चुनावैपिच्छे दल फेर्ने गुप्ताको पाँचौँ संसद्‌यात्रामा आचार्यले लगाऊलान् ब्रेक ?

चुनावैपिच्छे दल फेर्ने गुप्ताको पाँचौँ संसद्‌यात्रामा आचार्यले लगाऊलान् ब्रेक ?

A+ A A-

कपिलवस्तुबाट लगातार चारपटक चुनाव जितेका वृजेशकुमार गुप्ता क्षेत्र नं २ बाट पाँचौँपटक सांसद बन्न चुनावी मैदानमा छन् । २०५६ सालदेखि सांसद जित्दै आएका गुप्ता हरेकपटकको निर्वाचनमा पार्टी फेरेर चुनाव लड्छन् ।२०५६ मा राप्रपाबाट राजनीतिक यात्रा सुरु गरेका गुप्ताले तमलोपाहुँदै अघिल्लो निर्वाचनमा स्वतन्त्र राजनीतिक समूहबाट चुनाव जिते ।

२०६४ र २०७० का दुई संविधानसभा निर्वाचनमा उनले तमलोपाबाट जितेका थिए । अहिले उनी ठूलो दलबल लिएर एमाले पुगेका छन् । यो क्षेत्रमा उनको पकड भएको मानिन्छ । नेपाल विद्युत् प्राधिकरणमा इलेक्ट्रिकल इन्जिनियरको जागिर छाडेर राजनीतिमा होमिएका गुप्ताले जितको सिन्डिकेट लगाउन सफल भइरहेका छन् ।

गुप्ताको २३ वर्षदेखिको संसदीय यात्रालाई ब्रेक लगाउन सत्ता गठबन्धनबाट नेपाली कांग्रेस लुम्बिनी प्रदेशका महामन्त्री तथा पूर्वसिँचाइ राज्यमन्त्री सुरेन्द्रराज आचार्य मैदानमा छन् । २०७४ सालमा गुप्ताले आचार्यलाई पराजित गरेका थिए । लोसपाका अकबालअहमद शाह पनि चुनावी मैदानमा छन् । एमालेका उम्मेदवार गुप्ता पूर्वकानुनमन्त्री हुन् भने पार्टी केन्द्रीय सदस्य हुन् । लोसपाका उम्मेदवार शाह पूर्वकृषिमन्त्री हुन् भने पार्टी केन्द्रीय सदस्य हुन् ।

प्रभावशाली मानिएका नेताहरू प्रतिस्पर्धामा उत्रिनु र सदरमुकाम तौलिहवासमेत यसै क्षेत्रमा पर्ने हुँदा यहाँ चुनावी चासो बढेको देखियो । ‘अधिकांश पर्यटकीयस्थललाई विकास गर्न र लुम्बिनी र कपिलवस्तुलाई एकीकृत विकास गर्ने मेरो योजना छ,’ कांग्रेसका उम्मेदवार आचार्यले आफ्नो प्राथमिकता सुनाए ।

बुद्धभूमि ८ नं वडामा घरदैलो गर्दै थिए उनी । ‘हाम्रो पोजिसन राम्रो छ । परिवर्तन नगरी विकास हुँदैन भन्नेमा जनता लागेका छन्,’ उनले शिलापत्रसँग भने । वाँणगंगा नदीको कटान रोक्ने भन्दै उनले मत मागिरहेका थिए । ‘हारे पनि मैले नदी कटान रोक्नका लागि पहल गरेँ । ६ अर्ब १७ करोड रुपैयाँ विनियोजन गर्न पहल गरेँ,’ उनले भने, पहिला वल्लो किनार मात्र मेरो क्षेत्रमा पर्थ्यो । अहिले पल्लो किनार पनि मेरो क्षेत्रमा पर्छ । ठूला परियोजना नै चाहिने र यो क्षेत्रमा किसान बढी छन्, उहाँहरूको समस्या बुझ्ने दायित्व मेरो हो ।’

स्वास्थ्यक्षेत्रलाई प्राथमिकतामा राखेको उनले सुनाए । गुप्ताले २३ वर्ष जित्दा काम गर्न नसकेको उनको आरोप थियो । ‘तौहिलवा सदरमुकाम भए पनि रात बिताउन कोही चाहँदैनन् । हामीसँगैका नेपालगञ्ज, दाङ, नवलपरासी कस्ता भैसके । हामी जहाँको तहीँ छौँ,’ उनले भने, ‘५ वर्ष मलाई अवसर दिनुस् । काम गर्छु । सकिनँ भने सुध्रेर आउँछु । तर, यो क्षेत्रको भविष्यमा खेलवाड गर्दिनँ ।’

एमाले उम्मेदवार पाँचौँपटक जित्नेमा ढुक्क देखिए । ‘यहाँका जनतालाई मेरो नेतृत्वमा विकास हुन्छ भन्ने विश्वास छ, मेरो नेतृत्वमा समस्या समाधान हुन्छ पनि । त्यसैले यहाँका जनताले मलाई फेरि पनि माया गर्नुहुन्छ,’ एमाले उम्मेदवार गुप्ताले भने ।

‘धान रोप्ने बेला सिँचाइका लागि पानी हुँदैन, गहुँ लगाउने समयमा पनि समस्या छ । मलखाद समयमा आउँदैन । हामी किसानलाई राम्रोसँग फलाउन वातावरण पनि छैन,’ बुद्धभूमि नगरपालिका-१० लोहरौलाका किसान हरिमोहन भन्छन् ।

‘सबै आउछन् मल दिन्छु, सिँचाइ दिन्छु भन्छन् तर कसैले दिँदैनन्,’ महाराजगञ्ज नगरपालिकाका किसान धनीराम कोरी भन्छन्, ‘पहिलेपहिले भोट माग्न यस्तै भन्दै थिए । अहिले नि भन्दैछन् । पत्याउने कि नपत्याउने अब ?’

कपिलवस्तु जिल्ला कृषिको उर्वर भूमिसमेत हो । यहाँका अधिकांश जनता कृषिमा निर्भर छन् । तीन तहको सरकारलाई समेत थाहा छ । कृषिमा सम्भावना भए पनि सिँचाइको समस्याले हरेक वर्ष कृषक समस्यामा परेका छन् ।

२०७४ को चुनावमा गुप्ता ३५ हजार १२७ मत ल्याएर विजयी हुँदा आचार्यले ३१ हजार ५६६ मत ल्याएका थिए । वैशाखमा भएको स्थानीय तहका चुनावमा कांग्रेसका वडाध्यक्षहरूले ३० हजार ९९८ मत पाएका छन् । एमालेकाले २७ हजार २९८ मत ल्याउँदा जसपा ६ हजार ९०८, लोसपा ६ हजार ३८६, माओवादी ४ हजार ४५९, राप्रपा २ हजार ३५, नेकपा एसको ६९१ मत ल्याएका छन् । यो क्षेत्रमा कपिलवस्तु नगरपालिकाका ८, यशोधरा गाउँपालिकाका ७, महाराजगञ्ज नगरपालिकाका ८ र बुद्ध भूमि नगरपालिकाका १० वटा वडा समेटिएका छन् ।

प्रकाशित मिति: बिहीबार, कात्तिक २४, २०७९ १६:०९