प्रेममा किन गल्छ मान्छे ?

A+ A A-

समीरले शाेभालाई यति धेरै माया गर्थ्याे कि सारा संसारभन्दा पनि ठूलो उसैलाई मान्थ्याे । ऊ प्रेमको पूजा गर्थ्याे । शाेभाबाहेक सब थोक गुमाउन तयार थियाे ऊ ।

उसले शाेभाबाट पनि उत्तिकै माया पाएकाे थियाे । त्यसैले उसकाे खुसीकाे सीमा नै थिएन । दुवैले एकअर्कालाई संसारकै सबैभन्दा भाग्यमानी ठान्थे ।

ऊ केवल शाेभासँगै रमाउन र खुसी हुन चाहन्थ्याे । तर, जिन्दगीकाे चक्र सधैँ एकैनास घुम्दैन । कालान्तरमा जीवनमा यस्ताे माेड आइदिन्छ, प्राणप्यारीले समीरलाई छाेडेर गइदिन्छे । उसका लागि याे नचाहँदा नचाहँदैकाे यथार्थ हुन्छ ।

अर्थात् हिजाेसम्म जोडिएका मनहरू एकाएक छुट्टिन पुग्छन्, अनि छुट्टिएका मनहरू टुक्रिन । तपाईं आफैँ सोच्नुस् न, तपाईंले कसैलाई त्यस्तै धेरै नै प्रेम गर्नुहुन्छ । यति धेरै कि तपाईं उनीबिना एक पल पनि बाँच्न त के, सोच्न पनि सक्नुहुन्न । तर एक दिन यस्तो पनि आउँछ, तपाईंसँग उनी टाढिन्छिन् । त्याे दिन कस्ताे हाेला ?

समीर जीवन र मृत्युमा फाइदा नियाल्न थाल्छ । उसले साेच्छः

जीवनः मनमा रोपेर उमारेकाे अनि सजाएको प्रीतिको फूल उखेलिएकाे छ । उजाड मनका साथ कसरी जिउनु ? पलपल तड्पिएर, पागलजस्तो बनेर बाँच्न सकिएला ? तर फेरि जीवन यति सस्ताे पनि त छैन । छाेडेर कतै बिलाउनका लागि आफ्नाे जीवन किन समाप्त गराैँ ? हैट ! बाँच्नुपर्छ ।

मृत्युः उनीबिना आफ्नाे जिन्दगी नै उराठ र उजाड छ । आफूलाई नियन्त्रण गरे पनि यादलाई कसरी राेक्ने ? हरेक क्षण तड्पेर बाँच्नुभन्दा मर्नु नै जाती हाेइन र ?

प्रेममा धोका खाएपछि गलेकाहरूले मर्नुलाई नै समाधान मानेको देखिन्छ । सबैमा यो लागू नभए पनि धेरैजसोले त आत्महत्याको प्रयाससमेत गर्ने गरेका छन् । यो त कसरी समाधान भयो र ?

उसले धेरै बेर साेच्छ । अन्तिममा उसले यादसँग भिडेर जिउने संकल्प गर्छ ।

माथिको प्रसङ्ग उप्काउनुको उद्देश्यचाहिँ प्रेममा धोका खाएको मानिस जीवन र मृत्युको बीचबाट फाइदा खोज्ने तहमा किन पुग्छ भन्ने चर्चाका लागि हो ।

प्रेम एक भावना हो, जसको साइनो सिधासिधी हाम्रो मनसँग हुन्छ । तर, यसबाट बाहिर निस्कँदा तनले पनि दुःख पाउँछ । हुन पनि आफूले प्रेम गरेको मानिसले धोका दिँदा कसलाई पो दुःख हुँदैन र ? तैपनि एक धोकाले जिन्दगी समाप्त गर्नु वा पछाडि फर्कनु किमार्थ जायज हुँदैन । जीवनभन्दा ठूलो चीज यो संसारमा केही छैन । प्रेम पनि जीवन भएकैले भएको हो । त्यसैले धाेकाबाट जीवनमा अझै अघि बढ्ने बल खाेज्नुपर्छ । गल्नु हुँदैन ।

हालै मात्र एक मित्रले प्रेममा धोका पाएर जीवनै समाप्त गर्न खोजेको खबरले भावुक बनायो । त्यसैले यो ब्लग लेख्न मन लाग्यो । जिन्दगीको एउटा पाटो, अझ भनौँ आफ्नो अंगकै एउटा पाटो सम्झिएको व्यक्तिले धोका दिँदा पीडा त हुन्छ नै । शरीरको कुनै अंगमा थोरै चोट लाग्दा कति पीडा हुन्छ ?

यहाँ त केवल शारीरिक चोटको कुरा छैन, भावनामाथिको चोटको कुरा छ । त्यसैले प्रेममा धोका खाएपछि गलेकाहरूले मर्नुलाई नै समाधान मानेको देखिन्छ । सबैमा यो लागू नभए पनि धेरैजसोले त आत्महत्याको प्रयाससमेत गर्ने गरेका छन् । यो त कसरी समाधान भयो र ?

प्रकाशित मिति: शनिबार, कात्तिक २६, २०७९ ०६:४२