ओलीले ‘हाँडीको कप्टेरो’ भन्थे, तिनैले एमालेका नौ जनालाई हराए

A+ A A-

चुनावअघि नेकपा (एमाले) का अध्यक्ष केपी शर्मा ओली एमालेबाट अलग भएर गठन भएको दल नेकपा एकीकृत समाजवादीलाई ‘हाँडीको एउटा कप्टेरो’ भन्थे । एकीकृत समाजवादीलाई उपेक्षा गर्दै ओलीले यसो भनेका हुन् ।

चुनावमा भने उनको दल एमालेलाई पहिलो हुनबाट रोक्न उनकै शब्दमा ‘हाँडीको एउटा कप्टेरो’ले पर्याप्त भयो । एकीकृत समाजवादीले ओलीले गरेको अपेक्षाभन्दा भिन्न अर्थात् १० सिट जित्यो । नेकपा एसले १० सिट जित्दै गर्दा एमालेका ९ जना उम्मेदवार पराजित भए ।

निर्वाचन आयोगका अनुसार नेकपा एसका अध्यक्ष माधवकुमार नेपालले रौतहट– १ मा एमालेका अजयकुमार गुप्तालाई पराजित गरेका छन् । धादिङ– १ मा बागमती प्रदेशका मुख्यमन्त्री राजेन्द्र पाण्डेले एमालेका भूमिप्रसाद त्रिपाठीलाई पराजित गरे । डोल्पामा धनबहादुर बुढाले गणेशबहादुर शाहीलाई, बारा– ४ मा कृष्णकुमार श्रेष्ठले एकवाल मियाँ, दैलेखमा अम्मरबहादुर थापाले रवीन्द्रराज शर्मालाई, अछाम– १ मा शेरबहादुर कुँवरले झपटबहादुर बोहरालाई, बझाङमा भानुभक्त जोशीले ऐनबहादुर महरालाई र प्रेमबहादुर आलेले गोरीकुमारी ओलीलाई पराजित गरे ।

उनीहरूले नेपाली कांग्रेस, नेकपा माओवादी केन्द्र, लोकतान्त्रिक समाजवादी पार्टी (लोसपा) र राष्ट्रिय जनमोर्चाको सहयोगमा एमालेका नौ उम्मेदवारलाई पराजित गरेका हुन् । स्वतन्त्र उम्मेदवार राजबहादुर शाहलाई सल्यानमा पनि तिनै दलहरूको बलमा एकीकृत समाजवादीका प्रकाश ज्वालाले पराजित गरे ।

अध्यक्ष ओलीले भने चुनावअघि एमालेले बहुमत ल्याउने कहिलेकाहीँ दाबी गर्थे । बहुमत त कहाँ हो कहाँ उनको दल एमाले पहिलो दल पनि नबन्ने पक्का भएको छ । यसमा ओलीले हाँडीका कप्टेरा ठानेका एकीकृत समाजवादी पनि जिम्मेवार छ । र, २०७४ मा प्रत्यक्षतर्फ ८० सिट जितेको एमाले यसपटक झण्डै आधा सिट गुमाउनुपर्ने अवस्थामा पुगेको छ ।