एमाले–राप्रपा तालमेल सफल, प्रतिनिधिसभातर्फ १३ मध्ये १० उम्मेदवारले जिते

A+ A A-

नेकपा (एमाले) र राप्रपाबीचको चुनावी तालमेल तुलनात्मक रूपमा सफल देखिएको छ । प्रदेश १ को झापा, लुम्बिनीका रूपन्देही र बाँकेमा भएको तालमेलबाट दुवै पार्टीका उम्मेदवारले लाभ लिएका छन् । झापाका ५, रूपन्देहीका ५ र बाँकेका ३ गरी १३ क्षेत्रमा गरेकाे तालमेलबाट यी दुई पार्टीका १० सांसद विजयी भएका छन् ।

एमाले अध्यक्ष केपी शर्मा ओली र राप्रपा अध्यक्ष राजेन्द्र लिङ्देन झापाबाट एकअर्काको सहयोग लिएर विजयी भए । ओली झापा ५ बाट २८ हजार ५७६ को फराकिलो मतान्तरले विजयी भएका हुन् । ओलीले देशभरमै सर्वाधिक ५२ हजार ३१९ मत प्राप्त गरेका छन् भने उनका निकटतम प्रतिद्वन्द्वी कांग्रेसका खगेन्द्र अधिकारीले २३ हजार ७४३ मत प्राप्त गरेका छन् । त्यस्तै, राप्रपा अध्यक्ष लिङ्देनले ४० हजार ६६२ मत प्राप्त गरी कांग्रेस नेता कृष्णप्रसाद सिटौलालाई पराजित गरे ।

झापा ४ मा एमालेकै एलपी साँवा र क्षेत्र नं. २ मा एमालेकै देवराज घिमिरे निर्वाचित भएका छन् । झापा १ मा भने सत्ता गठबन्धनबाट उठेका कांग्रेस महामन्त्री विश्वप्रकाश शर्माले तेस्रो प्रयासमा चुनाव जित्दा एमाले–राप्रपा गठबन्धनबाट उठेका एमाले नेता अग्निप्रसाद खरेल पराजित हुन पुगे । सो क्षेत्रमा प्रदेशसभा सदस्यमा एमालेका रविन कोइराला पनि हारे । त्यसबाहेक झापामा एमाले र राप्रपाले उठाएका सबै उम्मेदवार विजयी भएका छन् ।

लुम्बिनी प्रदेशको रूपन्देहीका ५ निर्वाचन क्षेत्रमा पनि यी दुई पार्टीबीच तालमेल थियो । त्यहाँ जनता समाजवादी पार्टी (जसपा) पनि सँगै थियो । रूपन्देही १ मा एमाले सचिव छविलाल विश्वकर्माले गठबन्धनका उम्मेदवार घनश्याम भुसाललाई हराएका छन् ।

त्यस्तै, क्षेत्र नं. २ मा एमाले उपाध्यक्ष विष्णु पौडेल निर्वाचित भएका छन् भने क्षेत्र नं. ५ मा वासुदेव घिमिरेले चुनाव जितेका छन् । त्यस्तै, क्षेत्र नं. ३ मा एमालेको सहयोगमा राप्रपा नेता दीपक बोहोरा विजयोन्मुख छन् । बाेहाेराले अन्तर बढाउँदै लगेपछि गृहमन्त्री बालकृष्ण खाँण पराजयउन्मुख भइसकेका छन् ।

बाँकेमा राप्रपाका महामन्त्री धवलशमशेर राणाले एमालेसँगको तालमेलमा बाँके २ बाट प्रतिनिधिसभा सदस्य निर्वाचित भएका छन् । त्यस्तै, क्षेत्र नं. १ मा राप्रपाको साथ लिएर एमाले केन्द्रीय सदस्य सूर्य ढकाल विजयी भए । वैशाखको स्थानीय तह निर्वाचनमा एउटा पनि पालिका जित्न नसकेको एमालेले प्रदेशसभातर्फ पनि दुई जना निर्वाचित गरेको छ । बाँके ३ (ख)मा रत्न खत्री र बाँके १ (क) मा दुर्गा चौधरी प्रदेशसभा सदस्य निर्वाचित भए ।

राप्रपा महामन्त्री राणाले एमालेसँगको सहकार्य परिणामुखी भएको बताएका छन् । ‘विपक्षी कमजोर थिएन । तैपनि एमाले र राप्रपाका नेता कार्यकर्ताबीच राम्रो साथ सहयोग रह्यो । त्यसले एकअर्कालाई चुनाव जित्न सहज भयो,’ उनले भने ।

प्रकाशित मिति: शनिबार, मंसिर १०, २०७९ १५:१६