बाजुरामा अनलाइनबाट व्यापार

A+ A A-

कोरोना भाइरस नियन्त्रण गर्न सरकारले घोषणा गरेको लकडाउन लम्बिएसँगै बाजुराका व्यावसायीले फोन र अनलाइनबाट व्यापार सुरू गर्न थालेका छन् । महिनौँ पसल बन्द हुँदा व्यापार घाटा हुन्ने देखिएपछि यहाँका व्यावसायीले पनि फोन र अनलाइनबाट व्यापार सुरू गर्न थालेका हुन् ।

‘बन्दाबन्दीमा ग्राहकलाई सामान पाइने होकी/होइन भन्ने पहिलो कौतुहलता हुन्छ । ग्राहक हामीलाई फोन गरेर आफ्नो खुल्दुली मेटाउँछन् । खुद्रा व्यापारीले ह्वाट्सएप फेसबुकबाट हामीलाई सामानको सूची टिपाउन थालेका छन्’ सदरमुकाम मार्तडीमा होलसेल व्यापार गर्ने सागर इन्टर प्राइजेजका सञ्चालक प्रकाश थापाले भने, ‘ग्राहकको मागअनुसार हामी सामान प्याक गरिरहेका छौँ । अहिले लकडाउनमा सामाजिक दूरी कायम गर्न र ग्राहकलाई सेवा दिन इन्टरनेट र फोन राम्रो विकल्प बनेको छ ।’

व्यापारीहरूले सामान ढिलो बिक्री गरे समय अवधि गुज्रने भएका कारण नयाँ उपाय खोज्नु परेको स्वामीकार्तिक गाउँपालिका-५ का खुद्रा व्यापारी धनकृष्ण बिकले बताए ।

उनले अहिले पसलको ढोका आधा खोलेको देखिन्छ । सदरमुकाम मार्तडीमा अशोक जनरल स्टोर नामको उनको पसलमा दैनिक उपभोग्य सामान सजाएर राखेका छन् । व्यावसायी बिक त्यहीँ पसलको काउन्टरमा राखेको कम्प्युटरमा व्यस्त हुन्छन् । उनीसँग कम्प्युटरसँगै वाइफाइको सुविधा पनि छ ।

‘मार्तडीका १ हजार भन्दा बढी साथीहरू मसँग फेसबुकमा जोडिएका छन् । उनीहरू सामान किन्नका लागि म्यासेज पठाउँछन्’ उनले भने, ‘ग्राहकले सामान किन्नका लागि पसल आउन लकडाउनले गाह्रो छ भन्छन् । म आफैँ सामानको अर्डर माग्छु र नजिकको स्थानमा पुर्याइदिन्छु ।’

उनी बिहान ११ देखि दिउँसो ३ बजेसम्म ग्राहकलाई सामान पुर्याउन आफैँ खटिने गरेका छन् । अशोक जनरल स्टोरका सञ्चालक बिकले भन्छन्, ‘ग्राहकको दैलोमा सामान राख्यो पैसा बुुझ्यो आफू पनि ढुक्क ग्राहक पनि ढुक्क ।’

उद्योग वाणिज्य संघको मूल्य सूचीकै आधारमा सामान ग्राहकको दैलोमा पुर्‍याइरहेको उनले बताए । अहिले पनि आफ्नो दैनिक १० हजार बढीको कारोबार भइरहेको व्यावसायी बिकले बताए । सामान्य अवस्थाभन्दा अहिले आफ्नो व्यापार राम्रो भएको उनले बताए ।

लकडाउनका बेला घरमै सामान पुग्दा ग्राहकलाई पनि सजिलो भएको छ । ‘लकडाउनमा सामान पुग्दा खुसी लागेको छ । साउजीलाई म्यासेज गर्छु त्यसपछि टेलिफोनमा कुरा हुन्छ । सामान लिएर आउनुहुन्छ, सामान पनि गुणस्तरिय छ’ अनलाइन ग्राहक तथा बहुुक्षेत्रीय पोषण परियोजना बाजुराका संयोजक नरवहादुर आउजीले भने, ‘पसलमै गएर किन्दा सामाजिक दूरी कायम नहुन पनि सक्छ, साहुजी पनि ढुक्क हामी पनि ढुक्क ।’

लकडाउनका कारण अहिले सदरमुकाम मार्तडीमा बिहान ११ देखि दिउँसो ३ बजेसम्म पसल फाटफुट खुलिरहेका छन् । डेढ महिना बढी यहाँका होटेल, पसल ठप्प हुँदा स्थानीय मारमा छन् । यद्यपि टेलिफोन र इन्टरनेटको पहुँचमा हुने सदरमुकाम नजिकका ग्राहकहरूले भने व्यापारीलाई फोन गरेरै भए पनि सामान मगाउन थालेका छन् ।

प्रकाशित मिति: सोमबार, वैशाख २९, २०७७ ०८:३३