देउवासँग हारेका सागर ढकाललाई प्रश्न- रविको पार्टीमा जाने सम्भावना छ ?

A+ A A-

डडेल्धुराबाट स्वतन्त्र उम्मेदवारी दिएका सागर ढकालले प्रतिनिधिसभा चुनाव जित्न त सकेनन् तर प्रधानमन्त्री एवं कांग्रेस सभापति शेरबहादुर देउवाको मनमा ढ्याङ्ग्रोचाहिँ बजाइदिए । चुनाव हुनुभन्दा केही महिनाअघि मात्र किर्गिस्तानबाट फर्केर डडेल्धुरा छिरेका उनले कांग्रेसजनलाई यति अत्याइदिए, हेलिकोप्टर चढेर आउन सक्नेलाई मत दिन आग्रह गर्नदेखि रिसोर्टमा रातबिरात भोजभतेर गर्नसम्म देउवा बाध्य भए ।

बीबीसी मिडिया एक्सनको साझा सवाल कार्यक्रममा केही वर्षअघि देउवालाई तिखो प्रश्न गरेरै चर्चामा आएका ढकाल विदेशमा इन्जिनियरिङ सकेर देउवाविरुद्धै चुनाव लड्न आएका थिए । सुरुमा कतिपयले ठोकुवा नै गरेका थिए, उनले ५ हजार मत पनि कटाउँदैनन् । तर, उनले १३ हजार ४२ मत ल्याएर दोस्रो स्थान हासिल गरे । अन्तिम मतपरिणाममा देउवा २५ हजार ५ सय ३४ मतका सात सातौँपल्ट प्रतिनिधिसभामा चुनिए । सागर ढकाल अब के गर्छन् ? राजनीतिमा उनको भूमिका कस्तो रहन्छ ? यसै सन्दर्भमा डडेल्धुरामा रहेका उनीसँग हामीले संक्षिप्त कुराकानी गरेका छौँ ।

०००

पहिलो संसदीय चुनावको अनुभव कस्तो रह्यो ?

मलाई राजनीति त्यति राम्रोसँग आउँदैनथ्यो । किर्गिस्तानबाट ४/५ महिनाअघि फर्केर सिधै मैदान छिरेँ । चार/पाँच महिनामा यतिको सफलता हात पारेँ । मेरा लागि यो सानदार र ऐतिहासिक हो । म आफू हारेको मान्दिनँ । म दोस्रो भएको हुँ । डडेल्धुरामा देउवाको दबदबालाई हल्लाएको छु । डडेल्धुरा मात्र होइन, अब सदूरपश्चिममा पुराना र टेस्टेडहरूको दबदबालाई हल्लाउनुपर्छ । युवापुस्ताले देशको शासनसत्ता हातमा लिनुपर्छ ।

रवि लामिछाने, तोसिमा कार्कीहरूको जितमा मेरो पनि योगदान छ । यसपालिको चुनावमा सबैभन्दा पहिला स्वतन्त्र वा वैकल्पिक उम्मेदवारीको सन्देश फैलाउने म पनि एक हुँ । काठमाडौं होस् वा देशका जुनसुकै क्षेत्रमा उठेका स्वतन्त्र वा राष्ट्रिय स्वतन्त्र पार्टीका उम्मेदवारलाई यो सन्देशले राम्रो काम गरेको छ । मैले त वैकल्पिक करेन्टको एक स्वीच दबाएको छु, जुन अब देशभर अन रहन्छ ।

डडेल्धुराबाट हार्नुभयो, अब कसरी कुन भूमिकामा सक्रिय रहनुहुन्छ ?

मैले अघि पनि भनेँ, यो मेरा लागि ऐतिहासिक हो । मैले हारेको होइन । एउटा ठिटो हिजोअस्ति आएर, प्रधानमन्त्रीको क्षेत्रका मतदातालाई रातारात वैचारिक रूपमा कन्भिन्स गरेर यतिको मत ल्याउनुलाई सामान्य मान्न हुन्छजस्तो लाग्दैन मलाई ।

आगामी दिनमा म केवल डडेल्धुरामा मात्र नभएर पूरै सुदूरपश्चिमको मुद्दामा सक्रिय रहनेछु । खासगरी स्थानीय चुनावका लागि विदेशमा भएका तमाम युवाहरूलाई नेपाल आउन प्रोत्साहित गर्नेछु । उनीहरूलाई स्वतन्त्र उम्मेदवार दिएर सत्तामा हस्तक्षेप गर्न उत्साहित गर्ने प्रयास गर्नेछु । यसकाे अर्थ म युवाहरूका खातिर स्थानीय तह चुनावकाे तयारीमा पनि जुट्नेछु ।

तपाईंले भन्नेबित्तिकै आउँछन् त ?

मेरो उम्मेदवारीले देशभर कस्तो सन्देश गयो, तपाईंलाई थाहै छ । यो सन्देश निकै अर्थपूर्ण छ । मैले आफ्नो मात्रै हित हेर्थें भने विदेशमा राम्रो जागिर खाएर बस्थेँ । मलाई देशलाई कसैले कोपरिरहेको हेरेर, सहेर बस्न मन लागेन । त्यसैले म आएर चुनाव लडेँ । यो कुरा बुझ्ने र मैलेजस्तै देशका लागि चिन्तन गर्ने युवा अर्कोपल्टको स्थानीय चुनावमा स्वतःस्फुर्त आएर उम्मेदवार हुनेछन् ।

देशभर घण्टीका उम्मेदवारले राम्रो मत पाइरहेका छन् । आफू पनि घण्टीबाटै उठेको भए जितिन्थ्याे कि जस्ताे लाग्दैन ?

त्यो हाइपोथेटिकल कुरा भयो । जे होस्, घण्टीबाट उठ्नु र म स्वतन्त्र उठ्नु लगभग उस्तै थियो । मेरो उम्मेदवारी र राष्ट्रिय स्वतन्त्र पार्टीको उम्मेदवारीको एउटै सन्देश भनेको देश अब युवा पुस्ताको हातमा जानुपर्छ भन्ने नै हो ।

एउटै उद्देश्य हो भने तपाईं आगामी दिनमा राष्ट्रिय स्वतन्त्र पार्टीमा जाने सम्भावना कति छ ?

यो सम्भावनालाई म नकार्दिनँ । म राष्ट्रिय स्वतन्त्र पार्टीमा जाऊला, नजाऊला त्यो भिन्दै कुरा हो । तर, हाम्रो मिसन भनेको स्वतन्त्र वा वैकल्पिक शक्तिलाई एक ठाउँमा ल्याउनु र देशकाे पक्षमा काम गर्नु नै हो । अबको पाँच वर्षपछि हामीजस्ता युवाहरू मिलेर संसद्‌मा दुईतिहाइ बहुमत ल्याउनुपर्छ भन्ने हो । स्थानीय तहदेखि संसद्सम्मै अब युवा र सक्षम व्यक्ति हुनुपर्छ । हामी कहिलेसम्म कुशासनमा लपेटिनँ अभिशप्त रहने ? कहिलेसम्म सहने ? याे प्रश्नकाे जवाफ खाेज्ने क्रममा हामी एकैठाउँमा रहेर वा मिलेर सक्रिय हुन सक्छाैँ ।

विदेश फर्किने पो सोच्नुभएको छ कि ?

म अविवाहित हुँ । सन्न्यासी हुँ । बस्नकै लागि विदेश फर्किन्नँ । तैपनि पेट त पाल्नैपर्छ । वर्षमा ३ महिनाजति विदेशतिर बसेर काम गर्छु । नौ महिना सुदूरपश्चिमका जनतामाझ रहने छु । तीन महिना विदेश बस्छु भन्ने कुरालाई अन्यथा नलिइयोस् । काम, तालिम वा यस्तै उद्देश्यले म वर्षको दुई-तीन महिना विदेशमा रहन्छु भनेको हुँ । जान त म १०-१५ दिनलगत्तै पनि सक्छु तर अहिले फर्किन्नँ । केही महिना सुदूरपश्चिम डुल्छु । यहाँका जनतामाझ बस्छु ।

डडेल्धुराका जनतालाई के भन्नुहुन्छ ?

मेरा मतदाताप्रति म असाध्यै कृतज्ञ छु । उहाँहरूले मलाई सन्तोषजनक मत मात्रै दिनुभएन, फोहोरी राजनीतिलाई शुद्ध पार्ने उद्देश्यले मैदान उत्रेका वा उत्रिन चाहने तमाम् युवालाई प्रोत्साहित पनि गर्नुभएको छ । डडेल्धुराका जनता, युवा साथीहरूप्रति म आभारी छु । आगामी दिनमा सँगै, सधैँ हिजोअस्ति जसरी मिलीजुली काम गरौँला, यही भन्छु ।

प्रकाशित मिति: बुधबार, मंसिर ७, २०७९ १०:३९