प्रदेश १ का तीन जिल्लामा रोचक बन्दै चुनावी प्रतिस्पर्धा

A+ A A-

प्रदेश नम्बर १ को तीनवटा जिल्लाको तीन निर्वाचन क्षेत्रमा प्रतिस्पर्धा रोचक देखिएको छ । इलाम क्षेत्र नम्बर २, सुनसरी क्षेत्र नम्बर ४ र मोरङ क्षेत्र नम्बर १ मा मतगणना जारी रहँदा दुई प्रतिस्पर्धीबीच अग्रता खोसाखोस छ ।

मोरङ

मोरङ क्षेत्र १ मा कांग्रेसका डिगबहादुर लिम्बू अगाडि

६ वटा निर्वाचन क्षेत्र रहेको मोरङमा पाँचवटा क्षेत्रको मतपरिणामको सार्वजनिक भइसकेको छ भने क्षेत्र नम्बर १ को मतगणना जारी छ । यो क्षेत्रमा मतगणनाको सुरुवाती चरणदेखि एमालेका घनश्याम खतिवडाले अग्रता लिएका थिए । तर, पछिल्लो मतपरिणमअनुसार कांग्रेसका डिगबहादुर लिम्बूले १ सय २ मतको अन्तरले अग्रता लिएका छन् । लिम्बूले २४ हजार २ सय २८ मत ल्याउँदा खतिवडाले १४ हजार १ सय २६ मत ल्याएका छन् । यहाँ मतगणना जारी छ ।

सुनसरी

सुनसरी क्षेत्र नम्बर ४ मा पूर्वमन्त्री र बहालवालामन्त्रीबीच रोचक प्रतिस्पर्धा चलिरहेको छ । कांग्रेसका संघीय सूचना तथा सञ्चार प्रविधिमन्त्री ज्ञानेन्द्रबहादुर कार्की र एमालेका प्रदेश १ का पूर्वउद्योग, वन तथा पर्यटनमन्त्री जगदिश कुसियैतबीचको प्रतिस्पर्धा रोचक बनेको छ । मतगणनाको सरुवातदेखि अघिपछि हुँदै आइरहँदा एमालेका कुसियैतले अग्रता कायम राखेका थिए । तर, पछिल्लो मतपरिणमअनुसार कांग्रेसका कार्कीले अग्रता बढाएका छन् । उनले २२ हजार ३४५ मत ल्याउँदा एमालेका कुसियैतले २२ हजार १६९ मत ल्याएका छन् । यहाँ पनि मतगणना जारी छ ।

इलाम

इलाम क्षेत्र नम्बर २ मा मतगणनादेखि कम मतान्तरले अगाडि बढिरहेका एमालेका सुवासचन्द्र नेम्वाङको अग्रतालाई कांग्रेसका डम्बर खड्काले ब्रेक लगाएका छन् । नेम्वाङ कांग्रेसका खड्कासँग १६ मतको अन्तरले पछि परेका छन् । खड्काले २८ हजार ४८६ मत ल्याउदा नेम्वाङले २८४७० मत ल्याएका छन् । यहाँ पनि मतगणना जारी छ ।

प्रकाशित मिति: शनिबार, मंसिर १०, २०७९ १४:२४