञ्चायती व्यवस्था ढल्यो । बहुदल आयो, र चुनाव हुने भयो । महेन्द्र मोरङ क्याम्पसको राजनीति र कोइराला परिवारसँगको निकटताले गच्छदारलाई फाइदा भयो । २०४८ को प्रतिनिधिसभा निर्वाचनमा गच्छदारलाई कांग्रेसले सुनसरीबाट उम्मेदवार बनायो र उनी विजयी भए ।

२०४८ देखि २०७४ सम्म प्रत्यक्ष सांसद, योपल्ट ब्रेक

बहुदल आएपछि कांग्रेसको कोइराला परिवारसँगको निकटता विजयकुमार गच्छदार संसदीय राजनीतिमा प्रयोग गरे । गच्छदार संसदीय सत्ताको हस्ती बन्न सहयोग सुरुवाती अवस्थामा कोइराला परिवारले गर्‍यो । सुरुवाती अवस्थामा कोइराला परिवार नजिक रहेर राजनीति गरेका गच्छदारले कांग्रेसभित्र आफैँ शक्ति आर्जन गर्दै गए । जसले गर्दा २०४८ देखि २०७४ सम्म लगातार प्रत्यक्ष निर्वाचन जितेर सदनमा उपस्थित हुने दुई व्यक्तिमध्ये एक व्यक्ति बन्न सफल भएका थिए गच्छदार ।

योपटकको निर्वाचनमा भने गच्छदारको लगातार चुनाव जितेर सांसद बन्ने इतिहासलाई शेरबहादुर देउवाले उछिनेका छन् । २०७९ को प्रतिनिधिसभा निर्वाचनमा सागर ढकाललाई पराजित गर्दै सातौँपटक शेरबहादुर देउवा सांसद हुँदा भगवती चौधरीसँग पराजित भएपछि गच्छदारको संसदीय राजनीतिको रेकर्डमा ब्रेक लागेको छ ।

भगवती चौधरीलाई पछिल्ला दुई निर्वाचनमा झिनो मतले पराजित गरेका गच्छदार योपटक भने फराकिलो मतले आफैँ पराजित भएका छन् । २०७० को दोस्रो संविधानसभामा ३६२ र २०७४ को प्रतिनिधिसभा निर्वाचनमा गच्छदारले ३२१ मतले भगवतीलाई पराजित गरेका थिए ।

तर, योपटक भने गच्छदारलाई भगवतीले तेस्रोपटकमा पराजित गर्दै प्रतिनिधिसभाको यात्रा तय गरेकी छन् । यससँगै लामो संसदीय राजनीतिका खेलाडी गच्छदारको रेकर्डमा पनि ब्रेक लगाइदिएकी छिन् ।

३८ वर्षमा पहिलोपटक सांसद, ६९ वर्षमा ब्रेक

पहिलोपटक २०४८ सालमा गच्छदार सांसद बने । जति बेला गच्छदारको उमेर ३८ वर्षको थियो । ३८ वर्षमा पहिलोपटक सांसद बनेका गच्छदार ६९ वर्षमा भने रिटायर भएका छन् ।

युवा अवस्थामै संसद्‌यात्रामा लागेका गच्छदार अहिलेसम्म १२ पटक मन्त्रीसमेत भइसकेका छन् । २०४८ सालमा सुनसरी २ बाट एमालेका लीला श्रेष्ठलाई सानदार मतले पराजित गर्दै संसद्को यात्रा सुरु गरेका गच्छदारले निर्वाचनमा कहिल्यै पछाडि फर्कनुपरेन । २०४८ मा लीला श्रेष्ठले १५ हजार ८८५ मत ल्याउँदा गच्छदारले २७ हजार ७७५ मत ल्याएर निर्वाचित भएका थिए ।

२०४८ को प्रतिनिधिसभा २०५१ मा भङ्ग भयो । र, २०५१ मै मध्यावधि चुनाव भयो । त्यतिबेला गच्छदारले सुनसरी २ बाटै एमालेका कुलदीप पेशकरलाई हराए । कुलदीपले १० हजार ७०८ मत ल्याउँदा कांग्रेसबाट उठेका गच्छदारले २१ हजार ९६३ मत ल्याएका थिए ।

२०५६ को चुनावमा पनि गच्छदारको विजय भयो । तत्कालीन इटहरी नगरपालिकाको उपप्रमुखबाट राजीनामा दिएर प्रतिनिधिसभाको चुनाव भिड्न आएका रेवती रमण भण्डारीलाई गच्छदारले ४ हजार १८८ मतले पराजित गरे । एमालेका भण्डारीले २३ हजार ३३९ मत ल्याउँदा गच्छदारले २७ हजार ५२७ मत ल्याएका थिए ।

लगातार तीनवटा निर्वाचन कांग्रेसबाट जितेका गच्छदार २०६४ को पहिलो संविधानसभा भने तत्कालीन मधेसी जनअधिकार फोरमबाट निर्वाचित भए । उपेन्द्र यादवसँग मिलेर बनाएको फोरमबाट गच्छदारले २०६४ मा कांग्रेसका उम्मेदवार अगमलाल चौधरीलाई दोब्बरभन्दा बढी मतले पराजित गरेका थिए । गच्छदारले २३ हजार ७ सय ६९ भोट पाउँदा कांग्रेसका चौधरीले १० हजार ८ सय ६ मत पाएका थिए ।

प्रकाशित मिति: मंगलबार, मंसिर १३, २०७९ १९:११