चुनावी उत्सव: कतै हिँडेर, कतै हेलिकोप्टरबाट सामग्री बोकेर मतदान केन्द्रतर्फ लागे अधिकृतसहितका टोली

चुनावी उत्सव: कतै हिँडेर, कतै हेलिकोप्टरबाट सामग्री बोकेर मतदान केन्द्रतर्फ लागे अधिकृतसहितका टोली

A+ A A-

मतदानको दिन आउन अब ५ दिन बाँकी छ । कर्णाली प्रदेशको दुर्गम मतदान केन्द्रमा निर्वाचन सामग्री बोकेर मतदान अधिकृत र सहायक अधिकृतको टोली केन्द्रतर्फ प्रस्थान गर्न थालेका छन् । कर्णालीको १० वटा जिल्ला हुम्ला, मुगु, जुम्ला, डोल्पा, कालीकोट, दैलेख, जाजरकोट, रुकुम पश्चिम, सल्यान र सुर्खेतका मतदान अधिकृत सोमबार (हिजो) बाट जान थालेका हुन् ।

मुगुको ६ वटा केन्द्रमा सोमबार नै अधिकृतको टोली गएको मुख्य निर्वाचन अधिकृत दिलकुमार बर्देवाले बताए । ‘दुर्गम क्षेत्रमा सुरक्षाकर्मीसहितको टोली मतपत्र, मतपेटिकालगायत सामग्री बोकेर हिजोबाट पठाइएको छ । केही मतदान केन्द्रमा आज र बाँकीमा भोलि पठाउने तयारी छ,’ उनले भने ।

पैदल प्रस्थान गरेका टोली १ गतेसम्म मतदान केन्द्रमा पुगिसक्ने उनले बताए । उनका अनुसार मुगुमा निर्वाचन सम्पन्न गराउन ५ सय २२ जना कर्मचारी खटिएका छन् । ‘चुनाव सम्पन्न गर्न शुभकामना दिएर पठाएका छौँ,’ उत्साहित हुँदै उनले भने, ‘कर्मचारीहरू हिँडेर जाँदै हुनुहुन्छ ।’

४ गते मतदानका दिन हिमपात भएमा वा बाटो बिग्रिएमा हेलिकोप्टरबाट मतपेटिका ल्याउने तयारी गरिएको उनले बताए । ‘हिमपात हुने ठाउँमा मतपेटिका हेलिकोप्टरबाट ल्याउने तयारी छ । हिमपात भएन भने भरिया वा खच्चडबाट पनि ल्याउनुपर्ने हुन्छ,’ उनले भने ।

जुम्लामा बुधबार (भोलि) बाट अधिकृत मतदान केन्द्रतर्फ जाने तयारी गरिरहेका छन् । आज मतपत्र, मतपेटिकासहितका निर्वाचन सामग्री बुझेर भोलि मतदान केन्द्र जाने तयारी भइरहेको मुख्य निर्वाचन अधिकृत विष्णुप्रसाद गौतमले बताए ।

‘तयारी अवस्थामा बसेका छौँ । १ पुसमा पुग्ने गरी भोलिबाट अधिकृत र सहायक अधिकृत केन्द्रतर्फ लाग्नुहुन्छ,’ उनले भने, ‘दुई दिनमा पुग्न सकिने केन्द्र छ ।’ जुम्लामा चुनाव गराउन सुरक्षाकर्मीबाहेक साढे ८ सय कर्मचारी खटिएका छन् ।

अपर डोल्पामा भने हेलिकोप्टरबाट मतदान सामग्रीसहतिको टोली जाने भएको छ । हिँडेर जान सहज नभएपछि हेलिकोप्टरको प्रयोग गर्न लागिएको डोल्पाका मुख्य निर्वाचन अधिकृत बाबुराम सुवेदीले बताए । ‘कर्मचारी केन्द्रमा जानेक्रम चलिरहेको छ । अपर डोल्पामा समस्या भएपछि हेलिकोप्टरबाट भोलि जाने तयारी छ,’ उनले भने, ‘चुनाव गराउन ५ सय ११ जना कर्मचारी खटिएका छन् ।’

कालीकोटमा पनि आजबाट नै कर्मचारी मतदान केन्द्र जान थालेका छन् । ‘निर्वाचन सामग्री बुझेर टाढाको केन्द्रमा आजदेखि जान थाल्नुभएको छ । पर्सिसम्म सबै केन्द्रमा कर्मचारी पुगिसक्छन्,' मुख्य निर्वाचन अधिकृत भरत लम्सालले भने । चुनाव गराउन कालीकोटमा ९८१ कर्मचारी खटिएका छन् ।

जाजरकोटमा पनि आजबाट मतदान अधिकृतसहितको टोली केन्द्रतर्फ जान थालेका छन् । ‘मतदानको सामग्री बुझेर आजबाट जान सुरु भएको छ । पर्सिसम्म सबै पुगिसक्नुहुन्छ,’ मुख्य निर्वाचन अधिकृत केशवराज चपाइँले भने, ‘चुनाव गराउन १ हजार १३६ जना कर्मचारी खटिएका छन् ।’

रुकुम पश्चिममा पनि आजबाटै कर्मचारी मतदान केन्द्रतर्फ जान थालेका छन् । ‘मतपत्र र मतपेटिकासहितको सामग्री बुझेर कर्मचारी र सुरक्षाकर्मी सँगै जानुभएको छ,’ मुख्य निर्वाचन अधिकृत खड्कबहादुर केसीले भने । उनका अनुसार रुकुममा १ हजार ११२ जना कर्मचारी चुनावका लागि खटिएका छन् ।

सल्यानका मतदान केन्द्रमा भोलिदेखि जाने तयारी भएको छ । ‘धेरै हिँड्नु पर्ने केन्द्र छैन । ५ घण्टामा पुग्ने ठाउँ छ । आज र भोलि सामग्री दिएर पर्सि मतदान केन्द्रमा जाने तयारी छ,’ मुख्य निर्वाचन अधिकृत गिरिराज गौतमले भने । सल्यानमा चुनाव गराउन १९ सय कर्मचारी खटिएका छन् ।

सुर्खेतका मतदान केन्द्रमा भोलिदेखि जाने तयारी भइरहेको मुख्य निर्वाचन अधिकृत विष्णुप्रसाद अर्यालले बताए । ‘अधिकृतको तालिम सकिएको छ । भोलि र पर्सि निर्वाचन सामग्री वितरण गरेर केन्द्रमा पठाउने तयारी छ,’ उनले भने ।

दैलेखमा आज मतदान अधिकृतको नियुक्ति सकेर भोलिबाट सामग्री हस्तान्तरण गर्ने तयारी छ । ‘१ गतेसम्म सबै केन्द्रमा पुग्ने गरी तयारी अवस्थामा बसेका छौँ,’ मुख्य निर्वाचन अधिकृत बलराम लम्सालले भने ।

कर्णली प्रदेशमा मतदान स्थल ९३३ र मतदान केन्द्र १४०३ वटा कायम गरिएको छ । प्रतिनिधिसभामा १२ निर्वाचन क्षेत्र र प्रदेशसभातर्फ २४ वटा क्षेत्र रहेको छ । कर्णालीमा १० लाख ८ हजार ४ सय ३ मतदाता रहेका छन् । ४ मंसिरमा हुने चुनावमा कर्णालीमा प्रतिनिधिसभातर्फ ७३ र प्रदेशसभातर्फ ११६ उम्मेदवार चुनावी मैदानमा छन् ।

प्रकाशित मिति: मंगलबार, कात्तिक २९, २०७९ १४:४२