५ प्रतिशत मत बदर, १ प्रतिशमा झार्ने आयोगको प्रक्षेपण फेल

A+ A A-

४ मंसिरमा भएको प्रतिनिधिसभाको चुनावमा प्रत्यक्षतर्फ ५.०५ प्रतिशत मत बदर भएको छ । सोमबार दिउँसोसम्म निर्वाचन आयोगमा १५३ वटा निर्वाचन क्षेत्रबाट आएको रिपोर्ट अनुसार ५.०५ प्रतिशत अर्थात् ५ लाख १३ हजार ३ सय ५३ मत बदर भएको हो ।

दोलखा, स्याङ्जा, बाजुरा र अन्तिम मत परिणाम नआएका गरी १२ वटा निर्वाचन क्षेत्रको मत यसमा समावेश गरिएको छैन । आयोगले १५३ क्षेत्रको मत परिणामअनुसार ६१.४८ प्रतितश मत खसेको जनाएकाे छ । मतगणना सकिएका निर्वाचन क्षेत्रमा १ करोड ६५ लाख २३ हजार १६३ मतदाता रहेकोमा १ करोड १५ लाख ९ हजार ५७ जना मतदाताले मतदान गरेका छन् ।

जसमा ९६ लाख ४५ हजार ७०४ मत अर्थात् ९४.९५ प्रतिशत मत सदर भएको छ । कुल मतदाता भने १ करोड ७९ लाख ८८ हजार ५७० रहेका छन् । प्रतिनिधिसभाको समानुपातिक, प्रदेशतर्फको प्रत्यक्ष र समानुपातिकको मतगणना अझै जारी रहेकाले कहाँ कति मत बदर भयो, कति मत खस्यो भन्ने प्राप्त भएको छैन ।

आयोगको प्रक्षेपण फेल

गत २०७४ मा भएको चुनावमा भन्दा यसपटक ०.१३ प्रतिशतले बदर मत घटेको छ । अघिल्लो चुनावमा प्रतिनिधिसभाको प्रत्यक्षतर्फ ५.१८ प्रतिशत मत बदर भएको थियो । निर्वाचन आयोगले यसपटक १ प्रतिशतभन्दा कम मत मात्र बदर गर्ने लक्ष्य लिएको थियो । तर पूरा हुन सकेन ।

‘यसपटक मतपत्र र मतदान गर्ने तरिका पनि सजिलो छ । योपटक १ प्रतिशत पनि मत बदर हुँदैन,’ प्रमुख आयुक्त दिनेशकुमार थपलियाले भनेका थिए । तर उनको प्रक्षेपण भन्दा ४.०५ प्रतिशत बढी मत बदर भएको छ ।

अन्तिम परिणाम आउँदा थपघट हुनसक्छ

हालसम्मको रिपोर्टअनुसार ५.०५ प्रतिशत मत बदर भए पनि पुनः मतदान हुन लागेको ठाउँको र अन्तिम मतपरिणाम आउन बाँकी रहेका क्षेत्रको विवरण प्राप्त हुँदा थपघट हुनसक्ने आयोगको अनुमान छ । ‘जिल्ला जिल्लाबाट प्रविष्ट हुनेक्रम जारी छ । यसमा थपघट हुन्छ । यो अन्तिम परिणाम होइन,’ आयोगका एक अधिकारीले भने ।

मतदाता शिक्षाको बजेट बर्सेनि खेर

निर्वाचन आयोगले मतदाता शिक्षाका लागि यो वर्ष ५० करोड बजेट छुट्याएको छ । प्रत्येक वर्ष यसरी नै मतदाता शिक्षाका लागि बजेट छुट्याइन्छ तर बदर मत घटेको छैन । यसपटक आयोगले वडास्तरबाट मतदाता शिक्षा, समुदायस्तर/घरदैलो कार्यक्रम, मतदाता शिक्षा घुम्ती टोली र नमुना मतदान पनि गर्‍याे । सामाजिक सञ्जालबाट पनि मतदाता शिक्षाका सामग्री आयोगले प्रकाशन/प्रशारण गरेको थियो । तर मत बदर कम हुन सकेन ।

बदर हुँदा जित्नेले हार्छ, हार्नेले जित्छ : पूर्वआयुक्त दोलखबहादर गुरूङ

मत बदर हुनु दुःखद कुरा हो । ५ प्रतिशत बदर हुँदा जित्नुपर्ने उम्मेदवारले हार्ने र हार्नुपर्ने उम्मेदवारले जित्ने स्थिति हुन्छ । सयसले निर्वाचन आयोग, सरकार, राजनीतिक दल र उम्मेदवारले मतलातालई राम्रोसँग शिक्षा दिन नसकेको स्पष्ट हुन्छ । यसपटक मत बदर हुनुमा दलहरूको गठबन्धनको पनि हात छ । मतदाताले नबुझेर मात्र होइन जान्ने बुझ्नेबाट पनि आफ्नो आस्थाअनुसार मतदान गर्न नपाएपछि अन्यत्रै हालेको छ । त्यसैले आगामी चुनावमा मत बदर हुन नदिन ई– भोटिङमा जानुपर्छ । यसतर्फ आयोग, सरकार र दलहरूले तत्काल पहल गर्नुपर्छ ।
सम्बन्धित समाचार