गठबन्धनले कर्णालीमा कांग्रेसको उदय, प्रतिनिधिसभामा एमाले र प्रदेशमा नेकपा एस निल

गठबन्धनले कर्णालीमा कांग्रेसको उदय, प्रतिनिधिसभामा एमाले र प्रदेशमा नेकपा एस निल

A+ A A-

नेपाली कांग्रेसले २०७४ मा ब्यहोर्नुपरेको हारको बदला लिएको छ । तत्कालीन एमाले–माओवादी गठबन्धनका कारण प्रदेशसभामा प्रत्यक्षतर्फ एक सिट मात्र जित्न सकेको कांग्रेसले यसपालि गठबन्धनको बलमा कमब्याक गरेको छ । २०७४ मा प्रतिनिधिसभातर्फ कांग्रेस बढारिएको थियो ।

१२ प्रतिनिधिसभा र २४ प्रदेशसभामा कांग्रेसले गठबन्धनबाट भाग पाएका चारवटै सिटमा जित निकालेको छ भने प्रदेशसभातर्फ भाग पाएका १२ मध्ये १० सिटमा जित निकालेर पहिलो पार्टी बनेको छ । प्रतिनिधिसभातर्फ कांग्रेसले सुर्खेत १ र २, दैलेख २ र मुगुमा सहज जित निकालेको छ ।

यस्तै, प्रदेशसभातर्फ कांग्रेसले जाजरकोट प्रदेशसभा (क) र (ख), सल्यान (ख), सुर्खेत १ (क) दैलेख १ (क) र (ख), दैलेख २ (क), कालीकोट (क) र हुम्ला (ख) मा सहज जित निकालेको छ । प्रदेशसभातर्फ सुर्खेत २ (क) र जुम्ला (क) मा कांग्रेस पराजित भएको छ ।

सत्ता गठबन्धनमा भागवण्डा हुँदा १२ प्रतिनिधिसभा क्षेत्रमा कांग्रेसले ४, माओवादीले ५ र समाजवादीको भागमा ३ सिट परेको थियो । ११ सिटमा गठबन्धनले जित निकालेको छ भने एक सिटमा गठबन्धन पराजित भएको छ । प्रतिनिधिसभातर्फ जुम्ला माओवादीले गुमाएको छ । जुम्लामा राप्रपाले माओवादीलाई हराउँदै पहिलो पटक जित निकालेको छ ।

यस्तै, प्रदेशसभाका २४ सिटमा कांग्रेसलाई १२, माओवादीलाई १० र नेकपा एसले २ सिट पाएको थियो । माओवादीले प्रतिनिधिसभातर्फ पाएका ५ सिटमध्ये ४ सिटमा जित निकालेको छ भने प्रदेशसभामा १० मध्ये ९ सिटमा जित निकालेको छ । माओवादीले प्रतिनिधिसभामा रुकुम पश्चिम, जाजरकोट, कालीकोट र हुम्लामा जित निकालेको छ । यस्तै, प्रदेशसभातर्फ रुकुमपश्चिम (क) र (ख), सल्यान (क), सुर्खेत १ को (क) र २ को (ख), कालीकोट (क), डोल्पा (ख), हुम्ला (क) र मुगु (क) मा विजयी हँदा दैलेख २ (ख) भने गुमाएको छ ।

यस्तै, नेकपा एकीकृत समाजवादीले प्रतिनिधिसभामा पाएका सबै सिटमा सहज जित निकालेको छ भने प्रदेशसभामा भने निल भएको छ । प्रतिनिधिसभामा ३ स्थानमा जित निकाल्दा प्रदेशसभातर्फ समाजवादीले पाएका २ क्षेत्र जुम्ला (ख) र मुगु (ख) मा एमालेसँग पराजित भएको छ । समाजवादीले प्रतिनिधिसभातर्फ सल्यान, दैलेख १ र डोल्पामा जित निकालेको छ ।

एमाले प्रतिनिधिसभामा निल, प्रदेशमा पहिलोबाट तेस्रो

२०७४ मा प्रतिनिधिसभामा ६ र प्रदेशसभामा समानुपातिकसहित २० सिट जितेर पहिलो दल बनेको एमाले यसपालि तेस्रोमा खुम्चिदा प्रतिनिधिसभातर्फ बढारिएको छ । प्रतिनिधिसभा र प्रदेशसभाका सबै सिटमा गठबन्धनसँग प्रतिस्पर्धा गरेको एमालेले प्रतिनिधिसभामा जित निकाल्न सकेन भने प्रदेशसभातर्फ ५ सिटमा चित्त बुझाएको छ ।

एमालेले प्रदेशसभातर्फ सुर्खेत २ (क), दैलेख २ (ख), जुम्ला (ख), डोल्पा (क) र मुगु (क) मा जित निकालेको छ । यस्तै, प्रदेशसभामा एक स्वतन्त्रले समेत बाजी मारेका छन् । जुम्ला (क) मा कांग्रेसका बागी उम्मेदवारले कांग्रेसकै उम्मेदवारलाई हराएका छन् ।

प्रकाशित मिति: शनिबार, मंसिर १०, २०७९ ११:३०