सिटौलाजीलाई राजावादी हराउँछु भन्ने भ्रम कहाँबाट आयो ? : राजेन्द्र लिङ्देन

A+ A A-

राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देन आगामी मंसिरको निर्वाचनपछि आफ्नो पार्टी एउटा निर्णायक शक्तिको रूपमा स्थापित हुने दाबी गर्छन् । जनताले एउटा राजनीतिक शक्ति खोजिरहेको र त्यो राप्रपा हुने उनको तर्क छ ।

सुरुमा संविधानसभाको निर्वाचन पनि नमानेका कांग्रेस, एमालेलगायतका पार्टीहरूले पछि गणतन्त्र, धर्मनिरपेक्षता तथा संघीयता स्वीकार्न तयार भएको स्मरण गर्दै लिङ्देन यी पार्टीहरू राप्रपाले लिएको राजतन्त्रको मार्गदिशा ठीक हो भन्दै आफ्नो पार्टीसँग सहकार्य गर्न आउने जिकिर गर्छन् ।

राप्रपा अध्यक्ष लिङ्देनसँग शिलापत्रले गरेको कुराकानीः

झापा–३ को निर्वाचन राजावादी भर्सेस गणतन्त्रवादीको हो ?

नेकपा एमाले राजावादी हो र ? यो पार्टीले राजाको नाम लिएको छ ? यहाँ जनताले मतदान गर्ने हो । सबै पार्टीको आ–आफ्नो सिद्धान्त र नीति हुन्छ । हामीले राजाको वकालत गरेका हौँ । यो हाम्रो सिद्धान्त हो । राजनीतिक एजेण्डाका विषयमा हाम्रो पार्टी प्रस्ट छ । अहिले सत्ता गठबन्धन यही प्रणाली, यही व्यवस्था कायम राख्न चाहन्छ । अहिले जुन ढंगले संवैधानिक अंगहरूमा नियुक्ति भइरहेको छ, राजनीतिकरण भइरहेको छ, देश यसरी चल्छ ?

टेस्टेड राजनीतिक नेताले नेतृत्व गरिरहेका छन् । यो प्रणालीमा सुधार र परिवर्तन गर्नुपर्छ भन्ने हाम्रो पार्टीको मूल सिद्धान्त हो । मान्छे फेर्ने कुरा छैन । अब नेतृत्व पनि परिवर्तन गर्नुपर्ने बेला भयो । नेपालको राजनीतिलाई भ्रष्टाचारलाई संस्थागत गर्ने र आपराधिक प्रवृत्तितिर लगिँदै छ । यो गलत हो । हामी यो प्रणाली परिर्वतनको पक्षमा छौँ ।

राप्रपाले देशभरबाट योपटकको निर्वाचनमा कति सिट ल्याउने आँकडा छ ?

राप्रपाले अप्रत्याशित परिणाम ल्याउने गरी तयारी गरेको छ । त्यसैअनुरुप योजना बनाएको छ । सिट संख्याले राजनीतिमा खासै अर्थ राख्दैन । तर, राप्रपा राजनीतिक शक्तिका रूपमा एजेन्डा बोकेर आउँछ । योचाहिँ पक्का हो । अब राप्रपा पनि नेपालको एउटा राजनीतिक शक्ति हो ।

राप्रपा नेपालको राजनीतिमा एउटा निर्णायक शक्तिको रूपमा स्थापित हुन्छ । राप्रपाले आफ्नो जीवनमै धेरै सिट ल्याउँछ । मैले यत्ति भनेँ, राप्रपाले अप्रत्याशित परिणाम ल्याउँछ । मंसिरको निर्वाचनपछि संसद्‍मा मुख्य शक्तिमध्ये राप्रपा पनि एउटा पार्टी हो । अरु त त्यसपछि थाहा हुन्छ ।

झापामा एमालेसँग चुनावी तालमेल गर्नुभयो । एमालेका बागी डम्बर गिरी उम्मेदवार छन् । यो अवस्थामा कांग्रेसका नेता कृष्णप्रसाद सिटौलासँगको प्रतिस्पर्धालाई कसरी हेर्नुभएको छ ?

झापा–३ मा बागीको केही अर्थ छैन । म यो विषयमा धेरै टिप्पणी गर्दिनँ । एमाले र राप्रपाले स्थानीय निर्वाचनमा ल्याएको मत जोड्दा कांग्रेस त कहाँ तल छ । एमालेसँग राप्रपाले कुनै व्यक्तिलाई जिताउनेमा मात्रै केन्द्रित गरेर छलफल गरेको होइन । राप्रपालाई राष्ट्रिय पार्टी बनाउने उद्देश्यले तालमेल गरेका हौँ ।

गठबन्धन अथवा तालमेल नगरी पनि जित्न सकिने अवस्था एकपछि अर्को नयाँ ठाउँहरूमा बनिराखेको छ । त्यही भएर मलाई बागी र कांग्रेसका उम्मेदवारले त्यति असर पार्दैनन् । एमाले पनि राप्रपालाई जिताउन आफ्नो संगठनको मत अरुतिर दिँदैन । त्यही भएर २०७४ सालको निर्वाचनभन्दा जितलाई सहज हेरेको छु । राप्रपाको पक्षमा नयाँ जनलहर छ । यो पार्टीमा क्षमताशील, ऊर्जाशील पुस्ता आउँदैछन् ।

झापा–३ का जनताले बागी–सागी होइन । विकास, देशका लागि आवश्यक पार्टी खोज्दैछन् । त्यही भएर कांग्रेस, बागी भन्ने हल्ला मात्र हो । म २०७४ को भन्दा पनि धेरै मतले जित्छु । मलाई यहाँ जनताले त्यो विश्वास देखाएका छन् ।

झापा–३ का जनताले बागी–सागी होइन । विकास, देशका लागि आवश्यक पार्टी खोज्दैछन् । त्यही भएर कांग्रेस, बागी भन्ने हल्ला मात्र हो । म २०७४ को भन्दा पनि धेरै मतले जित्छु । मलाई यहाँ जनताले त्यो विश्वास देखाएका छन् । सिटौलाजीलाई पनि त्यस्तै भ्रम छ । उहाँले पनि मंसिरको निर्वाचनमा राजावादी हराउँछु भन्दै हिँड्नुभएको छ रे ! झापा– ३ का जनताको सबै भोट उहाँले हाल्ने होइन होला । गत निर्वाचनमा ४४ हजार ६१४ मत मैले ल्याएको थिएँ । निकटतम प्रतिद्वन्द्वी सिटौलाले ३१ हजार १७१ मत ल्याउनुभएको थियो । झनै साढे १३ हजार मत कांग्रेसको कम छ । यो मत कभर गर्न कहाँबाट भोट तान्नुहुन्छ ?

आफ्नो निर्वाचन क्षेत्रको विकासका लागि पाँच वर्षमा के गर्नुभयो ?

झापा– ३ पाँच वर्षअघि कस्तो थियो, अहिले कस्तो भयो हेर्नुहोला । नेता नामी र ठूलो भएर विकास हुने होइन । स्थानीय पूर्वाधार विकास साझेदारी कार्यक्रमबाट दर्जनौँ ठूला पुलहरू निर्माण हुँदैछन् । ठूलठूला सडकका आयोजनाका कामहरू अहिले पनि भइराखेका छन् । हुलाकी सडक झापा– ३ को खण्ड सम्पन्न भएको छ । धेरै पुलहरू बनेका छन् । सानातिना कल्भर्ट कैयौँ दर्जन निर्माण भएका छन् । पाँच वर्षअघि यो निर्वाचन क्षेत्रमा यस्तो थिएन । कालोपत्र सडकले नछोएको कुनै वडा छैन ।

जंगली हात्तीका कारण पीडा थियो । अहिले सौर्य विद्युतीय तारबारको व्यवस्था भएको छ । यहाँका एउटै जंगलभित्र ३५० भन्दा बढी प्रजातिका बोटबिरुवा छन् । काठ तस्करी गर्नेले नियतवश तार काट्ने र चोर्ने स्थानबाहेकबाट हात्ती बाहिर आउने, ज्यानकै नोक्सान गर्ने, बालीनाली नोक्सान गर्ने अवस्था घटेको छ ।

स्थानीय पूर्वाधार विकास साझेदारी कार्यक्रमबाटै दर्जनौँ विद्यालयमा कम्प्युटर कक्षा सुरु भएका छन् । कम्प्युटरहरू प्रदान गरिएको छ । शिक्षाको क्षेत्रमा पनि अभूतपूर्व रूपमा परिवर्तन भएको छ । मेची, बिरिङजस्ता नदीहरूले घेरिएको, पूर्वाधारका काम कुनै नभएको भन्दा पनि हुन्छ । बाढी, डुबानको समस्या त छँदै थियो । यी सबै समस्या समाधान भइरहेका छन् ।

राप्रपाले अब सबै समय कृषिमा खर्चिएर उत्पादन बढाउनुपर्छ भनेको छ । कृषिको विकास भयो भने देशभित्र रोजगारी, अर्थतन्त्रको विकास र नेपाल आफैँ समृद्ध बन्छ । कृषि, पर्यटन, वनजंगलको विकास, जडीबुटी संरक्षण गरी औषधि उत्पादन र अन्तर्राष्ट्रिय व्यापारमा जोड गर्नुपर्छ । अबको सिद्धान्त पनि यही हो ।

राप्रपाले खोजेको राजनीति कस्तो हो ?

तीन दशकदेखि केही सीमित दलहरूले आफ्नो सम्पत्तिजस्तै गरी देशको नेतृत्व गर्दै आएका छन् । एउटा सिन्डिकेट खडा गरी अघोषित रूपमा देशलाई एउटा चक्रब्युहमा पारेका छन् । यो राजनीतिक जालोबाट देशलाई बाहिर ल्याउनुपर्छ । मंसिर ४ को निर्वाचनपछि त्यो नेतृत्व आउनुपर्छ । यसलाई विशेष अवसरको रूपमा उपयोग गर्नुपर्छ ।

गणतन्त्र, धर्मनिरपेक्षता, संघीयता र लोकतन्त्रमा जनताले के पाए ? अहिलेको संविधानले नै के सुविधा दिएको छ ? अब जनताले चाहेको विकास र राजनीति आवश्यक छ ।

राजसंस्था फर्किए अहिलेका सबै समस्या समाधान हुन्छन् ?

२०४६ सालपछि तीन दशकको अवधिमा २६ जना प्रधानमन्त्री बने । यो समयमा सबै राजनीतिक दल पटक–पटक फुटे । केका लागि फुटे त ? सबै सत्तामा जानका लागि आफ्नो स्वार्थमा पार्टी बनाए । अहिले पनि यो क्रम जारी छ । तर, २०४६ सालअघि देश सिस्टममा चलेको थियो । नेपाललाई कसैले प्रश्न गर्न सक्दैनथ्यो । देश दास नभएकै कारण विकास भएको थियो । अहिले राष्ट्रियता भन्ने कुरा कुनै पार्टीसँग छैन । बेचे, अनि बिर्सिए । यो अवस्थामा देशप्रेमी, नेपाली जनताका लागि सोच्ने एउटा संस्था चाहिन्छ । हाम्रो पार्टीले बोकेको सिद्धान्त पनि यही नै हो ।

प्रकाशित मिति: सोमबार, कात्तिक २८, २०७९ ०६:२६