आत्मनिर्भर बन्दै सामुदायिक विद्यालय, सटर भाडामा लगाएर शिक्षकलाई तलब

A+ A A-

रूपन्देहीका केही सामुदायिक विद्यालयले खाली जग्गामा सटर निर्माण गरी त्यसलाई भाडामा लगाएर शिक्षकलाई तलब उपलब्ध गराउन थालेका छन् । सटर भाडामा दिएबापत प्राप्त हुने आम्दानीले विद्यालयले विद्यालय स्रोतबाट शिक्षक राखेर तलब दिन थालेका हुन् ।

बुटवलको कालिका मानवज्ञान, कान्ती, तिलोत्तमा, नवीन औद्योगिक र तिलोत्तमामा रहेको शान्ति नमुना माध्यमिक विद्यालयले सटर भाडामा दिएर विद्यालयमा अपुग शिक्षक राेखका छन् । बुटवल कालिका नगरमा रहेको कालिका मानवज्ञान माध्यमिक विद्यालयले १७ वटा सटर निर्माण गरेर मासिक २ लाख ५० हजार आम्दानी गर्दै आएको छ ।

सटर भाडामा दिएको आम्दानीले अलिअलि खर्च चल्ने हो, शिक्षकहरु धेरै हुनुहुन्छ, तलब दिन थपथाप हुन्छ, विद्यालयका प्राचार्य धनश्याम पाठकले भने ।

बुटवलको नमुना सामुदायिक विद्यालय कालिका मानवज्ञान विद्यालयमा ६ हजार विद्यार्थी छन् । २ सय १५ शिक्षक कर्मचारीमध्ये आन्तरिक स्रोतबाट मात्र १ सय ५३ जना शिक्षक कर्मचारी विद्यालयले राखेको छ ।

हामीसँग जम्मा ६२ जना मात्र सरकारी तलब खाने शिक्षक हुनुहुन्छ, बाँकी सबैलाई यही सटर भाडा र अभिभावकको सहयोगकै कारण राख्न सकिएको छ, प्राचार्य पाठकले भने, यही आम्दानी र अभिभावकको मायाकै कारण हामीले अंग्रेजी माध्यमबाट समेत अध्ययन गराउन सफल भयौं । मणिग्राममा रहेको शान्ति नमुना माध्यमिक विद्यालयले पनि विद्यालयको जग्गा भाडामा दिएर राम्रो आम्दानी गर्न सफल भएको छ ।

नमुना सामुदायिक विद्यालय मानिएको शान्ति नमुनाको भोगाधिकार जग्गा मात्र ४० बिघा छ । त्योमध्ये विद्यालयले २९ बिघा भाडामा लगाएको छ । जसबाट ६० लाख रुपैया वार्षिक रुपमा आम्दानी गर्दै आएको छ ।

हामीले बुद्ध सर्किट सडकतर्फ १५ वटा सटर बनाएका छौं । त्यसबाहेक हाम्रो अन्य जग्गा लिजमा पनि दिएका छौं, विद्यालयका प्राचार्य कुलप्रसाद लामिछानेले भने ।

४० बिघा जग्गामध्ये २८ बिघा जग्गा तिलोत्तमा गोलकट्टामा छ । जहाँ विद्यालयले २ बिघा आफैंलाई राखेर २६ बिघा जग्गा लिजमा दिएको छ । त्यसैगरी, करैयामा साढे ७ बिघा जग्गा भाडामा दिएको छ ।

२ हजार ७ सय विद्यार्थी रहेको विद्यालयमा १ सय ३० शिक्षक र कर्मचारी छन् । त्यसमध्ये ३१ जना सरकारी हुन ।

बुटवलको देवीनगरमा रहेको नवीन औद्योगिक कदरबहादुर रीता माध्यमिक विद्यालयले पनि २५ वटा सटर भाडामा लगाएर मासिक १ लाख २० हजार रुपैयाँ आम्दानी गर्दै आएको छ । यो रकम विद्यालयले विद्युत्, मर्मत सम्भार र कर्मचारीको तलबमा लगाएको छ ।

नवीन औद्योगिक कदरबहादुर रीता माविका प्रधानाध्यापक प्रेमबहादुर बस्नेतले यी सबै खर्चको व्यवस्थापन गर्न व्यावसायिक भवन बनाएर भाडामा लगाएको बताए ।

बुटवलको देवीनगरमा रहेको विद्यालयले सडकतिर फर्काएर दुईतले व्यावसायिक भवन बनाएको छ । विद्यालयमा ७५ जना शिक्षक कर्मचारी छन् । जसमध्ये ३७ जनाले सरकारबाट तलब खान्छन् भने बाँकीलाई विद्यालयले आन्तरिक स्रोतबाट तलब दिँदै आएको छ ।

हाटबजारस्थित कान्ति माविले हाटबजार वरपर देखिने गरी ५२ वटा सटर भाडामा लगाएको छ । भाडाबापत महिनामा ३ लाख रुपैयाँ आम्दानी हुन्छ । सटर भाडामा लगाउँदा निजी स्रोतका शिक्षकलाई तलब खुवाउन सहज भएको विद्यालयले जनाएको छ ।

हामीले भाडाबापत आउने रकम आन्तरिक स्रोतबाट तलब खाने शिक्षक र कर्मचारीका लागि खर्च गर्ने गरेका छौं, विद्यालयका प्राचार्य गोविन्द ज्ञवालीले भने ।

विद्यालयमा ३ हजार ५ सय विद्यार्थी छन । सरकारी शिक्षक भने जम्मा २३ जना छन । विद्यालयको आन्तरिक स्रोतबाट तलब खाने गरी ९७ शिक्षक र कर्मचारी राखिएको छ ।

त्यस्तै तिलोत्तमा माध्यमिक विद्यालय ८ वटा सटर भाडामा दिएर वार्षिक ६ लाख ६४ हजार आम्दानी गर्दै आएको छ । यो रकमले विद्यालय स्रोतका ५ जना शिक्षकलाई तलब खुवाइएको छ ।

हामी कहाँ माविमा स्थायी दरबन्दी नै छैन, जम्मा विद्यालयमा ८ जना स्थायी दरबन्दी मात्र छ, विद्यालयका प्राचार्य ईश्वरीप्रसाद रेग्मीले भने ।

विद्यालयमा प्राविमा ६ जना, माविमा १ जना राहत, निमाविमा १ जना राहत शिक्षक छन् । बालविकासमा २, सरकारी कर्मचारी २, सहयोगी –निजी) १ र अनुदान सरकारी माविमा १ जना शिक्षक छन् । त्यसबोहक विद्यालयले ५ जनालाई आन्तारिक स्रोतबाट तलब खुवाउँदै आएको छ ।