कांग्रेस र एसको साथ हुँदा पनि किन हारिन् मानुषी ?

A+ A A-

मानुषी यमी भट्टराई माओवादी केन्द्रकी होइनन् । उनकाे परिवारले उहिल्यै 'माओवाद' भन्ने शब्दसँगै 'सम्बन्ध विच्छेद' गरिसकेकाे थियाे । तर राजनीतिमा असम्भव केही छैन भनिएजस्तै भयाे, पहिलाेपल्ट संसदीय चुनावमा हाेमिएकी उनी माओवादी केन्द्रकै उम्मेदवार बन्न पुगिन् ।

खासमा उनी आफ्ना पिता एवं पूर्वप्रधानमन्त्री डाक्टर बाबुराम भट्टराई नेतृत्वकाे नेपाल समाजवादी पार्टीमा छिन् । तर, गाेलाकारभित्रकाे हसिया हथाैडा चुनाव चिह्नमा भाेट माग्दै काठमाडाैं निर्वाचन क्षेत्र नम्बर ७ मा उत्रिइन् ।

चुनाव जित्नकै लागि बनेकाे सत्ता गठबन्धनकाे साथ उनलाई थियाे । तैपनि उनी हारबाट जाेगिन सकिनन् । उसैगरी, जसरी आमा हिसिला यमीले २०७० काे दोस्रो चुनाव हारेकी थिइन् ।

यसै पनि काठमाडौंसहितका मुख्य शहरमा माओवादीको मत निरन्तर घटिरहेको छ । संघीय चुनावकाे हकमा काठमाडौंमा माओवादीले कतै जित्न नसक्ने अवस्था छ । यस्तोमा माओवादीकै उम्मेदवार भएर मैदानमा जानु मानुषीलाई फापेन ।

केन्द्रमा नेताहरूले गठबन्धन गरे पनि भुईंमा मतदाताले धेरै ठाउँमा यसलाई स्वीकारेको पाइएन । अघिल्लोपल्ट एमालेसँग गठबन्धन गरेको माओवादी केन्द्रले यसपालि कांग्रेस र नेकपा एससँग गठबन्धन गर्‍याे । एकातिर काठमाडाैं उपत्यकामा माओवादी केन्द्रकाे बढ्दाे 'अलाेकप्रियता', अर्कातिर खासगरी चुनाव जित्नकै लागि बनेको गठबन्धनलाई मतदाताले रुचाएनन् । मानुषीको क्षेत्रमा पनि त्यस्तै भयो ।

गठबन्धनमै रहेका दलका मतदाताले समेत मानुषीलाई भोट दिएनन् । किनकि संगठन र स्थानीय चुनावमा गठबन्धन घटक दलले पाएको मतभार हेर्दा उनले सजिलै चुनाव जित्नुपर्ने थियो । तर, गत असारमा मात्रै गठन भएकाे राष्ट्रिय स्वतन्त्र पार्टीका गणेश पराजुलीले सानका साथ जित हात पारे । पराजुलीले २ हजार बढी मतले एमालेका श्यामकुमार घिमिरेलाई हराइदिए ।

पराजुलीले ८ हजार ७ सय ४३ मत ल्याए भने घिमिरेले ६ हजार ८ सय मत पाए । मानुषी ६ हजार ६३ मतका साथ तेस्राेमा सीमित भइन् । जबकि उनलाई नेपाली कांग्रेस, माओवादी केन्द्र, नेकपा एसले समेत साथ दिने सहमति थियाे ।

२०६४ मा भएकाे संविधानसभाको पहिलाे निर्वाचनमा माओवादी नेतृ हिसिला यमीले यसै क्षेत्रबाट चुनाव जितेकी थिइन् । तर, २०७० काे चुनावमा उनले याे क्षेत्र रक्षा गर्न सकिनन् । हिसिला २०७० को चुनावमा जोसँग हारेकी थिइन्, मानुषीकाे प्रतिस्पर्धा उनै उम्मेदवारसँग हुने ठानिएकाे थियाे ।

अघिल्लोपल्ट हिसिलालाई हराएका एमालेका रामवीर मानन्धर यसपालि स्वतन्त्र उम्मेदवारका रूपमा मैदानमा थिए । उनीसँगै एमालेका श्याम घिमिरेबाहेक अरु कसैलाई मानुषीको प्रतिस्पर्धीका रूपमा हेरिएको थिएन । रामवीर त प्रतिस्पर्धामै आएनन् । तर, अप्रत्याशित रूपले घण्टीधारी पराजुलीले जिते । सत्ता गठबन्धनकी साझा उम्मेदवार मानुषीले एमाले उम्मेदवारलाई समेत उछिन्न सकिनन् ।

उनका बुबा एवं नेपाल समाजवादी पार्टीका अध्यक्ष डा. भट्टराईले चुनावको ठीक अगाडि आफूले तीनपल्ट चुनाव जितेको क्षेत्र गोरखा- २ माओवादी केन्द्रका अध्यक्ष पुष्पकमल दाहाल प्रचण्डलाई सुम्पेका थिए । युवालाई मौका दिने भनी निर्वाचन क्षेत्र छोडिदिएका भट्टराईका लागि यता काठमाडौं- ७ मा माओवादी केन्द्रले मानुषीलाई आफ्नो आधिकारिक उम्मेदवार बनाएको थियो ।

काठमाडौं उपत्यकामा माओवादी निकै कमजोर भए पनि गठबन्धनमा रहेका अन्य दलले सघाउँदा मानुषीलाई सजिलै हुने ठानिएको थियो । तर, मानुषी गठबन्धनप्रति जनताको रोषको सिकार बन्न पुगेको विश्लेषण गर्न थालिएको छ ।

प्रकाशित मिति: बुधबार, मंसिर ७, २०७९ ०९:२३