एमाले उम्मेदवार कुसियैतको आरोप- हार्ने भएपछि सञ्चारमन्त्रीले मतगणना गर्न दिएनन्

एमाले उम्मेदवार कुसियैतको आरोप- हार्ने भएपछि सञ्चारमन्त्रीले मतगणना गर्न दिएनन्

A+ A A-

सुनसरी क्षेत्र नम्बर ४ मा प्रतिनिधिसभाका लागि नेकपा (एमाले) का उम्मेदवार जगदिशप्रसाद कुसियैतले आफूले हार्ने निश्चित भएपछि मतगणना अवरुद्ध पारेर सञ्चार तथा सूचना प्रविधिमन्त्री ज्ञानेन्द्रबहादुर कार्कीले बखेडा झिकिरहेको आरोप लगाएका छन् ।

मन्त्री कार्कीले मानसिक रूपमा आफू हार्ने निश्चित भएपछि अन्तिम समयमा आएर मतगणना नै हुन नदिएको कुसियैतको भनाइ छ । कार्कीले शनिबार (हिजो) अपराह्न धाँधली भएको भन्दै पुनः मतगणना गर्नुपर्ने माग राखेपछि मुख्य निर्वाचन अधिकृतको कार्यालयले दलीय सहमति जुटाएर मतगणना सुरु गर्न आइतबार (आज बिहान) सर्वदलीय बैठक बोलाएको थियो । बैठकमा मन्त्री कार्कीले पुनः मतगणना हुनुपर्ने अडान राखेपछि अझै मतगणना अघि बढ्न सकेको छैन ।

एमाले उम्मेदवार कुसियतले भने बाँकी रहेको मतगणना तत्काल सुरु गर्न निर्वाचन आयोगसँग माग गरेको बताए । आफूहरूको सो अडान कानुनसम्मत भएको दाबी गर्दै कार्कीले त्यसबाट पछि हट्न नसकिने पनि बताए ।

‘यहाँ हाम्रो भनाइ के हो भने मतगणना जहाँ रोकिएको छ, त्यसलाई सुचारु गरौँ । बाँकी रहेको मतगणना अविलम्ब सुरु गरौँ । तर, माननीय सूचना तथा सञ्चारमन्त्रीज्यूको भनाइ के हो भने अहिले निर्वाचन आयोगले गरेको मतगणना र उसले जुन सूचना प्रकाशित गरेको छ । त्यसलाई क्यान्सिल गरेर रिमतगणना गरौँ भनेर उहाँको जिकीर हो,’ कुसियतले भने, ‘त्यसैमा हाम्रो डिबेट चलिराखेको छ । एमालेको कानुनसम्मत अडान हो । हामीले कानुनलाई हातमा लिन खोजेका छैनौँ । एमालेले स्पष्ट के भनेको छ भने कानूनमा के भन्छ ? जो मतगणना भयो । त्यसलाई छोडौँ । बाँकी रहेको मतगणना सुरु गरौँ ।’

‘उहाँले (कार्कीले) सायद मानसिक रूपमा हार स्वीकार गरीसक्नुभएको छ,’ कुसियैतले भने, ‘म हारिरहेको छु, त्यो हारलाई कसरी बचाउने भनेर उहाँले बखेडा झिक्नुभएको मात्रै हो ।’