कैलाली–४ : आ–आफ्ना पार्टीका दुई कमाण्डरबीच प्रतिस्पर्धा, कसले मार्ला बाजी ?

A+ A A-

कैलाली निर्वाचन क्षेत्र नम्बर–४ लाई चासोका साथ हेरिएको छ । दुई पूर्वमन्त्रीबीच नै प्रतिस्पर्धा हुने देखिएपछि यो क्षेत्र धेरैको चासोको विषय बनेको हो । यस क्षेत्रमा प्रतिनिधिसभा सदस्यका लागि नेकपा एमालेबाट पूर्वमन्त्री लेखराज भट्ट र नेपाली कांग्रेसबाट वीरबहादुर बलायर चुनावी मैदानमा छन् । भट्ट एमालेका सुदूरपश्चिम प्रदेश इन्चार्ज हुन् भने बलायर कांग्रेसका प्रदेश सभापति । दुवै जना आ–आफ्ना पार्टीका सुदूरपश्चिम प्रदेशको नेतृत्वकर्ता भएकै कारण यो क्षेत्र बढी चासोका साथ हेरिएको हो ।

बलायर चुनाव लड्न पहिलोपटक आफ्नो जिल्ला बाहिर कैलाली ४ मा झरेका हुन् । बलायर यसअघि डोटीबाट २०६४ सालमा पराजित भएका थिए भने २०७० मा भएको दोस्रो संविधानसभा चुनावमा विजयी भए । त्यसपछि उनी वाम गठबन्धनसँगको प्रतिस्पर्धामा २०७४ को प्रतिनिधिसभा सदस्य निर्वाचनमा पराजित भए । यसपटक डोटी सत्ता गठबन्धन सहयात्री दल नेकपा (एकीकृत समाजवादी) को भागमा परेपछि उनी कैलाली–४ मा झरेका हुन् ।

भट्टका लागि भने यो क्षेत्र नौलो होइन । उनी यहाँ पाँचौंपटक चुनाव लड्दैछन् । नेकपा (माओवादी केन्द्र) र संयुक्त जनमोर्चाबाट यो क्षेत्रमा चुनाव लडिसकेका छन् । उनले यसअघि यस निर्वाचन क्षेत्रबाट दुईपटक जित प्राप्त गरे भने दुईपटक हार व्यहोरे । यहाँ डोटीबाट झरेकाहरूको मत नै उनका लागि निर्णायक बन्दै आएको छ । तर, यसपटक परिस्थिति फरक छ । उनको बलियो प्रतिद्वन्द्वीका रूपमा प्रस्तुत भएका बलायर पनि डोटीकै हुन् । जसले गर्दा ती भोट बाँडिने सम्भावना छ ।

भट्ट र बलायर दुवै जना प्रदेशको स्थायी राजधानी बनाउने विषयलाई प्रमुख मुद्दा बनाएर चुनावी मैदानमा होमिएका छन् । सुदूरपश्चिम प्रदेशको स्थायी राजधानी गोदावरी नगरपालिकामा बनाउने प्रदेश सभाबाट दुई तिहाइ बहुमतले टुङ्गो लगाइएको थियो । तर, राजधानी बनाउने कार्य कार्यान्वयन हुन सकेको छैन । सोही विषय अहिले प्रदेश र प्रतिनिधि सभाको निर्वाचनमा उम्मेदवारका लागि प्रमुख मुद्दा बनेको छ । उनीहरूले जसरी पनि गोदावरीमै राजधानी बनाउने भन्दै मतदाता रिझाउने कार्य गरिरहेका छन् । क्षेत्र नम्बर ४ मा गोदावरी नगरपालिका, गौरीगङ्गा नगरपालिका, चुरे गाउँपालिका र मोहन्याल गाउँपालिकाको वडा नम्बर ५ पर्छ ।

स्थानीय तहको निर्वाचनमा दुईवटा नगरपालिकामा गठबन्धन दलका उम्मेदवारले जितेका थिए । गोदावरी नगरपालिकामा नेपाली कांग्रेस र गौरीगङ्गा नगरपालिकामा माओवादीका उम्मेदवारले प्रमुखमा जितेका छन् । यसैगरी दुवै नगरपालिकामा निकट्तम् प्रतिद्वन्द्वी भई नेकपा (एमाले) उम्मेदवार पराजित भए । चुरे गाउँपालिकामा भने नेकपा (एमाले)का उम्मेदवार विजयी भए । यहाँ गठबन्धनकै उम्मेदवार प्रतिद्वन्द्वी थिए ।