पाँच वर्षमा मधेसमा एमालेको तेब्बर तरक्की, प्रदेशसभामा बन्यो पहिलो शक्ति

A+ A A-

पाँच वर्षअघि माओवादीसँग कसिलो गठबन्धन गरेर चुनावमा जाँदासमेत मधेस प्रदेशबाट प्रतिनिधिसभातर्फ दुई सिट मात्र जितेको एमालेले ४ मंसिरको निर्वाचनमा त्यो संख्या तेब्बर बनाएको छ । मधेस प्रदेशका आठमध्ये पाँच जिल्लाबाट एमालेका ७ उम्मेदवार प्रतिनिधिसभा सदस्य निर्वाचित भएका छन् ।

स्थायी कमिटी सदस्य प्रभु साहले उम्मेदवारी होल्ड गरेर स्वतन्त्र मनोनयन गरेपछि मधेसमा एमालेको स्थिति खस्किने अनुमान गरिएको थियो । तर, आम रुपमा अपेक्षा गरिएभन्दा राम्रो नतिजासहित एमाले मधेसको बलियो पार्टीका रुपमा उभिएको छ । प्रतिनिधिसभातर्फ पर्सा ३ मा राजकुमार गुप्ता निर्वाचित भएका छन् भने बारा १ बाट अच्युतप्रसाद मैनाली र ३ बाट ज्वालाकुमारी साह निर्वाचित भएका छन् । त्यस्तै, सिराहा १ बाट रामशंकर यादव र ३ बाट लिलानाथ श्रेष्ठ प्रतिनिधिसभा सदस्य चुनिएका छन् ।

यसैगरी सर्लाही ३ बाट हरिप्रसाद उप्रेती निर्वाचित भएका छन् भने धनुषा ३ बाट जुलीकुमारी महतो फराकिलो मतान्तरसहित प्रतिनिधिसभा पुगेकी छिन् । प्रभु साहको प्रभावका कारण रौतहटमा एमाले कमजोर देखिएको छ । रौतहटमा साह क्षेत्र नं. ३ र उनकै समूहका किरणकुमार साह क्षेत्र नं. २ बाट निर्वाचित भएका छन् । सप्तरी र महोत्तरीमा भने एमालेले जित्न सकेन ।

प्रदेशसभाको प्रत्यक्षतर्फ एमाले पहिलो पार्टीका रुपमा उदाएको छ । ६४ प्रत्यक्ष सिटमध्ये ६३ को मतगणना अन्तिम चरणमा पुगेको छ । एमाले ११ सिटमा विजयी भईसकेको छ भने ३ सिटमा जित्नेगरी अग्रता लिइरहेको छ । कांग्रेसले १० सिट जितिसकेको छ भने एउटा क्षेत्रमा अग्रता छ । त्यस्तै, जसपाले ७ सिट जितेको छ भने ४ क्षेत्रमा अग्रता छ । लोसपाले ७ सिट जितेको छ भने सीके राउतको जनमत पार्टी ५ सिट जितेर एउटा क्षेत्रमा अग्रता लिइरहेको छ । माओवादी केन्द्रले ४ सिट जितेको छ भने एकीकृत समाजवादीले ४ र स्वतन्त्रले ५ सिट जितेका छन् ।