चुनावमा बालबालिका प्रयोग गर्नेमा गठबन्धन अगाडि, अघि बढेन कारबाही प्रक्रिया

चुनावमा बालबालिका प्रयोग गर्नेमा गठबन्धन अगाडि, अघि बढेन कारबाही प्रक्रिया

A+ A A-

नेकपा एमाले नेतृ तथा दाङ क्षेत्र नम्बर ३ की उमेदवार कोमल ओलीले निर्वाचन आचारसंहिताविपरीत स्कुलका विद्यार्थीलाई राखेर चुनावी भेला गरिन् ।

उनीसँगै दाङ ३ ‘ख’ का उम्मेदवार हुकुम बस्नेतले चुनावी अभियानका क्रममा दाङको बबई गाउँपालिका– १, गँगटेस्थित सरस्वती जनता माविका विद्यार्थी र शिक्षकहरूलाई राखेर भेला गरेका थिए । यो घटनापछि निर्वाचन आयोगले ओलीलाई स्पष्टीकरणको जवाफ २४ घण्टाभित्र दिन भनेर माग गर्‍यो ।

त्यस्तै, आयोगले लोकतान्त्रिक समाजवादी पार्टीका अध्यक्ष एवं प्रतिनिधिसभा सदस्यका लागि महोत्तरी क्षेत्र नं. ३ का उम्मेदवार महन्थ ठाकुरलाई पनि स्पष्टिकरण सोध्यो । ठाकुरले बालबालिकालाई आफ्नो निर्वाचन चिह्न अंकित पम्प्लेट लिई वितरण गर्न हिँडिरहेको देखिने सामग्री संलग्न गरी आयोगमा उजुरी परेको थियो ।

निर्वाचन आचारसंहिता परिच्छेद २ को दफा ४ (छ) र दफा १३ को (ट) अनुसार बालबालिकालाई निर्वाचन प्रचार प्रसार, आससभा जुलुसमा प्रयोग गर्न/गराउन नहुने भनिएको छ ।

आचारसंहितामा स्पष्ट भनिए पनि यो निर्वाचनमा विभिन्न राजनीतिक दलहरू तथा स्वतन्त्र उम्मेदवारबाट बालबालिका प्रयोग भएका २१६ वटा घटना प्राप्त भएको बालअधिकारकर्मी तथा बालबालिका शान्ति क्षेत्र राष्ट्रिय अभियानका (सिजप) अध्यक्ष राजेश शर्माले बताए ।

त्यस्तै, २५ वटा विद्यालय, एउटा विद्यालय बस र चार जना शिक्षक प्रयोग भएको सूचनासमेत सिजपमा प्राप्त भएको उनले बताए । कुल २१६ वटा घटनामध्ये प्रचारप्रसार तथा र्‍यालीमा १ सय ४४ वटा, घरदैलोमा १२ वटा, आमसभामा १८ वटा, प्रचारप्रसार सामग्रीमा १३ वटा र कलाकारको रूपमा २८ वटा घटनामा बालबालिकालाई प्रयोग गरिएको थियो ।

यसैगरी, दलगत रूपमा बालबालिकाको प्रयोगको अवस्था हेर्दा सबैभन्दा बढी लोकतान्त्रिक वाम गठबन्धन दलहरूबाट ९८ वटा, नेकपा एमालेबाट ७१ वटा, अन्य सात दलहरूबाट ३४ वटा र स्वतन्त्र उम्मेदवारहरूबाट १३ वटा घटनामा बालबालिकाको प्रयोग भएको सिजपको रिपोर्टमा उल्लेख छ ।

दलगत प्रयोगको अवस्था हेर्दा नेपाली कांग्रेसले २२ वटा, नेकपा माओवादीले १३ वटा, नेकपा एकीकृत समाजवादीले आठवटा, लोकतान्त्रिक समाजवादीले तीनवटा, लोकतान्त्रिक वाम गठबन्धन दलहरूले ५२ वटा, नेकपा एमालेले ७१ वटा, एमाले/जसपा/राप्रपा/राप्रपा नेपालले नौवटा, राप्रपाले १२ वटा राष्ट्रिय स्वतन्त्र पार्टीले सातवटा, स्वतन्त्र उम्मेदवारहरूले १३ वटा, जसपाले ३ र विवेकशील/नेपाल सुशासन/जनमत पार्टीले १/१ वटा घटनामा बालबालिका प्रयोग गरेको शर्माले बताए ।

चुनाव प्रचारप्रसारमा बालबालिका प्रयोग गरेको निर्वाचन आयोगमा उजुरी परे पनि कारबाही प्रक्रिया अघि नबढ्नु दु:खद भएको शर्मा बताउँछन् ।

‘निर्वाचन आयोगले स्पष्टिकरण सोध्नु सकारात्मक हो तर कारबाही प्रक्रिया अगाडि नबढाउनु दु:खद हो । एउटालाई मात्र कारबाही भएको भए पनि सबैको चेत आउँथ्यो,’ उनले भने । यस्ता घटना यसअघिका निर्वाचनहरूमा भन्दा कम भएको उनले जानकारी दिए ।

प्रकाशित मिति: सोमबार, मंसिर १२, २०७९ १६:१६