२०४८ सालदेखिको कांग्रेसको विरासत शशांक कोइरालाले जोगाउन सक्लान् ?

A+ A A-

४ मंसिरमा हुने संसदीय चुनावमा नेपाली कांग्रेसका पूर्वमहामन्त्री डा. शशांक कोइराला र एमालेका कृष्ण प्रसाद पौडेल नवलपुर १ (बर्दघाटबाट सूस्तापूर्व) बाट प्रत्यक्ष चुनाव लड्दैछन् ।

पौडेलका लागि यो क्षेत्र नयाँ हो भने यसै क्षेत्रबाट पटकपटक निर्वाचित भएका कोइराला चौथोपटक लड्दैछन् । उनले आफ्ना लागि यो अन्तिम चुनाव भएको घोषणा गरिसकेका छन् । ‘मलाई प्रधानमन्त्री बनाउनका लागि चुनाव जिताउनुस्, अर्कोपटकदेखि उठ्दिनँ,’ कोइरालाले भनेका थिए ।

यसअघिका तीन चुनावमा यसै क्षेत्रबाट सांसद बनेका उनी यसपटक चौथो पटक सत्तारुढ गठबन्धनका साझा उम्मेदवार बनेका हुन् । २०७४ मा उनी ४ हजार २४ मतान्तरले विजयी भएका थिए । उनले ४० हजार ६ सय २० मत ल्याएका थिए । माओवादी केन्द्रका भविसोर पराजुलीले ३६ हजार ५९६ मत ल्याएका थिए । २०७४ मा वाम गठबन्धनका उम्मेदवारलाई पराजित गर्दै कोइराला विजयी बनेका थिए । यसरी हेर्दा शशांक बलिया देखिन्छन् ।

यसपटक एमालेका पौडेलले कोइरालालाई चुनौती दिँदैछन् । २०७० को दोस्रो संविधानसभाको चुनावमा कोइराला तत्कालीन नवलपरासी क्षेत्र नम्बर १ बाट निर्वाचित हुँदा पौडेल क्षेत्र नम्बर ३ बाट विजयी भएका थिए ।

२०७२ मा जारी भएको संविधानअनुरूप ७ प्रदेश बन्दा नवलपरासी बर्दघाट सुस्ता पूर्व र पश्चिम गरी दुई जिल्लामा विभाजन भयो । त्यसैले नवलपुरको क्षेत्रगत विश्लेषणमा ऐतिहासिक चुनावी इतिहासलाई केलाउन जटिल देखिन्छ । तर, २०४८ देखि प्रत्येक संसदीय चुनाव जित्दै आएको नेपाली कांग्रेसको यस क्षेत्रमा पकड देखिन्छ ।

गत स्थानीय चुनावको परिणामले पनि यहाँ कांग्रेस बलियो देखिन्छ । अघिल्लो स्थानीय चुनावमा एमालेले जितेको गैँडाकोट नगरपालिकामा यसपालि कांग्रेसले जित्यो । देवचुली नगरपालिका र वुलिङटार गाउँपालिकाको मेयर र अध्यक्ष भने एमालेले जितेको थियो । यस क्षेत्रअन्तर्गत गैँडाकोट नगरपालिका र देवचुली नगरपालिकाका सबै वडा, कावासोती नगरपालिकाका ११ वडा र वुलिङटार गाउँपालिकाका सबै वडाहरू पर्दछन् ।

कोइरालाले भनेको ६ करोड

कोइराला तिनै नेता हुन् जसले गत वैशाखमा स्थानीय चुनावको मुखमा संसदीय चुनावमा ६ करोड खर्च गरेको बताएका थिए । २६ चैतमा नेपाल विद्यार्थी संघले आयोजना गरेको एक कार्यक्रममा कोइरालाले प्रतिनिधिसभाको चुनावमा ६ करोड रुपैयाँ खर्च भएको बताएका थिए ।

यसरी उनले आयोगको निर्वाचन खर्च सीमा तोड्दै आचारसंहिता उल्लंघन गरेको आफैँ उद्घोष गरेका थिए । चुनाव जित्नलाई पैसाको बाढी नै बगाउनुपर्छ भन्ने सन्देश दिएका कोइरालाको उक्त अभिव्यक्तिले गम्भीर प्रश्न उठाएको थियो ।

चार दशकदेखि सक्रिय पाैडेल

२०६४ सालको संविधानसभाको पहिलो निर्वाचनमा नवलपरासी २ बाट पराजित भएका कृष्णप्रसाद २०७० सालको संविधानसभा निर्वाचनमा विजयी भए ।

२०३७ मा अनेरास्ववियु नवलपरासीको उपाध्यक्ष रहेका पौडेल २०४१ मा अनेरास्ववियु लुम्बिनीको अध्यक्ष र २०४८ मा एमाले जिल्ला सचिव हुँदै गण्डकी प्रदेश सचिवालय सदस्य बनेका थिए । स्थानीय मतदातामाझ आफ्नो लोकप्रिय छवि भएको पौडेलको दाबी छ ।

प्रकाशित मिति: बिहीबार, मंसिर १, २०७९ २०:१८