श्यामको यात्राः परिवारभित्रै पार्टीगत विद्रोह, नायकदेखि सांसदसम्म

तस्वीरः युनिश गुरुङ

A+ A A-

कास्की १ (२)बाट नेकपा एमालेले चुनाव जित्ने कमैले सोचेका थिए । एमालेभित्रै पनि उक्त क्षेत्रलाई ‘रेड–जोन’मा राखिएको थियो । किनकि यो निर्वाचन क्षेत्रमा कांग्रेस बलियो थियो । त्यसमाथि गठबन्धन हुँदा एमालेलाई जित्न कठिन हुने देखिन्थ्यो । तर, एमाले उम्मेदवार बेदबहादुर गुरुङ (श्याम) कांग्रेसका दीपक गुरुङ (माइला)लाई ८ सय ६७ मतले हराएर प्रदेश सांसद निर्वाचित भएका छन् ।

स्थानीय तहमा एमालेले नपाएका साढे ५ हजार मत पाए पनि हार्छन् भनिए पनि उनले साढे ८ सय मतले जिते । ‘चुनाव जित्दिनँ भन्ने सुरुबाटै लागेको थिएन । पार्टीको नीति–कार्यक्रम, संगठन र हाम्रो संकल्पकै कारण नजित्नुपर्ने कुनै कारण थिएन,’ चुनाव जितेपछि उनले भने, ‘स्थानीय चुनावको आधार प्रस्तुत गरेर ‘रेड–जोन’ भनिए पनि मेरो निश्चित थियो ।’

श्याम २०७४ सालको स्थानीय तह चुनावमा कास्कीको मादी गाउँपालिकाको अध्यक्ष निर्वाचित भएका थिए । जनतासँग पछिल्लो पाँच वर्ष पनि नजिक भएकाले श्यामलाई यो चुनाव जित्न पनि थप सहज भएको हो ।

नायकदेखि सांसदसम्म

श्याम राजनीतिज्ञमात्रै होइनन्, कलाकार पनि हुन् । राजनीतिसँगै लामो समय कलाकारितामा लागेका श्यामले थुप्रै गुरुङ सिनेमामा अभिनय र निर्देशन गरेका छन् । उनले २०५२ सालमा बनेको गुरुङ चलचित्र कुहिरोभित्रबाट अभिनय सुरु गरेका थिए । त्यसपछि गोठालो चलचित्रमा अभिनय गरे । उनले गोठालोमा समावेश गरेको आशामारा चुरोट बोलको गीतमा नृत्य गरे जुन चर्चित गायक युक्त गुरुङले गाएका थिए ।

आफ्नै निर्देशनमा उनले ‘हाम्रो गाउँघर’ नामक गुरुङ चलचित निर्माण गरेका छन् । श्याम गुरुङ चलचित्रकर्मीको संस्था गुरुङ फिल्म एसोसियसन (जिफान)को दुई कार्यकालका अध्यक्ष पनि हुन् ।

bed bahadur gurung shyam1669288479.jpg

कांग्रेसी बा’का कम्युनिस्ट छोरा

श्याम २०२७ साल २३ जेठमा कास्कीको मादी गाउँपालिका–२ ताङतिङमा (तत्कालीन नामर्जुङ गाविस ५ पण्डित टोल)मा जन्मेका हुन् । आठ कक्षा पढ्दा नै २०४५ सालमा श्याम अनेरास्ववियुमा आबद्ध भएका थिए । २०४६ को आन्दोलनमा उनले भाग लिए ।

पोखराको अमरसिंह माविबाट उनी एसएलसी उत्तीर्ण भएका थिए । प्रजातन्त्र पुनःस्र्थापनापछि २०४८ सालमा उनका बुबा टेकशाही गुरुङ नेपाली कांग्रेसका तर्फबाट तत्कालीन नामर्जुङ गाविस अध्यक्ष बनेका थिए । पारिवारिक पृष्ठभूमि कांग्रेस भएका बेद कम्युनिस्टका झण्डा बोकेर हिँडे । गाउँगाउँमा कम्युनिस्टका पर्चा बाँड्न थाले । बुबामात्र नभई उनका काका मेजर दीपक गुरुङ पनि कांग्रेसबाटै सांसद थिए ।

२०४५ सालमा अनेरास्ववियु एकताको पाँचौ प्रारम्भिक कमिटी सदस्य भएर उनी एमालेसँग औपचारिक रुपमा जोडिएका थिए । त्यसपछि २०४६ देखि ०४८ सम्म अनेरास्ववियु कास्की जिल्ला कमिटीको सदस्य भए । २०५२ सालमा नेकपा एमाले कास्की जिल्ला इलाका–५ को उपसचिव भएका श्याम युद्धकालीन समयमा पनि सक्रिय राजनीतिमा रहे । २०५८ सालमा नेकपा एमाले कास्की जिल्ला इलाका–५ को सचिव भएका थिए ।

२०६२÷०६३ सालको आन्दोलनमा सक्रिय भएर लागेका श्याम त्यतिबेला २१ दिन हिरासतमा परे । दोस्रो जनआन्दोलनपछि उनी पार्टी राजनीतिमा जोडिएका हुन् । २०६४ सालमा नेकपा एमाले कास्की जिल्ला कमिटी सदस्य, २०६६ मा सचिवालय सदस्य, २०६७ मा नेकपा एमाले राष्ट्रिय प्रतिनिधि परिषद् सदस्य निर्वाचित भए । २०६८ मा नेकपा एमाले गण्डकी अञ्चल कमिटी सदस्य बनेका उनी २०७४ पछि नेकपा गण्डकी प्रदेश कमिटी सदस्य भए । गत वर्ष उनी नेकपा एमाले गण्डकी प्रदेश सचिवालय सदस्य बनेका थिए ।

11 bed bahadur gurung shyam1669288496.jpg

आफू स्थानीय तहको समस्याबारे जानकार रहेकाले प्रदेश सभामा स्थानीय तहको पक्षमा सशक्त आवाज उठाउने श्याम बताउँछन् । उनी भन्छन्, ‘स्थानीय तहमा रहेर प्रदेशका कमजोरी र सकारात्मक पक्ष सबै मैले देखेको छु । प्रदेशप्रति जनताले उठाएका प्रश्न निरुपण गर्नेमा मेरो भूमिका रहन्छ ।’ स्थानीय तहमा बस्दा कार्यपालिका, व्यवस्थापिकादेखि न्यायपालिकासम्म व्यहोरेकाले प्रदेश संसदमा प्रभावकारी भूमिका निभाउन सक्ने श्यामको विश्वास छ ।

प्रकाशित मिति: बिहीबार, मंसिर ८, २०७९ १६:५८