नेपाली कलाकारः को, कति पढ्छन् ?

A+ A A-

कलाकारिता त्यस्तो पेसा हो, जसले समाजको यथार्थचित्र प्रस्तुत गर्छ । र, समाजलाई सत्मार्गमा अघि बढाउन अभिप्रेरित छ । नागरिककमा चेतनाको बहाव ल्याउन कलाकारिताको भूमिका प्रधान हुन्छ ।

तर, नेपालमा कलक्षेत्रमा लाग्नेको क्षमता र अध्ययनमाथि प्रायः प्रश्न उठिरहेको हुन्छ । नागरिकमा चेतना ल्याउन र समाज सकारात्मक दिशामा अघि बढाउने कलाकारले कतिको पढ्छन् त ? चलचित्रमा जमेका केही स्थापित कलाकार र उनीहरुले आफूले गरेको अध्ययनलाई यसरी व्यक्त गरेका छन् ।

विपिन कार्की, अभिनेता

पछिल्लो समय लेखक नव सिलवालको उपन्यास ‘थोत्रो छाता’ पढेँ । पुस्तकमा नेपाल प्रहरीले मिसनमा जाँदा भोग्नुपरेको पीडालाई मार्मिक ढंगमा प्रस्तुत गरिएको छ ।

स्कुले जीवनदेखि नै उपन्यास, कथा, कविता पढ्नमा रुचि राख्थें । पछिल्लो समय कविता पढ्नमा रुचि बढेको छ । कविता पढ्दा आनन्द लाग्छ । कवितामा थोरै शब्दले धेरै ज्ञान दिन्छ ।

अमर न्यौपानेको उपन्यास ‘सेतो धरती’ पढ्दा भावुक भएँ । यीलगायत थुप्रै पुस्तक पढ्दा भाबुक भएको छु । हामी कलाकारलाई पुस्तकका छोटा अंशले पनि छुन्छ । पुस्तकले मानिसको जीवनमा परिवर्तन ल्याउँछ ।

लेखाई र भाषालाई बढी प्राथमिकता दिएर अध्ययन गर्छु । र, साथीभाइले सिफारिस गरेको अधारमा पुस्तक छनोट गर्ने बानी छ । पत्रपत्रिकामा आएका सामग्रीले पनि पुस्तक छनोट गर्न सजिलो बनाउँछ ।

पस्तक पढ्ने कुनै निश्चित समय छैन । तर बेलुकीको समय उपयुक्त लाग्छ । दिनको एकपटक पुस्तक पढिनँ भने के विर्सिएँ जस्तो लाग्छ ।

पढ्न मन लागेर पनि पढ्न नपाएका थुप्रै पुस्तक छन् । नारायण वाग्लेको ‘कोरियाना कफी गफ’ पढ्न पाइरहेको छैनँ । अब पढ्छु ।

कलाकारले भाषा, साहित्यप्रति दख्खल राख्यो अभिनयलाई पनि फाइदा पुर्याउँछ । आफूले अभिव्यक्ति गर्न खोजको कुरालाई फाइदा पुर्याउँछ । कलाकारको लागि अध्ययन अतिआवश्यक छ ।

पुस्तकका लागि वर्षको लगभग १०÷१२ हजार रुपैयाँ जति खर्च हुन्छ । प्राय पुस्तक किनेर पढ्ने बानी छ । कहिलेकाहीं साथीसँग आदानप्रदान गरेर पनि पुस्तक पढ्छु । आफूलाई मन परेको कुरा साथीले पनि पढोस् जस्तो लाग्छ ।

वर्षा राउत, अभिनेत्री

उपन्यास, कथा, कविता अध्ययन गर्ने बानी छैन । म खासै कुनै पुस्तक पण््दिनँ । अनलाइनमा पुस्तक पढेको सुनेको छु । सुन्न चाहिँ मन पर्छ । काल्पनिक कथा सुन्न रुचाउँछु ।

देशको समसामयिक घटनाप्रति अपडेट हुन्छु । सामाजिक सञ्जालमा आएका समाचार पढ्छु ।

कलाकारले उपन्यास, कथा, कविता पढ्नै पर्छ भन्ने पनि छैन । आ–आफ्नो इच्छाको कुरा हो । सबै किताबहरु पढेर विद्धान भइन्छ भन्ने पनि छैन । पुस्तकहरु नपढ्दैमा अनपढ भन्न पनि मिल्दैन ।

चलचित्र उद्योगमा व्याचलर, मास्टर्स सकेर आएका कलाकाहरु पनि छन् । सबै आफ्नो फिल्डमा पोख्त हुनुहुन्छ । अभिनयको हिसाबले हामी कलाकाले पुस्तकै नपढेमा पनि आफ्नो तरिकाले अध्ययन गरेका हुन्छौं ।

पुष्प खड्का, अभिनेता

समय मिलेसम्म विभिन्न पुस्तक पढ्ने गर्छु । प्रायः फिल्म र नाटकसँग सम्बन्धित पुस्तक पढ्छु । तर आजकाल पढ्ने बानी घटेको छ । समय म्यानेज गर्न अलि मुस्किल हुन्छ ।

मेरा केही साथी पुस्तक धेरै पढ्छन् । उनीहरुको सल्लाहअनुसार किताब छान्छु । र पढ्छु । मैले किनेको पुस्तक भनेको बुद्धिसागरको ‘कर्णाली ब्लुज’ हो । यो पुस्तकले अत्यन्तै मन छोयो ।

पछिल्लो समय सुविन भट्टराईको ‘समर लभ’ पढेँ । पहिले जीवनी अलि बढी पढ्थेँ । ‘समर लभ’ पढेपछि यस्ता पुस्तकहरु पनि पढ्नुपर्ने रहेछ भन्ने लाग्यो ।

कलाकारलाई ‘माइन्ड ब्यालेन्स’ गर्न बाहिरी पुस्तकले फाइदा पु¥याउँदो रहेछ ।

विल्सनविक्रम राई, कलाकार

पछिल्लो समय भैरव रिमालका अधिकांश कथा पढेँ । मलाई नेपाली मौलिक कथा बढी मन पर्छ । विदेशी पुस्तकहरु भन्दा पनि नेपाली पुस्तकहरु पढ्छु ।

उपेन्द्र सुब्बाको ‘लाटो पहाड’ कथा संग्रह पढ्दा निकै भावुक भएँ । यो पुस्तक मेरो पिता पुर्खाको कथा जस्तो लाग्यो । यो पुस्तकले मलाई बढी नै छोयो । मानिसलाई अध्ययनले जीवन जिउँन मद्दत गर्छ ।

पढ्नका लागि साथीहरुले पुस्तक सिफारिस गर्छन् । पत्रिकामा समीक्षा पढ्छु । त्यहीं आधारमा पुस्तक छनोट गर्छु । प्लेनमा यात्रा गर्दा पुस्तक पढ्न मजा लाग्छ ।

बिहान बेलुका फुर्सदको समयमा पुस्तक पढ्छु । प्रायः पुस्तक किनेरै पढ्ने बानी छ । नेपाली भाषा, सँस्कृति, सभ्यता र इतिहास बुझ्न पुस्तक पढ्नु आवश्यक छ ।

सिर्जना सुब्बा, अभिनेत्री

केहिदिन देखि बौद्धिस्वात्व स्वामी आनन्द अरुणको ‘अचम्म जो मैले देखेँ’ पुस्तक पढ्दै छु । पहिला अग्रजलाई सोधेर पुस्तक छान्थेँ । अचेल आफैं रोजेर पढ्छु ।

ऐतिहासिक पुस्तक मन पर्छन् । सँगै जीवनी पढ्दा पनि आनन्द लाग्छ ।

मान्छेको जीवनमा पुस्तकले महत्वपूर्ण भूमिका खेल्छ । हामी कलाकारको लागि झन् धेरै पुस्तक पढ्नु आवश्यक छ । पुस्तकसँगै सामाजिक सञ्जालमार्फत् समसामयिक विषयमा पनि अपडेट हुन्छु ।

पढ्नका लागि बिहान–बेलुकाको समय उपुयुक्त लाग्छ । होहल्लामा पढ्न सक्दिनँ । कतै जाँदामा पनि साथमा पुस्तक चाहिँ हुन्छ । मौका मिले पढ्छु । समयको सदुपयोग गर्छु ।

कुनै पुस्तकका पात्रलाई आफूमा ढालेर पढ्न स्वाद पर्छ । पुस्तक किनेर पुढ्छु । खासै आदानप्रदान गर्दिनँ ।

पछिल्लोपटक बुद्धिसागरको ‘कर्णाली ब्लुज’ पढ्दा भावुक भएको थिएँ । पढ्न मन लागेका थुप्रै पुस्तक छन् । तर, भ्याएको छैन ।

प्रकाशित मिति: शनिबार, साउन २५, २०७६ २१:०१