जब आफ्नो पार्टीको चुनाव चिह्न हुनुपर्नेमा अर्कैको चिह्न राखेर मतपत्र छापियो

जब आफ्नो पार्टीको चुनाव चिह्न हुनुपर्नेमा अर्कैको चिह्न राखेर मतपत्र छापियो

A+ A A-

नेपाल सद्भावाना पार्टीबाट रौतहट–१ को प्रदेश ‘क’ मा उम्मेदवारी दिएका श्रीराम साह पाँच दिनअघि मुख्य निर्वाचन अधिकृतको कार्यालयमा नमुना मतपत्र लिन गए । नमुना मतपत्र लिन गएका उनले मुल मतपत्रमा आफ्नो चुनाव चिह्न देखेनन् । उनको चुनाव चिह्न पञ्जा छाप हुनुपर्नेमा राष्ट्रिय सद्भावना पार्टीको गदा चिह्न मतपत्रमा कायम थियो । जबकी राष्ट्रिय सद्भावना पार्टी चुनावमा सहभागी नै भएको छैन ।

‘मेरो नाम मिलेको छ । चुनाव चिह्न थिएन । चिह्न पञ्जा छाप हुनुपर्ने गदा भएर आएछ,’ साहले शिलापत्रसँग भने, ‘निर्वाचन अधिकृतको कार्यालयबाट त्रुटी भएको रहेछ ।’ मनोनय गर्दा आफूले सम्पूर्ण विवरण नेपाल सद्भावाना पार्टीको बुझाएको बताए । ‘मनोनयन गर्दा सबै विवरणमा आफ्नै पार्टीको छ । चुनाव चिह्न अर्कै पार्टीको आयो,’ उनले भने ।

उनले मुख्य निर्वाचन अधिकृत मातृका मरासिनीलाई आफ्नो चिह्न नभएको जानकारी गराए । उनले मुख्य निर्वाचन अधिकृतलाई जानकारी गराउदासम्म जनक शिक्षा सामग्री केन्द्रमा मतपत्र छपाइ भइसकेको थियो । अधिकृतको कार्यालयले प्राविधिक त्रुटी भएको स्वीकार गरेको छ ।

‘काम गर्दा समस्याहरू आउँछन् । यसमा पनि प्राविधिक त्रुटी भएको हो,’ मुख्य निर्वाचन अधिकृत मरासिनीले भने । रातारात निर्वाचन आयोगले रौतहट १ ‘क’ को पतपत्र पुनः छपाइ गरेको छ । ‘मतपत्र छपाइ भएर मतदान अधिकृतले बुझिसक्नु भयो अब समस्या छैन,’ मरासिनीले भने । मतपत्रमा चुनाव चिह्न भएको राष्ट्रिय सदुभावना पार्टीका अध्यक्ष दिनेश यादावले आफ्नो पार्टी चुनावमा सहभागी नभएको बताए । ‘हाम्रो उम्मेदवार कहीँ उठाएको छैन,’ उनले भने ।

पुनः मतपत्र छपाइ

आयोगका अनुसार उक्त क्षेत्रका लागि पुनः ५७ हजार मतपत्र छपाइ भएको छ । ‘उम्मेदवारको चुनाव चिह्न फरक परेकाले फेरि मतपत्र छपाइ गर्नुपर्‍यो,’ आयोगका एक अधिकारीले भने, ‘पहिले छापेको मतपत्र खेर गयो ।’

दोहोरार्‍याएर मतपत्र छपाइ गर्दा थप आर्थिक भार परेको आयोगका अधिकारीहरू बताउँछन् । मतपत्र छपाइका लागि कति खर्च भयो आयोगले सार्वजनिक गरेको छैन । ‘मतपत्र छपाइको रेट जनक शिक्षासँग मागेका थियौँ । जुन रेट चित्त नबुझेपछि थप छलफल हुँदैछ । मतपत्र क्षेत्र क्षेत्रमा पुगेको छ । छपाइदेखि ढुवानीसम्म जोडेर खर्च निकाल्ने तयारी छ,’ आयोगका एक अधिकारीले भने ।

प्रकाशित मिति: बिहीबार, मंसिर १, २०७९ १९:२९