कास्कीमा कांग्रेसभित्र विवाद चर्किँदो, अन्तर्घातको आरोप लगाउनेलाई कारबाही माग

कास्कीमा कांग्रेसभित्र विवाद चर्किँदो, अन्तर्घातको आरोप लगाउनेलाई कारबाही माग

A+ A A-

नेपाली कांग्रेस कास्कीभित्रको चुनावी नतिजापछि बढेको विवाद झनै गहिरो बनेको छ । कास्की १ मा प्रतिनिधिसभामा कांग्रेस कास्की सभापति किशोरदत्त बराल र प्रदेशसभा १ 'ख' मा दीपक गुरुङ माइला पराजित भएका थिए ।

दुवै उम्मेदवार हराउन लागेको भन्दै कास्की कांग्रेसका निवर्तमान सभापति कृष्ण केसीमाथि अन्तर्घातको आरोप छ । चुनावको नतिजा आएपछि उम्मेदवारद्वयका समर्थकले नेता केसीको घर घेराउ र नाराबाजी गरेका थिए । यो विवाद साम्य नभई झनै गहिरो बन्दै जाने देखिएको छ । अन्तर्घातको आरोप लगाउने कास्कीको मादी गाउँपालिका समिति सभापति यमबहादुर गुरुङलाई कारबाही गर्न माग गर्दै प्रदेश १ 'ख' समितिमा त्यही गाउँका कांग्रेस नेताले निवेदन बुझाएका छन् ।

सभापति गुरुङलाई साधारण सदस्यसमेत नरहने गरी कारबाही माग गर्दै कांग्रेसकै मादी-१ गाउँ समितिले आइतबार क्षेत्रीय समितिमा निवेदन दिएको हो । ‘कांग्रेस कास्कीका निवर्तमान सभापति कृष्णबहादुर केसीलाई विभिन्न अप्रमाणीत आरोप लगाएर गरेका सम्पूर्ण कार्यको कांग्रेस १ सिक्लेसतर्फबाट चरित्र हत्या गर्न गरिएका आरोप प्रमाणीत गर्न अन्यथा संगठनले साधारण सदस्यसमेत नरहने गरी यमबहादुर गुरुङलगायत कसुरदारलाई कारबाहीको जोडदार माग गर्दछौँ,’ मादी-१ सभापति टंकप्रसाद गुरुङले हस्ताक्षर गरेको निवेदनमा भनिएको छ ।

कारबाहीको माग गरिएका सभापति गुरुङले चार दिनअघि फेसबुकमा स्टाटस लेख्दै निवर्तमान सभापति केसीले कांग्रेसका उम्मेदवार हराउनुपर्छ भनेर आफूलाई पाठ सिकाएको दाबी गरेका थिए । ‘मलाई घरमै बोलाएर १ घण्टासम्म किशोरलाई हराउनुपर्छ, जित्न दिनुहुँदैन भनेर पढाए । यसको तात्पर्य दुवै उम्मेदवार हराउनुपर्छ भन्ने हो,’ उनले भनेका थिए ।

कास्की १ मा निवर्तमान सभापति कृष्ण केसी चुनाव लड्न चाहन्थे । किशोरदत्तले अन्तिममा टिकट ल्याएपछि केसीको समूह रुष्ट बनेको थियो । जित्ने अनुमान गरेको ठाउँमा कांग्रेसका दुवै उम्मेदवार हारेपछि उम्मेदवार पक्षधर केसी समूहविरुद्ध आक्रोशित छ । निवर्तमान सभापति केसी पार्टीभित्र संस्थापन इतर र हालका सभापति एवं प्रतिनिधिसभा सदस्य उम्मेदवार बराल संस्थापन पक्षका हुन् ।

गठबन्धन र कांग्रेस एकजुट नहुँदा कास्की क्षेत्र नम्बर १ मा गठबन्धनले तीनवटै सिट गुमाएको छ । प्रतिनिधिसभामा एमालेका मनबहादुर गुरुङ, कास्की १ 'क' मा माओवादी उम्मेदवार दीपक कोइरालालाई हराउँदै एमालेका खगराज अधिकारी र कास्की १ 'ख' मा बेदबहादुर गुरुङ निर्वाचित भएका छन् ।