खाल्डा सकेर रेलतिर लम्किएका बसन्त

A+ A A-

पछिल्लो पटक केपी शर्मा ओली नेतृत्वको सरकारमा आएका वसन्त नेम्वाङ चर्चामा रहेका छन् । जस्तो चर्चा २०७३ सालपछि नेपाल विद्युत् प्राधिकरणका कार्यकारी निर्देशक कुलमान घिसिङको भयो, डेढ वर्षपहिले त्रिभुवन अन्तर्राष्ट्रिय विमानस्थलका महाप्रबन्धक रहेका राजकुमार क्षत्रीको भएको थियो ।

पछिल्लो १ महिनामा सरकारका भौतिक पूर्वाधार तथा यातायातमन्त्रीले गरेको कामबाट प्रशंसा भएको छ । गर्नैपर्ने केही काम गरेकै कारण पनि जनता खुसी देखिएका छन् ।

२०७३ साल कात्तिकबाट अन्धकारमा रहेको देशलाई लोडसेडिङमुक्त गराउने प्रयास घिसिङबाट भएको थियो । नाक थुनेर विमानस्थलको ट्वाइलेट जाने र बस्ने कुर्सीसमेत नभएको अवस्थामा विमानस्थलको पूर्वाधार विकासका साथै सरसफाइमा समेत ध्यान दिएका कारण तत्कालीन महाप्रबन्धक क्षत्रीको प्रशंसा भयो ।

पानीजहाज र मेट्रो रेलका सपनाका बीच पछिल्लो पटक सरकारका भौतिक पूर्वाधार तथा यातायातमन्त्री वसन्त कुमार नेम्वाङ चर्चामा आएका छन् । उनले काठमाडौंभित्रका केही खाल्डा-खुल्डी पुर्ने काम गरेका कारण उनीप्रतिको विश्‍वास बढेको छ । उनले सिंगो सरकारलाई बल पुग्ने काम गरेका छन् ।

जनता हिलोमा चिप्लेको र धुलोका कारण रुघाखोकीका पीडित थिए । जनताले सरकारले देखाएजस्तै केही मिनेटमा पोखरा पुग्ने सपनाभन्दा पनि यी समस्याकाे समाधान खोजिरहेका थिए ।

राजनीतिमा लामो समय रहेर पनि अवसर नपाएका नेम्वाङ पहिलोपटक मन्त्री बनेका हुन् । जसले अहिले कम्तीमा काठमाडौंवासीको मन जितेका छन् । मन्त्री नेम्वाङका अनुसार उनी मन्त्री भएपछिको १ सय दिनको अवधिमा साढे ९ हजार खाल्डाखुल्डी पुरिएका छन् ।

२४ हजार ३ सय वर्गमिटर क्षेत्रफल खाल्डाखुल्डी भएको क्षेत्र पुरिएको छ । जसको सुविधा अहिले आमसर्वसाधारणले लिएका छन् । सबैभन्दा बढी समस्याग्रस्त सडकको रूपमा रहेको चाबहिल–चुच्चेपाटी सडकमा पनि उनकाे ध्यान पुगेकाे छ ।

मन्त्री नेम्वाङले मुख्यतया ३ वटा विषयलाई स्थापित गरेकाे देखिएको छ । १. भुक्ने कुकुरले टोक्दैन, २. गरे के हुँदैन ३. बलियो नेतृत्व हुँदा संयन्त्र परिचालन गर्न सकिन्छ ।

पछिल्लो पटक ५ मंसिरमा नियुक्ति पाएका मन्त्रीहरूमध्ये सबैभन्दा कम बोल्ने मन्त्री उनै नेम्वाङ थिए । उनले प्रधानमन्त्रीले विश्‍वास र जनताको सेवाका लागि मन्त्रालयको जिम्मेवारी पाएको बताएका थिए ।

उनको पहिलो कामकाे रूपमा केरूङ–काठमाडौं रेलमार्गको सम्भाव्यता अध्यनको फाइलमा हस्ताक्षर गर्ने भए पनि उनको ध्यान भने सडकका खाल्डा पुर्नमै केन्द्रित भयो । जुन काम गर्नका लागि पटक-पटक प्रधानमन्त्री ओलीले तत्कालीन मन्त्री रघुवीर महसेठलाई लगाएका थिए ।

उनले कम बोलेर पनि पछिल्लो समयमा उनीमाथिको विश्‍वास बढेको देखिएको छ । मन्त्री नेम्वाङका अनुसार असारसम्ममा ८५ हजार किलोमिटर कालोपत्रे गर्ने योजना छ ।

सरकारमा गएर काम गर्न नसकेपछि मन्त्रीहरूको एउटा गुनासो हुने– यो कर्मचारी संयन्त्रसँग काम गर्न नसकिने रहेछ । तर, मन्त्रीले ठीक नीति लिन सकेमा उनै मन्त्रीका कारण पनि काम गर्न सकिन्छ भन्ने उदाहरण नेम्वाङले देखाएका छन् ।

पूर्व अर्थसचिव रामेश्‍वर खनालले केही दिनअघि मन्त्री नेम्वाङको प्रशंसा गर्दै नेकपाले योग्य व्यक्ति नचिनेर २० महिना खेर फालेको उल्लेख गरेका छन् ।

नेम्वाङ आएपछि निजीक्षेत्रले पनि सौहार्द्रपूर्ण वातावरणमा काम गर्न पाएको बताउँदै आएकाे छ । हामीले खोज्ने भनेकाे उचित वातावरण हो, यसमा मन्त्रीज्यू सकारात्मक र सहयोगी देखिनुभएको छ, नेपाल निर्माण व्यवसायी महासंघका अध्यक्ष रवि सिंहले भने ।

अहिले मन्त्री नेम्वाङले आश्‍चर्यचकित पारेका छन् । सडकको मर्मत सम्भार र वर्षौं नयाँ मन्त्रीले प्रतिवद्धता जनाएर पनि नभरेका खाल्डाखुल्डी भरेका मात्रै हुन् ।

रातदिन आफैँ पनि खटिएर सडकका खाल्डाखुल्डी पुरेका मन्त्रीले आगामी असारभित्रै जयनगर–जनपुर रेल सञ्चालनमा ल्याउने प्रतिवद्धता जनाएका छन् । अन्य राजमार्ग सुधारको काममा र राष्ट्रिय गौरवका आयोजनाका गति वृद्धिमा पनि केन्द्रित हुने बताएका छन् ।

प्रकाशित मिति: शुक्रबार, चैत ७, २०७६ १७:३३