भारतीय नागरिक भन्छन्– नेपालमा आर्थिक समृद्धि र स्थायी सरकार हेर्ने मन छ

A+ A A-

नेपालसँग सीमा जोडिएका भारतीय नागरिकले समेत ४ मंसिरको निर्वाचनलाई महत्त्वका साथ हेरेको पाइयो । झापासँग सिमाना जोडिएका भारतीय नागरिकले नेपालमा विकास हुँदा आर्थिक, सामाजिक र व्यापारिक सम्बन्ध अझ राम्रो हुने धारणा राखेका छन् ।

शिलापत्रले झापाको मेची नगरपालिका– ८ को काँकडभिट्टा बजारसँग जोडिएको भारतीय पानीट्याङ्की बजारमा पुगेर गरेको स्थलगत रिपोर्टिङका क्रममा त्यहाँका नागरिकले नेपालमा स्थायी सरकार बनेको हेर्न चाहेको बताएका हुन् ।

नेपालमा एक वर्षमा प्रधानमन्त्री र सरकार परिवर्तन हुँदा नेपालको विकास, व्यापारसँगै सुशासनमा समेत प्रभाव पर्ने गरेको भारतस्थित पानीट्याङ्की बजारका कपडा व्यापारी नवाप खान बताउँछन् ।

पहिला भारत र नेपालको रोटीबेटीको मात्र सम्बन्ध थियो । अहिले व्यापार, रोजगारी, विकास, शिक्षा र अन्य प्रविधिसँग सम्बन्ध जोडिएको उनले जानकारी दिए ।

निर्वाचनले देशभित्र मात्र होइन, अन्तर्राष्ट्रियसम्बन्ध विस्तारका लागि पनि पाँचवर्षे योजना तय गर्ने खानले बताए ।

‘भारतीय नागरिक नेपालसँग सम्बन्ध मात्र राम्रो होइन, व्यापार पनि राम्रो होस् भन्ने चाहन्छन् । त्यही भएर निर्वाचनपछि नेपालमा स्थायी सरकार बनेेको हेर्न चाहन्छन् सीमाक्षेत्रका भारतीय नागरिक,’ खानले भने ।

सीमाक्षेत्रका भारतीय बजार नेपाली ग्राहककै भरमा चलेको छ । त्यही भएर भारतीय नागरिकले नेपालको आर्थिक समृद्धि भएको हेर्न चाहेको उनको भनाइ छ ।

खानजस्तै, पानीट्याङ्की बजारमै तीन दशकदेखि साडी व्यापार गर्दै आएका मिलन दोस्ती पनि नेपालमा हुन गइरहेको निर्वाचनले नयाँ परिवर्तन ल्याउन सक्ने स्थायी सरकार आएको हेर्न चाहन्छन् ।

नेपालमा विकास हुँदा भारतलाई पनि फाइदा पु्ग्छ । नेपालमा विकास गर्ने पार्टी सत्तामा पुग्दा नेपाली जनताको आर्थिकस्तर बढ्ने उनले बताए ।

‘नेपालमा तीन दशकयता स्थायी सरकार बनेको छैन । जसका कारण भनेजस्तो विकासमा नेपालले फड्को मार्न सकेन । यो नै मुख्य समस्या हो,’ उनले भने, ‘नेपाल त प्रकृतिले साथ दिएको देश हो । यो देशमा कृषिमा धेरै सम्भावना छ । नेपालमा जे पनि उत्पादन हुन्छ । तर, राजनीति स्थायी नहुँदा समस्या भइरहेको देखिन्छ ।’

भारतको छिमेकी देश भएका कारण नेपालमा हुने हरेक निर्वाचन र परिर्वतनले दुई देशको सम्बन्धमा अर्थ राख्ने उनको बुझाइ छ ।

दोस्ती र खानजस्तै पानीट्याङ्कीमा साइकल व्यापार गर्दै आएका रुवाज मिश्रलाई पनि नेपालमा आर्थिक परिवर्तन गर्न सक्ने सरकार स्थापना भएको हेर्ने इच्छा छ । नेपालीहरू मिहिनेती हुनुका साथै देशलाई अति नै माया गर्ने र उनीहरूमा अरुको धेरै सम्मान गर्ने स्वभाव रहेको व्यापारी मिश्र बताउँछन् ।

मिश्रले भने, 'मेरो पसलमा आउने ९० प्रतिशत ग्राहक नेपाली भएका कारण म पनि नेपालको सुशासन राम्रो होस्, आर्थिक समृद्धि होस् भन्ने चाहन्छु ।'

उनले थपे, ‘नेपालको अस्थिर राजनीतिले गर्दा देश विकासमा असर परेको छ । नेपालीहरू विकास खोजिरहेका छन् । तर, सरकार परिर्वतन भइरहँदा उनीहरूको त्यो सपना पूरा भएको छैन । नेपाल त प्रकृतिले नै बनाइदिएको देश हो । राम्रो व्यवस्थापन हुने हो भने भारतीय पर्यटकले त्यहाँको आर्थिकस्तर उक्सिन सक्छ । अहिले पनि सुदूरपूर्व घुम्ने भारतीय नागरिक दैनिक गइरहेका हुन्छन् ।’

नेपालले कृषि र पर्यटनको विकास गर्ने हो भने नागरिकको जीवनस्तर अहिलेभन्दा कैयौँ गुणा राम्रो हुने उनको बुझाइ छ । नेपालमा २०४७ सालपछि धेरै परिर्वतन भए तर, ती परिवर्तनअनुसार विकास नभएको उनको बुझाइ छ ।

मिश्र भन्छन्, 'मैले नेपालको हरेक सत्ता परिवर्तनलाई नजिकबाट हेर्दै र त्यहाँका जनतासँग कुरा गर्दै आएको छु । तर, उनीहरू पनि सत्ता परिवर्तनले आफ्नो जीवनस्तरमा परिवर्तन ल्याउन नसकेको गुनासो गर्छन् ।'

खान, दोस्ती र मिश्र त शिलापत्रले भारतको पानीट्याङ्की बजारमा भेटेका प्रतिनिधि पात्र मात्र हुन् । उनीहरूजस्तै त्यहाँ रहेका अन्य व्यापारी र भारतीय नागरिकहरू पनि नेपालमा स्थायी सरकार र विकास भएको हेर्न चाहन्छन् ।

झापास्थित मेची नगरपालिका– ८ को काँकडभिट्टाबाट ३ किलोमिटर मेचीपुलको पारिपट्टि पानीट्याङ्की बजार छ । यो बजारका ७० प्रतिशत ग्राहक नेपालीहरू नै हुन् । झापाका नेपालीहरूको पानीट्याङ्की बजार किनमेल गर्ने सीमापारिको मुख्य बजार भएको काँकडभिट्टाका व्यापारी अशोक क्षत्रीले जानकारी दिए ।

क्षत्रीका अनुसार पानीट्याङ्की बजार नेपाली ग्राहककै भरमा चलेको छ । नेपालमा भन्दा भारतको खाद्यान्न, कपडा, प्रविधिका सामान र अन्य सामान ३० प्रतिशतभन्दा सस्तो पाइने भएकाले नेपालीहरू भारतीय बजारमा किनमेलका लागि दैनिक पुग्ने गरेको उनको भनाइ छ ।