ओलीकै निर्वाचन क्षेत्रका मतदाता भन्छन्– नेतृत्व परिवर्तन गर्नुपर्छ

A+ A A-

झापा–५ नेकपा एमालेका अध्यक्ष केपी शर्मा ओलीको निर्वाचनमा क्षेत्र हो । यो निर्वाचन क्षेत्रमा कांग्रेस–माओवादी, एकीकृत समाजवादीकाे सत्ता गठबन्धन र एमाले–राप्रपाको गठबन्धनबीच कडा प्रतिस्पर्धा हुँदैछ । एमालेका अध्यक्ष ओलीसँग २०७४ सालको निर्वाचनमा हारेका कांग्रेसका नेता खगेन्द्र अधिकारी चुनावी मैदानमा छन् ।

एमाले अध्यक्ष ओलीको निर्वाचन क्षेत्रकै मतदाताले अहिलेको राजनीतिक नेतृत्व परिवर्तन गर्नुपर्ने धारणा राखेका छन् ।

राजनीतिक दलहरू विकासभन्दा शक्तिमै अल्झिएका कारण अब यो नेतृत्व परिवर्तन गर्नुपर्ने दमक नगरपालिका –७ का विकास क्षेत्रीको धारणा छ । देशको विकासभन्दा पनि सबै राजनीतिक दलका नेताहरू शक्ति र पैसाको पछि लागेका कारण अहिलेको नेतृत्वले केही गर्न नसक्ने उनले बताए ।

‘चार दशकदेखि एउटै दलका नेताहरू सत्ताको वरिपरि घुमिरहेका छन् । उनीहरूले आफूलाई मात्र नेता बनाए । तर, जनताको जीवन उस्तै छ । सडक भएर मात्र विकास हुन्छ भन्ने हुँदैन,’ उनले भने, ‘तपाईं यहाँबाट तल १० किलोमिटर गएर गाउँ हेर्नुहोस् । सबै जमिन बाँझो छ । युवाजति जतिसक्दो झोला बोकेर विदेशिन खोज्दैछन् । उनीहरूलाई रोक्ने योजना खोइ ?’

नेताले जहिल्यै निर्वाचनमा जनता खोज्छन् । निर्वाचन सकिएपछि भोकले मरुन् कि रोगले, बेवास्ता गर्ने गरेको उनको आरोप छ ।

राईजस्तै दमक नगरपालिका– ५ को फुटपाथमा सामान्य पसल गर्दै आएका लालरमन मियाँले २०४८ सालयताका सबै चुनावमा भोट हाले । तर, उनको जीवनस्तर भने उस्तै छ । उनले भोट दिएका एमाले अध्यक्ष ओली दुईपटक देशको प्रधानमन्त्री भए । ओलीलाई मतदान गरेकाेमा उनलाई कुनै पछुतो त छैन । तर, आफू गरिबीको रेखामुनि जहिल्यै हुनुपरेको उनी गुनासो गर्छन् ।

‘एउटा गरिबलाई राम्रो रोजगारी र दुई छाक सुखसँग खान पाइयोस् भन्ने मात्र हुन्छ । तर, यहाँ त चुनावबाहेक अरु बेला त्यही गरिबलाई झन् गरिब बनाउने काम मात्र भइरहेको छ,’ उनले भने, ‘अहिलेका नेताहरूले केही गर्दैनन् । अब यिनीहरूलाई फेर्नुपर्छ । नयाँ पुस्ताले केही गर्छन् कि, उनीहरूलाई ल्याउनुपर्छ । नत्र मेरो नातिले पनि मेरैजस्तो जीवन जिउन बाध्य हुन्छ ।'

अहिले त बिरामी भयौँ भने हामीजस्ता गरिबले उपचार गर्न सक्ने अवस्था नभएको उनको भनाइ छ ।

राई र मियाँजस्तै दमक नगरपालिका– ८ मा पसल गर्दै आएकी सावित्रा विकको पनि अहिलेको नेतृत्व परिवर्तन नभएसम्म देशमा भनेजस्तो विकास नहुने बुझाइ छ । सबै कुराको अवधि हुन्छ । राजनीति गर्ने व्यक्ति जहिल्यै आफू मात्र उम्मेदवार बन्न खोज्ने गरेको उनको आरोप छ ।

‘अहिलेको ठूलो समस्या भनेको नै एउटै व्यक्ति उम्मेदवार बन्न खोज्नु हो । एउटै व्यक्तिले नेतृत्व गर्दा विकासजस्ता विषय ओझेलमा पर्ने गरेका छन्,’ उनले भनिन्, ‘अब राजनीति गर्ने व्यक्तिसमेत परिवर्तन गर्नुपर्छ । नत्र देशको हाल जहिल्यै यस्तै हुन्छ । सबै जनाले यो विषयमा सोच्नुपर्छ ।’

यस्तै, झापा सितापुरीका दीपेश चौधरी २५ वर्षदेखि हरेक निर्वाचनको माहौल हेर्दै रिक्सा चलाउँदै आएका छन् । उनले हरेक निर्वाचनमा देखेका नेतामध्ये एक जना हुन्, केपी ओली । ओलीलाई तीनपटक त भोटै हालेको उनले बताए ।

‘देशमा परिर्वतन आयो । मेरो जीवन भने उस्तै छ । हाम्रो समस्या पनि त्यस्तै छ । त्यही भएर पुरानो नेताले नयाँ सोच बनाएर काम गर्नै सकेनन्,’ उनले भने, ‘नयाँ सोचका साथ काम गर्ने नयाँ पुस्ता आए केही नसोची भोट दिन्छु । अब त बुढो हुन लागियो । हाम्रो सुरक्षाका लागि सोच्नेखालको उम्मेदवार खोज्दैछु ।’

राजनीतिक अस्थिरकाकै कारण आफूलाई मजदुरी गरेर छाक टार्नेको समस्या समाधान नभएको उनको भनाइ छ ।

चुनावी माहौल तात्दा सिंगो देशको ध्यान झापामा हुन्छ । झापाबाट उदाएका नेताहरू केन्द्रीय तहमा भएपछि चुनावताका सबैको नजर त्यतातिर जाने नै भयो । तर, झापाका जनताको हाल भने उस्तै भएको दमकका मजदुर बताउँछन् ।

उनीहरूजस्तै धेरै दमक नगरपालिकावासीहरूले शिलापत्रसँगको जिज्ञासामा अहिलेको राजनीतिक नेतृत्व परिवर्तन हुनुपर्ने बताए । शिलापत्रले दमक नगरपालिकामा रिपोर्टिङका क्रममा २५ जनाभन्दा बढीसँग यही प्रश्न गरेको थियो । शिलापत्रले सोधेका मध्ये अधिकांशले नेतृत्व परिवर्तन आवश्यक रहेको धारणा राखेका थिए ।