घुम्तीमा हुने दुर्घटना रोक्न विद्यार्थीले बनाए नयाँ यन्त्र

A+ A A-

लुम्बिनी इन्जिनियरिङ कलेजमा सिभिल इन्जिनियरिङ अध्ययन गरिरहेका पाँचौँ सेमेस्टरका विद्यार्थीहरूले एक नयाँ आविष्कार गरेका छन् । उनीहरूले पहाडका घुम्तीहरूमा हुने सकड दुर्घटनालाई न्यूनीकरण गर्न सकिने ‘रोड एक्सिडेन्ट प्रिभेन्सन, स्टम इन टर्निङ (संकेत दिने यन्त्र) को आविष्कार गरेका हुन् ।

पहाडका घुम्तीहरूमा सवारीसाधन ओभरटेक गर्दा हुने दुर्घटनालाई लक्षित गरेर विद्यार्थीहरूले सेन्सरसहितको उक्त उपकरणको आविष्कार गरेका हुन् ।

रूपन्देहीको तिलोत्तमा नगरपालिका भलवारीस्थित सो कलेजका विद्यार्थीहरूले तयार गरेको सो उपकरणमा आईआर मोडुल सेन्सर जडान गरिएको छ ।

विद्यार्थीहरू कमल थापा, प्रदीप थापा, माधव श्रेष्ठ, लक्ष्मण भण्डारी र आयुष पौडेलको टिमले बनाएको यो उपकरण एसी र डीसी दुवैमा सञ्चालन हुने बताइएको छ ।

बर्जर र लाइट जडान गरिएको यो उपकरणमा सवारीसाधन घुम्तीमा ओभरटेक गर्न खोज्दा बर्जर बज्नुका साथै लाइट पनि अटोमेटिक रूपमा बल्ने हुँदा यसले दुर्घटना न्यूनीकरणमा सहयोग पुग्ने विद्यार्थी कमल थापाले बताए ।

कलेजमा आयोजित लेक एक्स्पोमा विद्यार्थीहरूको यो उपकरण सबैको रोजाइ बन्न पुगेको छ ।

त्यस्तै, एक्स्पोमै राखिएको अल्कोहल डिटेक्सन सेन्सरको पनि आकर्षण बढेको छ । विश्वास खरेल, मन्दिरा न्यौपाने, आचल श्रेष्ठ, सन्ध्या आचार्य र विशाल खत्रीले बनाएको यो प्रोजेक्टमा आडिनो सेन्सर र आडिनो प्रोगामिङ जडान गरिएको छ । यसले मदिराको अलकोलको मात्रा मापन गर्ने गरिन्छ ।

कलेजले २/२ वर्षमा विद्यार्थीहरूले तयार गरेका प्रोजेक्ट यसैगरी प्रदर्शन गर्दै आएको छ ।

कलेजका निर्देशक तुल्सीप्रसाद सापकोटाले विशेषगरी प्लस टु अध्ययनरत विद्यार्थी तथा रूपन्देहीका आमनागरिकलाई लक्षित गरी प्रदर्शनी गरिएको बताए । प्रदर्शनी हेर्न निजी तथा सरकारी विद्यालयका विद्यार्थीहरूको उपस्थिति रहेको उनले बताए ।

प्रदर्शनीमा इलेक्ट्रिक एण्ड इलेक्ट्रोनिकतर्फ १९, कम्प्युटरतर्फ ९ र सिभिलतर्फ २२ गरी कुल ५० वटा प्रोजेक्ट प्रदर्शनीका लागि राखिएको छ । त्यस्तै, प्रदर्शनीका लागि रोबर्टदेखि आर्कब्रिज, हाइड्रोपावर, थ्रिडी प्रिन्टर, मोबाइल एपलगायत अन्य यन्त्र पनि राखिएको छ ।

प्रकाशित मिति: मंगलबार, फागुन १३, २०७६ १७:१९