हट्ने नै हुन् त पूर्वराजा ज्ञानेन्द्र नागार्जुनबाट ?

A+ A A-

दुई सय ३७ वर्ष लामो शाह वंशीय राजसंस्थाको अन्त्य भई गणतन्त्र घोषणा भएको १२ वर्षपछि २९ जेठ २०६५ मा तत्कालीन राजा ज्ञानेन्द्र नारायणहिटी राजदरबार छोडेर नागार्जुन दरबार पुगे । नागार्जुन पुगेका पूर्वराजा ज्ञानेन्द्र फेरि सत्तामा आउँलान् भन्ने अपेक्षा कतिपयले गरेको सुनिन्छ । कतिपयलाई भने ज्ञानेन्द्र सत्तामा आउने हुन् की भन्ने आशंकाले पिरोल्छ ।

राजसंस्था र पूर्वराजा ज्ञानेन्द्रका गतिविधिलाई नजरअन्दाज गर्न सकिने अवस्था पनि छैन । सरकारको रक्षा मन्त्रालयको जिम्मेवारी सम्हालेका उपप्रधानमन्त्री ईश्वर पोखरेल १७ साउनमा रक्षा सचिवसहित निर्मल निवास पुगेका थिए ।

रक्षामन्त्रीले आफूनो निर्मल निवास प्रवेशलाई अस्वीकार गरे पनि प्रधानमन्त्रीका परराष्ट्र सल्लाहकार डा. राजन भट्टराईले रक्षामन्त्री निर्मल निवास पुगेको घुमाउरो ढंगले स्वीकार गरेका छन् । तत्कालिन राजाको नाममा रहेको सम्पतिलाई नेपाल ट्रष्ट मातहत ल्याउनको लागि त्यस्ता सम्पतिको खोजीमा रक्षामन्त्री लाग्नु भएको भट्टराइले एक टिभी च्यानललाई दिएको अन्तरवार्तामा जनाएका छन् ।

२१ साउनमा दिइएको अन्तर्वार्तामा भट्टराईले उपप्रधानमन्त्री पोखरेलले ट्रष्टको प्रमुखको हैसियतमा निर्मल निवाससहित पूर्वराजा वीरेन्द्रको सम्पतिका सम्वन्धमा बुझ्ने काम गरीरहेको स्वीकारेका छन् । पोखरेल ट्रष्टको कार्यसमिति अध्यक्ष हुन् ।

राष्ट्रिय प्रजातन्त्र पार्टीका अध्यक्ष कमल थापाले साउन पहिलो साताबाटै देशव्यापी रुपमा हिन्दुराज्यसहितको संवैधानिक राजतन्त्रको पक्षमा अभियान शुरु गरिरहेका छन् ।

पूर्वराजा ज्ञानेन्द्र शाह थाइल्याण्डको राजधानी बैंककमा एक महिना बसेर २ असारमा काठमाडौं फर्र्किए लगत्तै विभिन्न राजनैतिक दलका नेतासँगको भेटलाई तिब्रता दिएका थिए ।

पूर्वराजा ज्ञानेन्द्रको गतिविधिलाई नजिकबाट नियालिरहेका सत्तारुढ नेकपा अध्यक्ष पुष्पकमल दाहाल प्रचण्डले १९ साउनमा रामेछापस्थित सुनकोशी नदीमाथिको पुल उद्घाटन गर्दै ज्ञानेन्द्रले धेरै बकबक गरे नागार्जुन दरबारबाट निकाल्ने चेतावनी दिए ।
दाहालले पूर्वराजा ज्ञानेन्द्र शाहको गतिविधिप्रति असन्तुष्टी जनाउँदै राजाका केही दासहरुले सरकार र व्यवस्था नै परिवर्तन गर्न लागेको भन्दै नसच्चिएमा नसोचेको हविगत हुने चेतावनी दिए ।

पूर्वराजा ज्ञानेन्द्र बैंककबाट नेपाल फर्कनु र नेपालमा दाहाललाई अन्तराष्ट्रिय फौजदारी अदालतमा उभ्याउने भन्दै सामाजिक सञ्जालमा चर्चा चल्नु संयोग मात्र नहुन सक्छ ।

त्यही दिन राप्रपा अध्यक्ष कमल थापाले नेकपा अध्यक्ष दाहालको अभिव्यक्तिप्रति आपत्ति जनाउँदै सत्ताको असफलताको आवेग भनि टिप्पणी गरेका थिए ।

पूर्वराजा ज्ञानेन्द्र शाहले जेठ २०५८ देखि २०६३ बैशाखसम्म दिएका सन्देश, अन्तर्वार्ता र लेख समावेस गरी तयार पारिएको पुस्तक ‘सन्देश संग्रह’ यसै १९ साउनमा सार्वजनिक भयो । पुस्तकमा उनको ‘अन्तरमनको मेरो स्पन्दन’ आलेख पनि समावेस गरिएको छ ।

पूर्वयूवराज्ञी हिमानी शाहले स्थापना गरेको हिमानी ट्रष्टले प्रकाशित गरेको सो पुस्तकको मुल्य पाँच हजार पाँच सय राखिएको छ । हिमानीले पूर्वराजा ज्ञानेन्द्रको अनुपस्थितिमा छोरी पूर्णीकालाई साथ राखेर पुस्तक सार्वजनिक गरेकी थिइन् ।

पुस्तक सार्वजनिक भएको तीन दिनपछि नै कांग्रेस नेता कृष्णप्रसाद सिटौलाको अन्तर्वाता बीबीसी नेपाली सेवामा आयो । उनले पूर्वराजा ज्ञानेन्द्रलाई नागार्जुन दरबार अस्थायी निवासको रुपमा प्रयोग गर्न तत्कालिन मन्त्रीपरिषद्को निर्णयबाट दिइएकोे भनाई सार्वजनिक गरे ।

सिटौलाले पूर्वराजा ज्ञानेन्द्रलाई नागार्जुन दरबारबाट हटाउन लागिएको जानकारी प्रमुख प्रतिपक्षी कांग्रेसलाई नभएको भन्दै नागार्जुन दरबारलाई सरकारले प्रयोग गर्न आवश्यक ठानेमा ज्ञानेन्द्रबाट फिर्ता लिन सक्ने पनि बताए ।

सिटौलाले पूर्वराजा ज्ञानेन्द्रको गतिविधि परिवर्तन विरुद्ध भएमा त्यसलाई रोक्नु राज्यको दायित्व भएको पनि बताए ।

कांग्रेस महामन्त्री डा. शशांक कोइराला भने आफू हिन्दुराज्यको पक्षमा रहेको बताउँदै आएका छन् । कांग्रेसका सांगठनिक गतिविधिमा संलग्न कोइरालाले हिन्दुराज्यको पक्षमा दिएको अभिव्यक्तिलाई धेरैले संयोगको रुपमा मात्र हेरेका छैनन् ।

प्रधानमन्त्री केपी शर्मा ओली स्वास्थ्य उपचारको क्रममा सिंगापुर गएको बेला पूर्वराजा ज्ञानेन्द्रका गतिविधिलाई लिएर भएका चर्चा र टिप्पणी र अहिले सत्तारुढ दलमा देखिएको नयाँ समीकरणलाई संयोगमात्र होला भन्नेमा आशंका गर्नसकिन्छ ।

प्रधानमन्त्री केपी शर्मा ओलीका कट्टर आलोचक भनेर चिनिएका नेकपा सचिवालय सदस्य बामदेव गौतमलाई अखिल नेपाल किसान संघ र संगठन विभाग प्रमुख जस्ता महत्वपूर्ण सांगठनिक जिम्मेवारी दिइनुले राजावादीलाई खुसी लागेको हुनसक्छ । तर पछिल्लो समय बामदेव फेरि ओली खेमामा गएको खबर आउनुले सत्तारुढ दलभित्र उथलपुथलको संकेत गर्छ ।

पूर्वराजा ज्ञानेन्द्र शाहसँगको सम्बन्ध सुमधुर बनाएका गौतमलाई आफू निकटमा ल्याएर सत्तामाथि हुन सक्ने आलोचनालाई मत्थर गर्ने प्रधानमन्त्री ओलीले प्रयास गरेको आशंका विपक्षी दलहरुमा व्याप्त छ ।

नेपाल ट्रष्टका अध्यक्ष उपप्रधानमन्त्री ईश्वर पोखरेल रक्षा मन्त्री समेत हुन् । सरकारले एक बर्ष अघि नै काठमाडौं नीजगढ फाष्ट ट्रयाक निर्माणको जिम्मेवारी दिएर पनि हालसम्म डीपीआर स्वीकृत नगर्नुलाई सरकार सेनाको सम्वन्धमा आएको चिसोपनका रुपमा आंकलन गर्न थालिएको छ ।
त्यसका साथै ६ महिनाअघि संसदमा दर्ता भएको राष्ट्रिय सुरक्षा परिषद् ऐन संशोधनको बिषयलाई लिएर नेपाली सेना भित्र पनि छलफल हुन थालेको छ । स्रोतका अनुसार संसदमा दर्ता गराएको विधेयकमाथि प्रतिपक्षी दलको विरोध हुँदा समेत संशोधन, फिर्ता वा अघि बढाउने कुनै निर्णय नगरेकोमा सैनिक नेतृत्व सशंकित छ ।

चौतर्फी विवाद र आशंका बढीरहेको तथा नेपालमा हिन्दु राज्य र राजसंस्थाको बिषयमा चर्चा चुलिएकै बेला ज्ञानेन्द्र भने शुक्रबार फेरि थाइल्याण्ड प्रस्थान गरेका छन् । हिमानी दुई दिनअघि नै दुवै छोरी लिएर थाइल्याण्ड पुगिसकेकी छिन्् । विगतमा थाइल्याण्ड बस्दै आएका पूर्व युवराज पारस भने लामो समयदेखि काठमाडौमा नै छन् । पारस बंैकक बसाइमा लागु औषध कारोवारमा जेल समेत बसेका थिए ।

प्रकाशित मिति: शनिबार, साउन २५, २०७६ ०५:३५