कांग्रेस-माओवादीको भोट 'ट्रान्सफर' नभए कृष्णलाललाई चुनाव जित्न मुस्किल

सविना देवकाेटा ललितपुर, कात्तिक २९

A+ A A-

आउँदाे आइतबार हुने संसदीय चुनावमा नेकपा एकीकृत समाजवादीले उपत्यकाका १५ निर्वाचन क्षेत्रमध्ये दुई क्षेत्रमा उम्मेदवारी दिएको छ । सत्ता गठबन्धनबाट काठमाडौं ८ र ललितपुर २ मा भाग पाएकाे एकीकृत समाजवादीले के आफ्नो साख जोगाउन सक्ला ? एमालेबाट फुटेर बनेको पार्टीले गठबन्धनको टेकोमा पाएको सीमित क्षेत्रबाट कति सिट जित्ला ? त्यो भने हेर्न ४ मंसिर नै कुर्नपर्ने हुन्छ ।

तथापि, उपत्यकाका यी दुवै क्षेत्रलाई एकीकृत समाजवादी पार्टीले भने आफ्नो पकड क्षेत्रका रूपमा अर्थ्याउँदै आएको छ । ललितपुर २ मा पनि नेकपा एसको सोही विश्लेषण छ । ललितपुर २ मा एमालेका प्रेम महर्जन र एकीकृत समाजवादीका कृष्णलाल महर्जनबीच मुख्य प्रतिस्पर्धा हुँदैछ ।

एमालेका प्रेम महर्जन पहिलोपटक उम्मेदवार बनेका हुन् भने कृष्णलालले यसै क्षेत्रबाट आफूलाई पटक-पटक परीक्षण गराइसकेका छन् । २०५६ को आम निर्वाचन जितेका कृष्णलालले २०६४ मा भने यसै क्षेत्रबाट पराजय ब्यहाेरे । त्यस्तै, २०७० को चुनावमा पुनः हारेका उनी २०७४ को चुनावमा भने बाम गठबन्धनकाे बलमा राम्रो मतान्तरसहित निर्वाचित भएका थिए । त्यसैले ललितपुर २ कृष्णलालका लागि मिश्रित चुनावी मैदान हो, जसले उनलाई हार र जितसँग बराबर साक्षात्कार गराएको छ ।

एमालेले अघि सारेका प्रेम महर्जन भने जिल्ला राजनीतिमा लामो समयदेखि सक्रिय भई पहिलाेपटक चुनावी मैदानमा उत्रिएका हुन् । पहिलोपटक चुनावी मैदानमा उत्रिएका प्रेम पञ्चायतकालदेखि राजनीतिमा सक्रिय छन् । बहुदल आएपछि भएको पहिलो स्थानीय चुनाव २०४९ मा प्रेमले तत्कालीन ललितपुर नगरपालिका वडा नम्बर ८ को वडाध्यक्षमा निर्वाचित भएर २५ वर्षको उमेरै जनप्रतिनिधि बनेका थिए । त्यस्तै, २०५४ सालको स्थानीय चुनावमा पनि उनी सोही वडाबाट वडाध्यक्ष भए । यसरी उनले जनप्रतिनिधिका रूपमा नै १० वर्ष बिताएका छन् । पार्टीको स्थानीय कमिटीको सदस्य, नगर कमिटीको सदस्य, जिल्ला कमिटी सदस्य हुँदै सामाजिक परिषद् संस्थामा समेत दुई कार्यकाल बिताए ।

बागमती प्रदेश सदस्य रहेका उनले युवा संघको केन्द्रीय कमिटीमा चार कार्यकाल काम गरेका छन् । यस आधारमा आफू जनतामाझ नजिक रहेर काम गरेको र सबैसँग मित्रवत् भएका कारण पनि लोकप्रिय मत पाउने दाबी गर्छन्, प्रेम । प्रेम तिनै नेता हुन्, जसले विगतका चुनावमा तत्कालीन एमालेमा रहेका कृष्णलाललाई जिताउनकै लागि काँधमा काँध मिलाएर घरदैलो र प्रचार प्रसारमा सरिक हुन्थे र उनका लागि भोट माग्थे । तर, आज प्रेम उनैसँग प्रतिस्पर्धामा होमिएका छन् ।

यद्यपि कृष्णलाल भने आफ्नो जितको आधार बलियो भएकाले विचलित नभएको दाबी गर्छन् । ‘राजनीतिमा यस्तो हुन्छ’, उनी भन्छन्, ‘मैले यसअघि पनि ललितपुर २ बाट जितेको हो । फेरि मलाई गठबन्धनको साथ छ, जित निश्चित छ ।’ त्यति मात्रै नभएर, संसदमा नियमित उपस्थित हुने सांसदका रूपमा आफ्नो पहिचान बलियो बनेकाले पनि आफ्नो राजनीतिक छवि इमानदारिताको जगमा उभिएको उनले बताए ।

कृष्णलाल २०७४ को संसदीय चुनावमा करिब १० हजार मतान्तरसहित २७ हजार ७ सय १३ मत ल्याएर विजयी भएका थिए । तर, अहिले परिस्थिति केही फेरिएको छ । एमाले पार्टी नै विभाजित भएको, पूर्वसहकर्मी नै प्रतिस्पर्धी बनेको र आम मतदातामा पुराना दल र आश्वासनसँग आजित भएको अवस्थामा कृष्णलालको जित सम्भव होला ?

यसका लागि एमालेका मतदाताले व्यक्तिकेन्द्रित भएर कृष्णलाललाई भोट दिन्छन् कि एमालेलाई दिन्छन् भन्नेमा भर पर्ने देखिन्छ । त्याेभन्दा ज्यादा गठबन्धनका दल कांग्रेस र माओवादीकै भर छ उनलाई ।

कति होला भोट ‘ट्रान्सफर’ ?

गत वैशाख ३० मा भएको स्थानीय चुनावको मतपरिणामलाई आधार मान्ने हो भने ललिपुर २ मा एकीकृत समाजवादीको प्रभाव शून्यप्रायः नै देखिन्छ । यद्यपि गठबन्धनका तर्फबाट अन्य दलको साथ पाएको र पहिले पनि तत्कालीन एमालेबाट जितिसकेकाले कृष्णलालको सम्भावनालाई सिधै नजरअन्दाज गर्न भने सकिन्न ।

कारण गत स्थानीय चुनावमा कांग्रेसका चिरिबावु महर्जन ४२ हजार ७२२ मतसहित विजयी भएका थिए । उनका प्रतिस्पर्धी एमालेका हरिकृष्ण व्यञ्जनकारले २४ हजार ५६० मत पाएका थिए । कुल ८१ हजार ८९७ मतदाता भएको ललितपुर २ मा एमालेको मतभार कमजोर नै देखिन्छ ।

ललितपुर २ मा महालक्ष्मी नगरपालिका र ललितपुर महानगरपालिकाका वडा नम्बर ६, ७, ८, ९, ११, १२, १६, १७, १९ पर्छन् । स्थानीय निर्वाचनमा वडाध्यक्षले पाएको मतलाई आधार मान्ने हो भने कांग्रेसले २१ हजार ८१९ मत प्राप्त गरेको थियो । एमालेले १६ हजार २३७, माओवादीले ५ हजार ८८६ र समाजवादीले दुई हजार ५६० मत प्राप्त गरेको थिए । सत्तारुढ दलले प्राप्त गरेको मत जोड्दा ३० हजार २६५ हुन्छ । एमालेले भने १६ हजार २३७ प्राप्त गरेको थियो ।

कृष्णलालको दल एकीकृत समाजवादीको भोट भने नगण्य छ । त्यसैले कांग्रेस र माओवादी केन्द्रको कति भोट ट्रान्सफर हुन्छ, त्यसले कृष्णलालको हार/जितको निर्धारण गर्नेछ ।

चुनाव जितेपछि पनि टोल-टोलमा आइरहनेछु : प्रेम महर्जन

जनप्रतिनिधिका हिसाबले होस् या सामाजिक हिसाबले म लामो सयमदेखि म क्षेत्र नम्बर २ मा क्रियाशील छु । यतिखेर मैले घरदैलो गर्दैगर्दा पुराना प्रतिनिधि जितेर संसद गएपछि टोलमा फर्किएर आएनन् भन्ने गुनासो सुनेको छु । त्यसैले मैले प्रतिबद्धता नै गरेको छु- जितेपछि पनि म टोल-टोलमा यसरी नै आइरहनेछु ।

ललितपुर २ को समस्या मुख्यतः खानेपानी नै दखिन्छ । त्यसैले हरेक टोलमा स्रोतसाधन खोजेरै भए पनि पानीको समस्या हल हुनुपर्ने माग जनताको भएकाले मेरो पहिलो प्राथमिकतामा खानेपानी पर्नेछ । त्यस्तै, विकास निर्माणअन्तर्गतका पुल, बाटोघाटो, धुँवाधुलो व्यवस्थापनलाई पनि मैले प्राथमिकतामा राखेको छु । साथै, यहाँ रोजगारीको समस्या पनि छ । यसको निम्ति हामी स्वरोजगार बनाउनतिर लाग्छौँ ।

पुरानै मुद्दा पूरा गर्नेछु: कृष्णलाल महर्जन

पार्टीभित्र विद्रोह गरेर आएकाले पनि हाम्रो राजनीतिक निष्ठा र इमानदारीप्रति मतदाता प्रभावित छन् । त्यसैले मेरो शक्ति भन्नु नै मेरो इमानदारिता हो । ललितपुर २ अन्तर्गत मिश्रित भूगोल छ । गएको पटक म सांसद भएर पनि आफ्नै दलभित्र पक्षपाती भएकाले हामीमाथि पूर्वाग्रह ढंगले हेरियो र मेरा धेरै एजेन्डाले प्राथमिकता पाएनन् । त्यसैले मसँग यसपटक नयाँ एजेन्डा छैनन् । पुरानै मुद्दा छन् । मैले ५ वर्षदेखि उठाइरहेको ग्वार्को रिङरोड व्यवस्थापनको कुरा हो जहाँ सधैँभरि जाम भइराख्छ । त्यहाँ एउटा ‘फ्लाइ ओभर’ राख्नुपर्छ ।

सांस्कृतिक, मूर्त-अमूर्त सम्पदा र गुम्बा पर्ने हुँदा पाटनलाई प्रवर्द्धन गरेर सांस्कृतिक पर्यटन नगरी बनाउन जोड दिनेछु । हरेक टोल-टोलमा आफ्नै मौलिक हस्तकला छन् । यो क्षेत्र अरनिकोको जन्मभूमि पनि हो । त्यसैले हामीले सीपलाई विकास गर्दै, सरकारी स्तरबाटै तालिमको व्यवस्था गरेर सांस्कृतिक नगरी बनाउन जोड दिनेछौँ । उत्पादनलाई बजारसँग जोड्नेछौँ । यहाँ भएका मनोहरा, कर्मनाता र गोदावरी गरी तीनवटै नदीमा तत्कालै कोरिडोर बनाउनेछौँ । विगतमा पक्षपाती भएकाले बजेट नै राखिदिएन अब त सुरु भएको छ । रिङरोडभन्दा बाहिरपट्टी इमाडोल टीकाथली, सिद्धिपुर, लुभुतिर डिप बोरिङ गरेर ट्यांकीबाट पानी निकाल्ने काम गरिरहेका छौँ । पहाडछेउ भएकाले पानी ट्यापिङ गरेर निकाल्नेछौँ । लुभु र सिद्धिपुरमा अझै राम्रो टेक्सटाइल हब बनाउँछौँ । लाकुरीभञ्जयाङलाई पर्यटन क्षेत्रका रूपमा विकास गर्नेछौँ ।

प्रकाशित मिति: मंगलबार, कात्तिक २९, २०७९ १९:११

सविना देवकाेटा

प्रतिक्रिया दिनुहोस्