जेलमै बसेर बाबु र श्रीमतीलाई सांसद जिताएका रेशम चौधरी

A+ A A-

जिल्ला र उच्च अदालतले टीकापुर घटनाका मुख्य दोषी ठहर गरेका थरुहट आन्दोलनका नेता रेशम चौधरी काठमाडौंको डिल्लीबजार कारागारमा छन् । जेलमै बसेर उनले बुबा लालवीर चौधरी र श्रीमती रञ्जिता श्रेष्ठ चौधरीलाई प्रतिनिधिसभा सदस्य जिताएका छन् ।

कानुनी रूपमा नमिल्ने भएपछि आफू संरक्षक बसेर रेशमले श्रीमती रञ्जिताको अध्यक्षतामा नागरिक उन्मुक्ति पार्टी गठन गरेका थिए । बुबा लालवीर बर्दिया क्षेत्र नं. २ बाट निर्वाचित भएका हुन् भने श्रीमती श्रेष्ठ २०७४ मा रेशम आफैँले जितेको कैलाली १ बाट चुनाव जितेकी हुन् । यी दुईसहित तीन सांसदसहित उनको संरक्षकत्वमा रहेको नागरिक उन्मुक्ति पार्टी संघीय संसद्‌मा उदाउन लागेको हो ।

बर्दिया २ बाट रेशम आफैँले मनोनयन दर्ता गराएका थिए । तर, फौजदारी अपराधमा अदालतबाट दोषी ठहर भइसकेको भन्दै निर्वाचन आयोगले उनको उम्मेदवारी खारेज गरिदियो । त्यसको संकेत पाएरै सायद उनले बुबा लालवीरलाई त्यहाँ स्वतन्त्र उम्मेदवारी दिन लगाएका थिए । रेशमको उम्मेदवारी खारेज भएपछि नागरिक उन्मुक्ति पार्टीले उनै लालवीरलाई समर्थन गरेको थियो । लालवीरको पृष्ठभूमि एमाले नेताको छ । २०७४ को निर्वाचनमा उनी एमालेबाट प्रदेशसभा सदस्य उम्मेदवार थिए । तर, पराजित भए । रेशम स्वयम् पनि एमालेनिकट विद्यार्थी संगठन अनेरास्ववियुबाट राजनीतिमा आएका हुन् । उनी कलाकार र सञ्चारकर्मीसमेत हुन् ।

लालवीर माओवादी केन्द्रको गढ मानिँदै आएको बर्दिया २ बाट २६ हजार ५ सय २० मत ल्याएर विजयी भए । उनका निकटतम प्रतिद्वन्द्वी माओवादी केन्द्रका सुरेश पन्थ २६ हजार ३८४ मत प्राप्त गरेका थिए । त्यस्तै, कैलाली १ मा नागरिक उन्मुक्ति पार्टीकी अध्यक्षसमेत रहेकी श्रेष्ठ ३० हजार ४०४ मत ल्याई विजयी भइन् । उनका निकटतम प्रतिद्वन्द्वी कांग्रेसका रामजनम चौधरीले १८ हजार ८१ मत ल्याएका छन् । कैलाली ३ मा पनि सोही पार्टीबाट गंगाराम चौधरी २३ हजार १२० मत ल्याएका विजयी भएका छन् । उनका निकटतम प्रतिद्वन्द्वी माओवादी केन्द्रका कृष्णकुमार चौधरीले १७ हजार ७४९ मत प्राप्त गरे ।

राज्य पुनर्संरचनामा कैलाली र कन्चनपुरलाई थारू बहुल रहेको लुम्बिनी प्रदेशमा राख्नुपर्ने मागसहित चर्किएको थरुहट आन्दोलनले ७ भदौ २०७२ मा हिंसात्मक रूप लिँदा टीकापुर घटना भएको थियो । सो घटनामा आन्दोलनकारीको आक्रमणबाट नेपाल प्रहरीका एसएसपीसहित आठ सुरक्षाकर्मी र अज्ञात पक्षको गोलीबाट डेढ वर्षीय बालकको ज्यान गएको थियो । आन्दोलनको अगुवाइ गरेकै कारण हिंसाको मुख्य दोषीका रूपमा रेशम चौधरीलगायतका थारु अगुवाहरुलाई अदालतले दोषी ठहर गरेको हो ।