चुनावी सुरक्षाका लागि फिल्डमा उत्रिए सुरक्षा निकाय, के छ चुनौती ?

A+ A A-

मंसिर ४ मा हुने प्रतिनिधिसभा र प्रदेशसभाको निर्वाचनका लागि चारवटै सुरक्षा निकाय खटिसकेका छन् । चुनाव आउन १० दिन बाँकी छँदा नेपाल प्रहरी, नेपाली सेना, सशस्त्र प्रहरी र राष्ट्रिय अनुसन्धान विभागको टोली तोकिएका निर्वाचन क्षेत्रमा पुगेका हुन् ।

चारवटा सुरक्षा निकायबाहेक म्यादी प्रहरी पनि चुनावको सुरक्षा तयारीका लागि मैदानमा छ । प्रहरी प्रधान कार्यालयले मंगलबारदेखि नै प्रहरी प्रधान कार्यालय तथा उपत्यका विभिन्न कार्यालयबाट विभिन्न जिल्लामा खटाएको छ ।

बिहीबार अधिका‌ंश क्षेत्रमा प्रहरी पठाइएको प्रहरीका केन्द्रीय प्रवक्ता डीआईजी टेकप्रसाद राईले जानकारी दिए । शुक्रबारसम्म आवश्यक परेका केही जिल्लामा थप टोली पठाइने डीआईजी राईले बताए । फिल्डमा खटिने प्रहरीका लागि प्रहरी प्रधान कार्यालयले नेपाली सेनाबाट साना हतियार बालगिरीमा लिएर पठाएको हो । हरेक निर्वाचन बुथमा खटिने जुनियर प्रहरी अधिकारीले पेस्तोल बोक्ने छन् ।

प्रहरीबाहेक सशस्त्र प्रहरी बलको टोलीसमेत परिचालन भइसकेको छ । प्रदेश कार्यालयमा रहेका बाहिनी तथा सशस्त्र मुख्यालयबाट समेत जनशक्ति परिचानल भइसकेको सशस्त्र प्रहरी सहायक प्रवक्ता डीएसपी शैलेन्द्र थापाले जानकारी दिए ।

सेना तथा राष्ट्रिय अनुसन्धान विभागले पनि खटाउनुपर्ने विभिन्न ठाउँमा आफ्ना जनशक्ति परिचालन भइसकेको जनाएको छ । प्रत्येक निर्वाचन बुथको पहिलो घेरामा नेपाल प्रहरी, सशस्त्र प्रहरी तथा म्यादी र बाहिरी सुरक्षाको जिम्मा नेपाली सेनालाई दिइएको छ ।

चुनावका विभिन्न जिल्लामा प्रहरी प्रधान कार्यालयले गस्तीका लागि एक सय ८० नयाँ गाडी खरिद गरेको थियो । त्योबाहेक भारतीय दूतावासले थप १ सय २० वटा नयाँ गाडी सहयोग गरेको छ । केही अपुग गाडी भने प्रहरीले भाडामा प्रयोग गर्ने डीआईजी राईले बताए । प्रहरीका लागि नयाँबाहेक थप एक हजार गाडी आवश्यक रहेको राईले बताए ।

के छ सुरक्षा खतरा ?

सुरक्षा निकायको विश्लेषण अनुसार चुनावमा खासै सुरक्षा चुनौती छैन । यद्यपि केही दिनअघि मात्रै चुनाव बिथोल्ने भन्दै सार्वजनिक धारणा बाहिर ल्याएका नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा) सहित २८ दल र समूहमाथि निगरानी बढाइएको छ ।

प्रहरीका अनुसार मोहन वैद्य नेतृत्वको नेकपा (क्रान्तिकारी माओवादी), धर्मेन्द्र बाँस्तोला संयोजक रहेको नेकपा बहुमत, नेकपा मसालसहितका पार्टीमाथि सुरक्षा निकायले निगरानी बढाएको हो । विभिन्न २८ पार्टी तथा समूहमध्ये विप्लव नेतृत्वको नेकपाको गतिविधिमाथि बढी केन्द्रित भएको प्रहरीले जनाएको छ ।

उच्च प्रहरी स्रोतका अनुसार विप्लव नेतृत्वको नेकपाका कार्यकर्ताहरूले केही अवाञ्छित गतिविधि गरे नेतृत्व तहसम्मै धरपडक गर्ने तयारी प्रहरीको छ । केही दिन अघिमात्रै प्रहरी महानिरीक्षक (आईजीपी) धीरजप्रताप सिंहले निवार्चनमा खटिने प्रहरी कर्मचारीलाई सुरक्षामा कुनै पनि कसर नराखी काम गर्न निर्देशन दिएका थिए ।

प्रकाशित मिति: बिहीबार, कात्तिक २४, २०७९ १२:५१