एलपी सावाँ र देउमान थेवेको टक्करमा खुस्बु ओलीको इन्ट्रीले प्रतिस्पर्धा रोचक

एलपी सावाँ र देउमान थेवेको टक्करमा खुस्बु ओलीको इन्ट्रीले प्रतिस्पर्धा रोचक

A+ A A-

झापा–४ मा प्रतिनिधिसभा निर्वाचनमा सत्तारुढ गठबन्धन दलका तर्फबाट नेपाली कांग्रेसका उम्मेदवार देउमान थेवे, नेपाल कम्युनिष्ट पार्टी (एमाले)का तर्फबाट लालप्रसाद साँवा (एलपी) र स्वतन्त्र खुस्बु ओली प्रतिस्पर्धामा छन् । अहिले तीनै जना भोट माग्न व्यस्त छन् ।

साँवा २०७० को दोस्रो संविधानसभाको निर्वाचनमा उठेका थिए । तर, उनी नेपाली कांग्रेसकातर्फबाट उम्मेदवार बनेका केशबकुमार बुढाथोकीसँग पराजित भए । २०७४ सालको निर्वाचनमा साँवाले थेवेलाई फराकिलो अन्तरले पराजित गरे । साँवाले ४३ हजार ५ सय १५ मत ल्याउँदा तत्कालीन पार्टी उपसभापति रहेका थेवेले २६ हजार ८ सय २२ मत मात्र पाए ।

नेपाली कांग्रेसबाट चुनावी दौडमा रहेका थेवे अहिले झापाका पार्टी सभापतिसमेत हुन् । त्यस्तै राप्रपाबाट एकाएक उदाएकी ओली पार्टीले टिकट नदिएपछि स्वतन्त्र उम्मेदवार बनेकी छन्र । उनी सो निर्वाचन क्षेत्रका लागि ‘फ्रेस’ अनुहार हुन् ।

झापा–४ मा झापा गाउँपालिका, गौरादह नगरपालिका–९, गौरिगञ्ज १ र २, कन्काई–१ देखि ७ र शिवसताक्षी नगरपालिका पर्छ । गत स्थानीय तहको निर्वाचनलाई आधार मान्दा यो निर्वाचन क्षेत्रमा नेकपा एमालेको बर्चश्व देखिन्छ । २८ वटा वडामध्ये एमाले एक्लैले १५ वटा वडामा जितेको छ ।

गत वैशाख ३० गते सम्पन्न स्थानीय तह निर्वाचनमा झापा ४ मा वडाध्यक्षहरूले पाएको मतका आधारमा एमालेको ३१ हजार २ सय ७२, कांग्रेसको २८ हजार १६५, माओवादी केन्द्रको ६ हजार ३ सय ८२, राप्रपाको ४ हजार ५ सय ५६, नेकपा एसको ७ सय २, लोसपाको २ सय ४८, जसपाको एक सय १० मत छ ।

झापा गाउँपालिकामा अध्यक्ष र उपाध्यक्ष नै कांग्रेसले जितेको छ । कनकाई नगरपालिकामा मेयर एमालेले जित्दा कांग्रेसले उपमेयर जितेको छ । शिवसताक्षी नगरपालिकामा मेयर र उपमेयर नै एमालेबाट निर्वाचित भएका छन् ।

यस्तै गौरिगञ्ज गाउँपालिकामा अध्यक्ष कांग्रेसले जितेको छ भने उपाध्यक्षमा एमालेका उम्मेदवार विजयी भएका छन् । गौरादह नगरपालिकामा मेयर र उपमेयर नै एमालेबाट निर्वाचित भएका छन् ।

यसैगरी झापा गाउँपालिकामा एमालेले वडा नम्बर ३ मा जित हात पारेको छ । कांग्रेसले वडा नम्बर १,२,४,६ र ७ तथा ५ नम्बरमा स्वतन्त्र उम्मेदवारले जितेका छन् ।

दलहरूले एक्लाएक्लै प्रतिस्पर्धा गर्दा झापा–४ मा अरु पार्टीलाई एमाले भारी हुने अवस्था छ । तर, गठबन्धन भएका कारण प्रतिस्पर्धा राेचक बनेकाे छ।

फेरि मै हुँ : साँवा

चुनाव जित्नेमा ढुक्क जस्तै देखिएका साँवाले जित्ने आधार धेरै भएको शिलापत्रसँग बताए। 'चुनाव जितेपछि वा हारेपछि जनतासँग नेताको सम्बन्ध हुँदैन भन्ने आरोप लाग्ने गरेको छ । तर, मेरो हकमा लागू हुँदैन,' उनको दाबी छ, ‘मैले १० वर्ष व्यवसाय गरेँ । त्यसपछि मेरो इच्छाले विदा लिएँ । सांसद पद पनि १० वर्षभन्दा बढी खाने मेरो चाहना छैन । पहिलो पाँच वर्ष बिताएँ । अब एकपटक सासंद भएर विदा लिन्छु ।’

उनले भने, ‘२०७४ मा पहिलाेपटक विजयी भएँ । विजयी भएपछि मैले जनतासँग सांसद कार्यक्रम चलाएर जनताको घरदैलोसम्म निरन्तर पुग्ने योजना अघि सारेँ । त्यही भएर पनि याेपटक झापा–४ मा मेरो विकल्प छैन । २०७० मा हारेपछि मैले पाँच वर्ष जनताका बीचमा बसेर काम गरेँ ।'

पाँच वर्ष झापाली जनताको घरदैलोमै रहेको भन्दै योपटक पनि जित्नेमा उनी ढुक्क छन् । साँवाले झापामा एलपी साँवा मात्रै होइन एमाले जिताउनुपर्ने भन्दै आफूले धार्मिक तथा पर्यटकीय र स्वास्थ्य क्षेत्रमा गरेको विकासमा गरेका सुनाए ।

एमाले सरकारका पालामा गरेको विकासलाई आधार मान्नुपर्ने भन्दै उनले ओली सरकारका पालामा आफ्नो क्षेत्रमा शिवसातक्षी, टाँगनडुवा र कन्काइमा गरी ३ वटा पालिकास्तरीय अस्पताल निर्माणको चरणमा रहेको पनि उनले जानकारी दिए ।

यस्तै, झापा–४ को धेरै स्थानीय तहमा दुईकोठे, चारकोठे भवन, विद्यालय कम्पाउण्ड बनाउने, विज्ञान–प्रविधि ल्याब स्थापना गर्ने, विद्यालय भवनको स्तरोन्नति गर्ने जस्ता काम भएका छन् । यो क्षेत्रमा ३ वटा नमूना विद्यालय सञ्चालन गरेको पनि उनी बताउँछन् ।

जनताले नयाँ अनुहार खोजेका छन् : ओली

झापा ४ की स्वतन्त्र उम्मेदवार खुस्बु ओली राष्ट्रिय प्रजातन्त्र पार्टीले आफूलाई धोका दिएको भन्दै स्वतन्त्र उम्मेदवार उठिन् । एजेन्डा नमिल्ने पार्टी एमालेसँगकाे तालमेल राप्रपा कार्यकर्ताले स्वीकार्न नसक्ने भन्दै उनी अहिले भोट माग्दैछिन् ।

'एलपी साँवा लिम्बु र देउमान थेवे मेरा प्रतिद्वन्द्वी हुन् । तर जित यसपटक युवाकै हुन्छ', उनले भनिन् । जतनाले परिवर्तनका लागि युवालाई अघि बढाउने उनको विश्वास छ । उनले भनिन्, 'जनताले पार्टीको चिह्न हेर्दैनन् । म कांग्रेस, एमाले र राप्रपाको भोट लिएर जित्छु ।'

‘एमालेसँग तालमेल गर्नुपर्ने पार्टीका बाध्यता होलान् । तर झापा ५ मा संघ र प्रदेशका तीनवटै भोट सूर्यमा हाल्न सकिँदैन भनेर मैले झापा ४ मा स्वतन्त्र उम्मेदवारी दिएँ । म पार्टीको मात्र होइन, जनताको स्वतन्त्र उम्मेदवार हुँ’, उनले भनिन, ‘मैले पार्टीलाई धोका दिएको होइन, पार्टीले मलाई धोका दिएको हो । हामी कुनै पनि पार्टीको दास होइनौं । एक वडाः एक मझौला उद्योग, हरेक गाउँमा आईसीयूसहितको अस्पताल, गुणस्तरीय शिक्षा लगायतका चुनावी मुद्दा मैले अघि सारेको छु ।’

उनले अगाडि थपिन्, 'हामीसँग एजेन्डा नमिल्ने पार्टीलाई भोट हाल्न सक्दैनौं । राजसंस्था, हिन्दु राष्ट्रको पुनःस्थापना र संघीयताको खारेजी हाम्रो मूल सिद्धान्त हाे ।'

झापा–४ मा मत गन्दा हुन्छ कांग्रेस जित पक्का हो : थेवे

झापा–४ मा कांग्रेसले जित्ने पक्का भएको कांग्रेस उम्मेदवार थेबेको दाबी छ । यो निर्वाचनमा क्षेत्रमा एमालेभन्दा कांग्रेस बलियो मात्र होइन । निवार्चित हुने पार्टी भएको उनले बताए ।

‘झापा–४ मा कांग्रेस बलियो पार्टी हो । राप्रपासंगको गठबन्धनमा रहेको एमालेले जस्तोसुकै चुनावी नारा लिएर जनताका माझ गए पनि जनताले पत्याउँदैनन् ।’ उनले भने, 'यस क्षेत्रका सबै नागरिकलाई तीन तले घर र सुनको थालमा खिर खुवाउछु भन्नेहरू कहाँ गए आज ? अब यहाँ झुटको खेती चल्दैन । हामीले अहिलेसम्म जे जतिगरेका छौं त्योभन्दा पर यो क्षेत्रमा केही विकास र परिर्वतन भएको छैन ।’

विगतमा एमालेले झुटको खेती धेरै गरेकाले एमालेका उम्मेदवारको असली चरित्र जनताले थाहा पाएकाले यसपटक जनताले एमालेलाई मत नदिने उनको भनाइ छ ।

'झापा– ४ मा पर्ने दुईवटा पालिकाको मात्रै तुलना गर्ने हो भने एमालेको बहुमत रहेको कनकाई र नेपाली कांग्रेसले जितेको झापा गाउँपालिकाको विकास हेरौं छर्लग हुन्छ', थेवेले दाबी गरे।