प्रदेश १ का चार 'हाई प्रोफाइल' क्षेत्र, जहाँ अझै सकिएन मतगणना

A+ A A-

प्रतिनिधिसभाको प्रत्यक्षतर्फ प्रदेश १ को लगभग मतपरिणाम आएको छ । प्रदेश १ का २८ क्षेत्रमध्ये २४ स्थानको मतपरिणाम सार्वजनिक भएको छ । तर, यो प्रदेशका चार क्षेत्रको भने अझैसम्म मतगणना सम्पन्न भएको छैन ।

परिणाम सार्वजनिक भएका २४ स्थानमध्ये प्रदेश १ मा पहिलो दल एमाले भएको छ । एमालेले १२ क्षेत्र जित्दा कांग्रेसले सात, माओवादी केन्द्रले तीन, राप्रपाले एक र स्वतन्त्रले एक स्थानमा जित निकालेका छन् । गणना बाँकी रहेका चार क्षेत्रका दुई ठाउँमा कांग्रेस र दुई ठाउँमा एमालेको अग्रता छ ।

पाँचथर

पाँचथरमा एमालेका प्रभावशाली नेता वसन्त नेम्वाङ र कांग्रेसका सहमहामन्त्री भीष्मराज आङ्देम्बे मुख्य प्रतिस्पर्धी छन् । यो क्षेत्रको मतगणना अझै सकिएको छैन ।

प्रत्यक्षतर्फको मतपेटिकाको गणना सकिँदा ४७ मतले एमालेका नेम्वाङ अघि थिए । तर, समानुपातिकतर्फको मतपेटिकामा समेत प्रत्यक्षतर्फको मत भेटिएपछि मतगणना अझै चलिरहेको छ ।

सुनसरी- ३

कांग्रेसका हेबिवेट नेता विजयकुमार गच्छदारको निर्वाचन क्षेत्र सुनसरी ३ मा पनि अझै मतगणना जारी छ । एमालेकी नेतृ भगवती चौधरीसँग प्रतिस्पर्धामा रहेका गच्छदार झण्डै ४ हजार ५ सयभन्दा बढी मतले पछाडि परेका छन् ।

२०७० र २०७४ को निर्वाचनमा धाँधली गरेर चुनाव जितेको आरोप गच्छदारलाई लाग्ने गरेको छ । त्यही कारण योपटक भने सुरक्षा व्यवस्था कडा पारेर मतगणना गरिएको छ ।

सुनसरी क्षेत्र नम्बर ३ का निर्वाचन अधिकृत उमानाथ पौडेल भने संवेदनशील क्षेत्र भएकाले संयमित भएर मतगणना गरिएको बताउँछन् । 'गणनास्थल थपेर छिट्टै सक्ने योजना थियो । तर, राजनीतिक दलहरूमा अन्डर्स्ट्यान्डिङ भएन,’ पौडेलले भने, ‘त्यसले पनि गणना अलि ढिलो भएको हो ।’

सुनसरी- ४

सरकारका प्रवक्ता ज्ञानेन्द्रबहादुर कार्की चुनाव लडेको क्षेत्र हो सुनसरी ४ । कार्कीसँग एमालेका केन्द्रीय सदस्य जगदीश कुसियैत प्रतिस्पर्धामा छन् ।

पछिल्लोपटक सार्वजनिक मतपरिणामअनुसार कार्की ९८ मतले अगाडि छन् । कार्कीले २३ हजार ४३९ मत ल्याउँदा कुसियैतले २३ हजार ३४१ मत ल्याएर पछ्याउँदैछन् ।

तर, गणनामा अगाडि रहेका कार्कीले नै धाँधली भयो भनेपछि सुनसरी ४ को मतगणना ४८ घण्टादेखि स्थगित छ । गणनाका क्रममा एमालेले पाएको भन्दा बढी मत आयोगले दिएको भन्दै कार्कीले पुनः मतगणनाको माग राखेपछि उत्पन्न विवादले गणना हुन सकेको छैन ।

६१ हजार मतगणना गरिसकेपछि पुनः मतगणनाको मागलाई एमालेले सहमति दिएको छैन । निर्वाचन कार्यालय भने आयोगको निर्देशन कुरेर बसेको छ ।

उदयपुर- १

परराष्ट्रमन्त्री नारायण खड्का उठेको उदयपुर क्षेत्र नम्बर १ मा समेत लफडा भएकाले मतगणना सकिएको छैन । गणनाको क्रममा समानुपातिक मतपेटिकामा प्रत्यक्षतर्फको मत भेटिएपछि एमालेले पुनः मतदानको माग गरेको थियो ।

तर, कांग्रेसले पुनः मतदानको माग स्वीकार नगरेपछि निर्वाचन कार्यालयले निर्वाचन आयोगसँग राय मागेको थियो । आयोगले पूर्ववतः सहमतिअनुसार समानुपातिकमा भेटिएको प्रत्यक्षको मतपत्र समेत मुचुल्का उठाएर गणना गर्नु भन्ने निर्देशन दिएको छ ।

प्रकाशित मिति: सोमबार, मंसिर १२, २०७९ १६:३९