चुनाव बिथोल्ने घोषणा गरेको विप्लवको पार्टीले हिंसाको बाटो रोजेको हो ?

A+ A A-

बाँकेको नेपालगञ्जस्थित भृकुटीनगरमा बुधबार साँझ बम बनाउने क्रममा विस्फोट हुँदा दुई जना घाइते भए । प्रहरीको अनुसन्धानबाट दुवै जना नेत्रविक्रम चन्द विप्लव नेतृत्वको नेपाल कम्युनिस्ट पार्टीको कार्यकर्ता रहेको खुलेको छ ।

स्थानीय श्रीकला मल्लको घरमा बस्दै आएका विप्लव विद्यार्थी नेता डिल्लीबहादुर डीसी क्षेत्री र धर्मराज सुनार घाइते भएका हुन् । बम बनाउने क्रममा रहेका केही व्यक्ति फरार रहेको प्रहरीले जनाएको छ ।

उनीहरूको भेरी प्रादेशिक अस्पतालमा उपचार भइरहेको छ । ४ मंसिरको प्रतिनिधिसभा र प्रदेशसभा निर्वाचन बिथोल्ने उद्देश्यले प्रेसर कुकर बम बनाउन खोज्दा आफैँ विस्फोट हुन पुगेको प्रहरीको भनाइ छ ।

बम विस्फोटपछि उनीहरू बस्दै आएको कोठा खानतलासी गर्दा प्रहरीले तयारी अवस्थामा रहेका थप दुईवटा प्रेसर कुकर बमसमेत बरामद गर्‍यो । उक्त बम नेपाली सेनाको बज्रदल गण राँझाको टोलीले निष्क्रिय पारेको थियो ।

नेपालगञ्जबाहेक बुधबार नै भोजपुरमा सत्ता गठबन्धनले आयोजना गरेको चुनावीसभा नजिक बम विस्फोट भयो । उक्त विस्फोटमा परी एक जना घाइते भएका छन् । भोजपुर चरंविका सुमन श्रेष्ठ विस्फोटमा परी घाइते भएका हुन् ।

श्रेष्ठसमेत विप्लव पार्टीकै कार्यकर्ता रहेको खुलेको छ । भोजपुरका प्रहरी नायब उपरीक्षक (डीएसपी) शरद थापा श्रेष्ठमाथि थप अनुसन्धान भइरहेको बताए । यसरी विप्लव पार्टीका कार्यकर्ता आफैँले बम बनाउँदा विस्फोट भएर घाइते भएको घटना पहिलोपटक भने होइन ।

यसअघि १२ जेठ २०७६ मा सिंहदरबारको पर्खालमा बम विस्फोट गर्ने गरी गरेको तयारीका क्रममा सुकेधारा, घट्टेकुलो र चन्द्रागिरिमा आफैँले बोकेको बम अचानक विस्फोट हुँदा विप्लव समूहका आठ जनाले ज्यान गुमाएका थिए ।

तर, त्यो बेलाको परिस्थिति भने भिन्न थियो । तत्कालीन केपी शर्मा ओली नेतृत्वको सरकारले विप्लव समूह राजनीतिक पार्टी नभएको र हिंसात्मक घटनामा सामेल भएको भन्दै २८ फागुन २०७५ मा प्रतिबन्ध लगाएको थियो । त्यसको दुई वर्षपछि २० फागुन २०७७ मा ओली नेतृत्वकै सरकारले विप्लवसँग तीनबुँदे सहमति गर्दै शान्तिपूर्ण राजनीतिमा फर्कायो ।

सरकारसँग विप्लवले राजनीतिक समस्याहरू वार्ता र संवादबाट समाधान गर्ने, नेपाल कम्युनिस्ट पार्टी आफ्ना सबै राजनीतिक क्रियाकलाप शान्तिपूर्ण रूपमा गर्ने, सरकारले नेपाल कम्युनिस्ट पार्टीमाथि लगाएको प्रतिबन्ध हटाउने, कारागारमा रहेका पार्टीका नेता-कार्यकर्ता रिहाइ गर्न र सम्पूर्ण मुद्दाहरू खारेज गर्ने सहमति गरेको थियो ।

उक्त सहमतिपछि २१ फागुनमा महासचिव विप्लव र तत्कालीन प्रधानमन्त्री केपी ओलीसँग राष्ट्रिय सभागृहबाट सार्वजनिक भएका थिए । तर, उसको गतिविधिले भने अझै प्रतिबन्धकालकै झल्को दिन थालेको छ । १५ फागुन २०७८ मा सरकारले अमेरिकी सहयोग परियोजना (एमसीसी) पास गर्दासमेत बानेश्वरस्थित संसद् भवनअगाडिको मूलगेटदेखि विभिन्न ठाउँमा शंकास्पद वस्तु राख्नेमा विप्लव पार्टीका कार्यकर्ता संलग्न रहेको प्रहरीको दाबी थियो । त्यतिबेला काभ्रेबाट दुई जना पक्राउसमेत परेका थिए । संसद्‌बाट एमसीसी पास भएको विरोधका विप्लवको पार्टीसहित अन्य छ राजनीतिक दल विरोधमा उत्रिएका थिए ।

उनीहरूले १६ फागुनमा देशव्यापी रूपमा बन्दको घोषणासमेत गरेका थिए । ४ मंसिरमा हुने प्रतिनिधिसभा र प्रदेशसभा चुनावसमेत बिथोल्ने नेकपा विप्लव पार्टीदेखि ऋषि कट्टेलको पार्टी र आहुतीले नेतृत्व गरेको वैज्ञानिक समाजवादी कम्युनिस्ट पार्टीले सार्वजनिक रूपमै घोषणा गरेको थियो ।

२० कात्तिकमा आहुति, कट्टेल र नेकपाका प्रवक्ता खड्कबहादुर विश्वकर्मा प्रकाण्डले पत्रकार सम्मेलन नै गरेर चुनाव बिथोल्ने जानकारी दिएका थिए । उक्त पत्रकार सम्मेलनमा विप्लव भने देखा परेका थिएनन् ।

योजनाबद्ध विस्फोट

प्रहरीले बुधबारको नेपालगञ्ज घटना र भोजपुरको घटना पूर्वयोजनाअनुसार नै विस्फोट भएको दाबी गरेको छ । पछिल्लो समय विप्लव कुनै पनि सार्वजनिक कार्यक्रममा नदेखिनुले समेत त्यसलाई पुष्टि गरेको छ ।

२० कात्तिकको पत्रकार सम्मेलनमा समेत विप्लव उपस्थित नभएर दोस्रो तहका नेता विश्वकर्मा पठाएका थिए । प्रहरीले विप्लवका कार्यकर्ताले केन्द्रको नीतिअनुसार नै बम बनाउनेदेखि विस्फोटको घटना गराउन थालेको दाबी गरेको हो ।

विप्लव नेतृत्वको नेकपाले चुनावमा ठूलो घटना घटाउनेभन्दा पनि आफ्नो उपस्थित देखाउन ठाउँठाउँमा विध्वंसात्मक गतिविधिको सहारा लिन खोजेको प्रहरीको दाबी छ । ‘विप्लव चुनाव बिथोल्नभन्दा पनि आफ्नो उपस्थिति देखाउन बार्गेनिङ गर्ने उद्देश्यले विस्फोटको गतिविधिमा लागेको देखिन्छ । हामीले बुधबारको घटनालाई गम्भीर रूपमा लिएका छौँ । त्यसका लागि गृह मन्त्रालयसँगको छलफलपछि थप रणनीति बनाउँछौँ,’ प्रहरी उच्च स्रोतले भन्यो ।

गृह मन्त्रालयका प्रवक्ता फणिन्द्रमणि पोखरेलले पनि विस्फोट पूर्वयोजनाअनुसार नै भएको बताए । ‘चुनावको समयमा यस्ता गतिविधि हुन सक्ने अनुमान हाम्रो पहिले नै थियो । त्यहीअनुसार सुरक्षा व्यवस्था पनि तयारी अवस्थामा राखिएको छ । यस्ता गतिविधिमा लाग्नेमाथि सरकार कडा रूपमा प्रस्तुत हुन्छ,’ पोखरेलले भने ।

अहिले घटनामा संलग्नमाथि अनुसन्धान जारी रहेको र अनुसन्धानका क्रममा विप्लव पार्टीको केन्द्रीय नीतिअनुसार नै घटना भएको पाइए नेतृत्वमाथि समेत कारबाही हुने पोखरेलको दाबी छ । उता विप्लव पार्टीका एक नेताले भने चुनावमा बम विस्फोट गराउने केन्द्रको नीति नरहेको बताए ।

प्रकाशित मिति: बिहीबार, मंसिर १, २०७९ १४:३४