भुसको आगोझैँ फैलिँदैछ डडेल्धुरामा सागरको ‘क्रेज’

A+ A A-

५ वर्षअघि गुल्मीका सागर ढकालको एउटा भिडियो भाइरल बनेको थियो । बीबीसी मिडिया एक्सनको साझा सवाल कार्यक्रमको उक्त भिडियोमा प्रधानमन्त्री शेरबहादुर देउवालाई प्रश्न गरेका सागर त्यतिबेला देशभरी नै चर्चित बनेका थिए । उनले ‘अक्सफोर्ड विश्वविद्यालय पढेको प्रधानमन्त्री हामी कहिले पाउँछौँ ?’ भन्दै देउवालाई प्रश्न गरेका थिए ।

त्यसको प्रतिउत्तरमा देउवाले झोक्किँदै ‘तपाईं बढ्ता बोल्दै हुन्छ’ भनेर जवाफ फर्काएका थिए । त्यतिबेला सागरले पुल्चोक क्याम्पसबाट हाइड्रो मेकानिकलमा बिई गरेका थिए भने ४१० मेगावाटको नलसिङगाड जलविद्युत् आयोजनामा करारको काम गर्थे ।

उनै ढकाल देउवाविरुद्ध चुनाव लड्न डडेल्धुरा पुगेका छन् । उक्त कार्यक्रमपछि उनी अध्ययन गर्न बेलायतको अक्सफोर्ड विश्वविद्यालय पुगे । त्यहाँबाट उनले पोलिसी एन्ड म्यानेजमेन्टमा एमएस्सी गरेका थिए । स्वदेश फर्किएपछि उनले देउवाविरुद्ध नै चुनाव लड्ने अठोट लिएका थिए । त्यसका लागि उनी पहिलोपटक गत असार २६ गते प्रधानमन्त्री एवम् कांग्रेसका सभापतिको गृहजिल्ला डडेल्धुरा पुगेका थिए । तर, देउवासँग चुनाव लड्न ढकाललाई फलामको चिउरा चपाउनुजस्तै छ ।

२०४८ सालबाट लगातार ६ पटक निर्वाचित भएका देउवा उसै पनि ‘हेभिवेट’ उम्मेदवार हुन् । त्यसैमा पुरानो प्रतिद्वन्द्वी नेकपा माओवादी केन्द्र सत्तारुढ गठबन्धन दलको सदस्य भएपछि जिल्लाबाट अत्यधिक मत ल्याउनेमा देउवा विश्वस्त छन् । तर पनि प्रधानमन्त्री शेरबहादुर देउवाले जिल्लामा दोहोर्‍याएर आमसभा गरेका छन् ।

डडेल्धुरा आउनुको कारण के ?

५ वर्षअघिको साझा सवालको कार्यक्रमबाट आफ्नो चित्त दुखेकै कारण देउवाविरुद्ध लड्न आएको ढकाल बताउँछन् । ‘म ४ महिनाअघि पहिलोपटक डडेल्धुरा आएको थिएँ । विशेषगरी साझा सवालको कार्यक्रमकै कारण र अन्य धेरै कारणले म डडेल्धुरा चुनाव लड्न पुगेको हुँ,’ उनी भन्छन्, ‘देउवा मेरो हजुरबुवा उमेरको मान्छे । अब उहाँलाई आराम चाहिएको छ । उहाँलाई आराम गराउने हो । अब देश विकास हामीजस्ता नातिले गर्ने हो ।’ उनीसँगै प्रदेशसभा निर्वाचन क्षेत्र नम्बर ‘क’ मा उम्मेदवारी दिएका महेशसिंह धामी पनि चुनावमा होमिएका छन् । धामीले नेकपा एमालेका पठानसिंह बोहरा र गठबन्धनका खगराज भट्टसँग प्रतिस्पर्धा गर्दैछन् ।

चुनाव जित्न यस्तो रणनीति !

विगत ४ महिनामा ढकाल जिल्लाको ५२ वटै वडामा पुगेको दाबी गर्छन् । उनी पुनः दोहोर्‍याएर बस्ती–बस्तीमा पुगेका छन् । विशेषगरी गाउँबस्तीमा भेला गरेर उनी मतदातालाई आफू इन्जिनियर भएकाकै कारण मत दिन आग्रह गरिरहेका छन् । उनी शेरबहादुर देउवाले जिल्लासहित देशमा केही विकास नगरेको भनेर पनि मतदातालाई आकर्षित गरिरहेका छन् ।

अब निर्वाचन आउन केही दिन बाँकी रहँदा उनी जिल्लाको भित्री मधेस क्षेत्रका मतदाता भेटिरहेका छन् । विगत ४ महिनामा जिल्लाको प्रमुख समस्याका रूपमा खानेपानी रहेको बताउने उनी निर्वाचित भएपछि सर्भे गरेर समस्या समाधान गर्ने बताउँछन् । आफूलाई युवाको साथ रहेको भन्दै उनले राम्रो मत आउने अनुमान गरेका छन् । उनले युवालाई नै ‘टार्गेट’ गरेर आफ्ना भेटघाट बढाइरहेका छन् ।

तर, युवामा मात्रै होइन वृद्धवृद्धा तथा महिला वर्गमा समेत उनको राम्रो प्रभाव छ । केही दिनअघि मात्रै जिल्लाको अमरगढी नगरपालिका–३ का केही महिला एकआपसमा सागर ढकालबारे कुराकानी गरिरहेका थिए । उनीहरू भनिरहेका थिए, ‘सबलाई हेरियो । यै पालि त सुई (सागर ढकालको चुनाव चिह्न) मा दिन्या हो (सबैको काम थाहा पाइसक्यौं । यसपटक सागरलाई मत दिनुपर्छ ।’

यसैगरी राजनीतिक दल तथा पुराना उम्मेदवारबाट दिक्क भएका मतदाताको रोजाइमा समेत ढकाल पर्ने सम्भावना बलियो छ । देशभर स्वतन्त्र उम्मेदवारको चर्चा चलिरहेका बेला डडेल्धुराका मतदाता पनि आफ्नो मत परिवर्तन गर्ने मुडमा रहेका आकलन एक प्राध्यापक गर्छन् । ‘यहाँ राजनीतिक दलप्रति वितृष्णा छ । उहीँ पुराना उम्मेदवारलाई देखेर जनता विरक्त भएका छन् । डडेल्धुरावासीले सबैको काम पनि हेरेकै हुन्,’ उनी भन्छन्, ‘यसपटक नयाँ अनुहारलाई जिताउने तयारी स्वतन्त्र मतदाताले गरेका छन् ।’

देउवाको विरोध गरेर मतदाता ‘डाइभर्ट’

५ वर्षअघि जस्तै प्रधानमन्त्री शेरबहादुर देउवाको विरोध गर्न ढकालले कतै छाड्दैनन् । ५ पटकसम्म जिल्लाले प्रधानमन्त्री बनाएको तर देउवाले केही नगरेको भनेर उनी सबैलाई भन्छन् । ‘देउवालाई कहिलेसम्म जिताएर पठाउने ? उनको विकल्प खोज्नुपर्छ’ ढकालले केही दिनअघि नवदुर्गा गाउँपालिमा भनेका थिए, ‘सबै पार्टीले पुरानै अनुहारलाई दोहोर्‍याउँदै छन् । तर अहिले सबैतिर स्वतन्त्रको लहर चलेको छ । मलाई जिताउनुस् काम गरेर देखाउँछु ।’ देउवा मात्रै होइन, सबै राजनीतिक दलको विरोधमा उनले धेरै समय खर्चने गरेका छन् ।

सामाजिक सञ्जालमा बलियो पकड

डडेल्धुराबाट उम्मेदवारी दिएका ढकालको विभिन्न सामाजिक सञ्जालमा बलियो पकड छ । उनले आफ्नै करिब ढेड लाख फ्लोअर भएको पेजमा कुनै सामग्री राख्दा लाखौँ भ्यूज आउँछ । यस्तै टिकटकमा समेत ढकालबारे विभिन्न सामग्रीले उनको प्रचारप्रसार गरिरहेको छ । त्यसैगरी विभिन्न युट्युबर तथा कलाकार आएर उनको प्रचारप्रसारलाई झनै उग्र बनाइरहेका छन् । त्यसैमा राष्ट्रिय मिडियाको प्रमुख रोजाइ पनि ढकाल भएकाले उनकै बारेमा धेरै सामग्री सामाजिक सञ्जालमा फैलिरहेको छ ।

गोप्य समर्थन !

७ स्थानीय तह तथा ५२ वडा रहेको डडेल्धुरामा पछिल्लो तथ्यांकअनुसार ९१ हजार २ सय १ जना मतदाता रहेका छन् । जसमा महिलाको संख्या ४५ हजार ८ सय ९ र पुरुषको संख्या ४५ हजार ३ सय ९२ रहेको छ । हालै सम्पन्न स्थानीय तहको मत परिणामलाई केलाउने हो भने जिल्लामा गठबन्धनमा आवद्ध दल नै बलियो छन् । तर, तीमध्ये धेरै आफ्नो पक्षमा रहेको तर बाहिर नखुलेको ढकाल दाबी गर्छन् ।

‘मैले सबैलाई भेटेको छु । सबैले सहयोग गर्छन् । देशबाहिर रहेका युवाहरूले पनि यता फोन गरेर सहयोग गर्न आग्रह गरिहेका छन्,’ उनी भन्छन्, ‘हामीले हाम्रो समर्थनलाई गोप्य राखेका छौँ । यदि पुराना पार्टी जस्तै फिल्डमा उतार्ने हो भने जनसागर उर्लिन्छ । तर, हाम्रो जनसागर मंसिर ४ गतेको मतपेटिकामा देखिन्छ ।’

हुन पनि ढकालले चुनाव लड्ने कुरा गरिरहँदा ‘उसको त सय मत पनि कट्दैन होला’ भन्नेहरू अहिले उनले राम्रो मत ल्याउने आकलन गरिरहेका छन् । बस्तीबस्ती छिरेका ढकालले धेरै मतदाता प्रभावित पारेको स्वयम् कांग्रेसकै एक नेता बताउँछन् । ‘हामीले सुरुमा उनको उम्मेदवारीलाई ‘अन्डरइस्टिमेट’ गरेका थियौँ । तर, पछिल्लो समय उनले धेरै मतदातालाई भेटेर हो कि के प्रभाव हो, उनीप्रति क्रेज बढेको छ,’ ती नेताले भने ।

प्रकाशित मिति: बिहीबार, मंसिर १, २०७९ २२:२४