चुनाव आयो तर जिल्लामा आएनन् भीम रावल, फकाउँदै झपट बोहरा

A+ A A-

अछामबाट प्रतिनिधिसभा सदस्यको उम्मेदवारका लागि नेकपा एमालेको अछाम र सुदूरपश्चिम प्रदेश कमिटीले डा. भीम रावलको नाम सिफारिस गरेको थियो । तर, उनले टिकट पाएनन् । एमालेले रावललाई टिटक नदिएर सुदूरपश्चिम प्रदेशका पूर्वअर्थमन्त्री झपट बोहरालाई टिकट थमाएको थियो । पार्टीभित्र फरक मत राख्दै आएका रावल अध्यक्ष ओलीसँगको अन्तरद्वन्द्वका कारण टिकट पाउनबाट वञ्चित भएको एमाले कार्यकर्ता बताउँछन् ।

त्यसपछि रावलले चुनाव लड्दै आएको क्षेत्र नम्बर १ बाट बोहराले मनोनयन दर्ता गरे । माओवादी केन्द्रबाट एमाले छिरेका बोहरा अहिले चुनावी प्रचारप्रसारलाई तीव्रता दिइरहेका छन् । तर, उनलाई सघाउन नेता रावल भने गृहजिल्ला पुगेका छैनन् । एमाले अध्यक्ष केपी शर्मा ओलीले निर्वाचनका लागि जिल्ला जाने वातावरण नबनाएको रावलले बताउँदै आएका छन् । रावल काठमाडौंमै छन् ।

यता एमालेका केन्द्रीय सदस्य एवम् अछाम जिल्ला इन्चार्जसमेत रहेका उम्मेदवार बोहराले भने आफूले भीम रावललाई गृहजिल्ला बोलाएको बताएका छन् । ‘मैले सबैबाट सहयोग पाएको छुँ । अहिले एमालेका उम्मेदवारलाई जिताउन लागेका छन् । एमालेको जित निश्चित छ,’ उनी भन्छन्, ‘नेता रावल मेरो सम्पर्कमा हुनुहुन्छ । वातावरण मिलेपछि उहाँ आउनुहुन्छ ।'

अछाममा एमालेको जितका लागि भीम रावलको आवश्यकता खड्किएको छ । सोही क्षेत्रमा गठबन्धनको तर्फबाट प्रतिनिधिसभा सदस्यका लागि नेकपा एकीकृत समाजवादीका केन्द्रीय सदस्य श्रम तथा रोजगारमन्त्री शेरबहादुर कुँवर उम्मेदवार बनेका छन् । जिल्लामा गठबन्धनको पकड बलियो भएकाले नेता रावललाई ल्याउन प्रयास गरिरहेको जिल्ला अध्यक्ष चन्द्र बोहरा बताउँछन् । ‘उहाँकै अभिभाकत्वमा पार्टी हुर्किएको हो । हामी पनि उहाँलाई जिल्लामा आउन आग्रह गरिरहेका छौँ,’ उनले भने ।

प्रकाशित मिति: सोमबार, कात्तिक २८, २०७९ १३:१६