श्रीमान्‌‌को किरिया सकिएको छैन, उठिबास लगाउन महानगरको डोजर आयो

A+ A A-

'बुढा, हामी काठमाडौं जाऊँ, जहाँ गरे पनि ज्यामी काम नै गर्ने त हो ।'

पवित्रा रनपहेलीले आफ्नो श्रीमान्‌लाई यसो भनेपछि सँगै रहेका छोराछोरीको अनुहार हेरेर श्रीमान्‌ले पनि सहमति जनाए ।

बच्चाबच्चीलाई मामाघर छोडेर रनपहेली दम्पती १९ वर्षअघि मोरङबाट काठमाडौं हानिए । ‘पथरीमा शरणार्थी क्याम्प थियो । क्याम्पमा बस्ने शरणार्थीहरूले हामीले भन्दा आधा पैसामा मजदुरी गर्दिन्थे । छोराछोरीलाई दुई छाक टार्न पनि मुस्किल भएपछि काठमाडौं आयौँ,’ पवित्राले भनिन् ।

काठमाडौं आएर दुवै जनाले ज्यामी काम पाए । त्यसपछि छोराछोरी पनि काठमाडौं ल्याए । त्यसको केही समयपछि थापाथली खोला किनारमा बस्तीबस्दा उनीहरू पनि त्यहीँ आए ।

‘यहाँ अस्पतालको फोहोर र नर्कट घारीबाहेक केही थिएन । बुढा र मैले सफा गरेर एउटा टहरा बनायौँ,’ उनले भनिन् । अहिले त्यही टहरा महानगरले भत्काउने त्रास छ उनीहरूलाई । ५३ वर्षको उमेरमै श्रीमान्‌को साथ गुमाउँदा आएको आँसु पुछ्न पनि नपाउँदै घर गुमाउनुपर्ने डरमा पवित्रा छिन् ।

‘बुढा लालपुर्जा पाउने आसैआसमा बित्नुभएको आज ८ दिन भयो । आज उहाँको गरुडपुराण सुन्दासुन्दै महानगर डोजर लिएर आयो र भत्काउन थाल्यो,’ उनले भनिन्, ‘किरिया पनि गर्न नदिने यो कस्तो सरकार हो ? भएको अलिअलि पैसा पनि बुढालाई ५ दिन नर्भिक अस्पतालमा राख्दै सकियो । यो टहरा महानगरले भत्कायो भने बनाउन सक्ने तागत पनि छैन ।’

उनीहरूले यो समस्या अहिले मात्र भोगेका होइनन्, डा. बाबुराम भट्टराई प्रधानमन्त्री हुँदा २०६८ सालमा पनि उनको टहरा भत्काइयो । जसोतसो जोडजाम गरेर फेरि टहरा सखारेर बसे । आफूहरूलाई कुनै विकल्प नै नदिई १८/१९ वर्षदेखि बसिरहेको स्थानबाट हटाउन खोज्नुमा पवित्राको चित्त दु:खाइ छ ।

‘हामीले धेरै ठूलो माग गरेकै होइन, एउटा टहरा बनाउन माटो दिए पुग्छ,’ उनले भनिन्, 'सरकारले हामी सुकुम्बासीलाई नागरिक नै मानेन ।'

‘सरकाले शरणार्थीलाई त बास दिन्छ । हामी त झन् यही देशका नागरिक हौँ, निकाल्ने ? हाम्रो जाने ठाउँ नै छैन । हामीलाई कसले दिने कोठा ? बच्चाहरूलाई कहाँ राख्ने ? बरु हामीलाई सिधै गोली हानेर बिनाजनताको शहर बनाए हुन्छ,’ उनले भनिन् ।

उनको त्यो छाप्रोले आठ जना परिवारको ज्यानलाई ओत मात्रै दिएको छैन, छोराछोरी आँगनमा खेलेको, विवाहको रमझम, श्रीमान्‌को लास उठाउँदाको पीडालगायत थुप्रै दु:ख र सुखका यादहरूसमेत बोकेको छ ।

तस्वीरहरू : सुशील श्रेष्ठ/शिलापत्र

प्रकाशित मिति: सोमबार, मंसिर १२, २०७९ १९:२३