बसन्त नेम्वाङसँगको मतान्तर घटाउँदै भीष्म आङ्देम्बे, चल्दै ठट्यौली र घोचपेच

बसन्त नेम्वाङसँगको मतान्तर घटाउँदै भीष्म आङ्देम्बे, चल्दै ठट्यौली र घोचपेच

A+ A A-

पूर्वी पहाडी जिल्ला पाँचथरमा प्रतिनिधिसभातर्फ नेकपा एमालेका उम्मेदवार बसन्तकुमार नेम्वाङ निर्वाचित भइसकेको धेरै सञ्चारमाध्यमहरूमा खबर आए पनि मतगणना भने अझै भइरहेको छ ।

चुनावी प्रतिस्पर्धामा उत्रिएका दलहरूबीच भएको पूर्वसहमतिअनुसार समानुपातिकतर्फको मतपेटिकामा भेटिएका प्रत्यक्षतर्फको मतपत्रको गणना भइरहेको छ । एमालेका तर्फबाट गणनास्थलमा प्रतिनिधि खटिएका युवा नेता विलास योङ्याकाअनुसार करिब ३० हजार समानुपातिकतर्फको मतगणना गर्दा २१ वटा प्रत्यक्षतर्फको मतपत्र भेटिएको र त्यसमध्ये ११ वटा रूख चिह्नमा मतदान गरेको पाइएको छ ।

पाँचवटा भने सूर्य चिह्नमा र बाँकी पाँचवटा अन्य चिह्नमा मतदान गरेको मतपत्र भेटिएको हो । समानुपातिकतर्फको मतपेटिकामा सबैभन्दा बढी रुख चिह्नको मतपत्र भेटिएपछि नेम्वाङसँगको मतान्तर आङ्देम्बेले घटाएका छन् । यसअघि प्रतिनिधिसभाको प्रत्यक्षतर्फका मतपेटिकामा खसेको मत गणना गर्दा नेम्वाङको मत ३२ हजार ११० र आङदेम्बेको ३२ हजार ६३ थियो । त्यसबेला उनीहरूबीचको मतान्तर ४७ थियो । तर, अहिले मतान्तर घटाएर आङ्देम्बेले ४१ मा झारेका छन् ।

ताजा परिणामअनुसार नेम्वाङको कुल मत ३२ हजार ११५ र आङदेम्बेको ३२ हजार ७४ भएको छ ।

ठट्यौली र घोचपेच

प्रत्यक्षतर्फको मटपेटिकामा भएका मतपत्र गणना सकिँदा आङ्देम्बे पछि परेसँगै सत्ता गठबन्धनभित्र घोचपेच सुरु भएको छ । आरोप–प्रत्यारोप पनि चल्न थालेको छ ।

कांग्रेसमा संस्थापन पक्षका नेता आङ्देम्बे पछि पर्नुलाई संस्थापनइतर पक्ष (पाँचथरमा निर्वतमान जिल्ला सभापति नरेन्द्रकुमार केरुङ)ले गठबन्धनका अन्य दुई दल नेकपा माओवादी केन्द्र र नेकपा एकीकृत समाजवादीलाई दोष देखाउँदै आएको छ ।

केरुङनिकट नेता सुमन लामाले ‘गठबन्धन त घातबन्धन रहेछ’ भन्दै टिप्पणी गरेका छन् । तर, उनले चुनावअघि नै कांग्रेसका कार्यकर्ताले चुनावमा स्वविवेक प्रयोग गर्ने सामाजिक सञ्जालमै लेखेका थिए । निवर्तमान सभापति केरुङले पनि प्रदेश ‘क’ मा टिकट नपाएपछि गठबन्धनको नाममा अप्राकृतिक उम्मेदवार छनोटले ल्याउने परिणामको भोगी नेतृत्व नै हुने भनेका थिए ।

अन्ततः मत गणनामा पछि परेसँगै संस्थापनइतर (केरुङ) पक्षलाई भने गठबन्धनको दुई दल माओवादी केन्द्र र नेकपा एसलाई दोष देखाउन थालेको छ । आङ्देम्बे पक्ष भने संस्थापनइतर पक्षले नै घात गरेको निष्कर्षमा पुुगेको छ । यसबीच गठबन्धनका उम्मेदवार आङ्देम्बे मत गणनामा पछि पर्नुमा माओवादी र नेकपा एस जिम्मेवार रहेको आरोप लागेपछि दुवै दलका नेताहरूले अस्वीकार गरेका छन् । माओवादी युवा नेता अमर राईले उल्टै ठट्यौली पारामा संस्थापनइतर पक्षको आरोपको खण्डन गर्दै भनेका छन्, ‘सौताको रिसले पोइको काखमा हग्ने ?’

स्थानीय तह चुनावमा गठबन्धन दलहरूका वडाध्यक्षहरूले पाएको मतका आधारमा भने आङ्देम्बे एमाले उम्मेदवार नेम्वाङभन्दा झण्डै १० हजार मतले अघि थिए । तर, प्रत्यक्षतर्फको मतपेटिकामा रहेका मतपत्र गणना सकिँदा ४७ मतले आङ्देम्बे पछि परेका थिए ।

प्रकाशित मिति: आइतबार, मंसिर ११, २०७९ ११:५७