डोटीमा भूकम्प, उद्धारमा सेना (तस्वीरहरू)

A+ A A-

भूकम्पले क्षति पुर्‍याएकाे डाेटीमा उद्धारका लागि नेपाली सेनाकाे टाेली खटिएकाे छ । सेनाकाे टाेलीले मानविय र भाैतिक क्षति पुगेकाे स्थानमा पुगेर उद्धारकाे काम गरिरहेकाे हाे । गए राति पटक पटक गएकाे भूकम्पका कारण घर भत्किँदा पूर्वीचौकी गाउँपालिका–३ को ठाडा गाउँका ६ जनाको मृत्यु भएको छ ।

मृत्यु हुनेमा ठाडा गाउँकी ३८ वर्षीया भगवती बोहरा, उनकी १३ वर्षीया छोरी सीता र सात वर्षीय छोरा हर्क रहेकाे जिल्ला प्रहरी कार्यालय डोटीका निमित्त प्रमुख प्रहरी नायब उपरीक्षक भोलाप्रसाद भट्टले जानकारी दिए । यस्तै ४५ वर्षीय प्रेम बोहरा, उनकी १२ वर्षीया छोरी तुलसी र राति बोहराकै घरमा सुतेकी स्थानीय महाविर बोहराकी १७ वर्षीया छोरी धनसरीको पनि मृत्यु भएको छ ।

भूकम्पले घर भत्काउँदा सोही वडाका ४५ वर्षीय महाविर बोहरा, ४० वर्षीय इन्नरी बोहरा, ४५ वर्षीया विष्णादेवी बोहरा, ४६ वर्षीय चनादेवी बोहरा र ११ वर्षीया धौली बोहरा घाइते भएका र उनीहरूको स्थानीय स्वास्थ्य चौकीमा उपचार भइरहेको प्रहरी नायब उपरीक्षक भट्टले जानकारी दिए ।

भूकम्पमा परेकाको उद्धारमा अहिले नेपाली सेनासहित नेपाल प्रहरी, जनप्रतिनिधि र स्थानीय बासिन्दाहरू खटिएका छन् । घरका भग्नावशेष पन्छाउने र प्रभावितहरूको व्यवस्थापन गर्ने काममा नेपाली सेनाको भैरवनाथ गण डोटीकाे टाेली खटिएकाे छ ।

गए राति ९ बजेर ७ मिनेटमा खप्तड राष्ट्रिय निकुञ्ज केन्द्रबिन्दु बनाएर ५ दशमलव ७ र २ बजेर १२ मिनेटमा खप्तड राष्ट्रिय निकुञ्ज नै केन्द्रबिन्दु बनाएर ६ दशमलव ६ रेक्टरस्केलकाे भूकम्प गएको थियो ।

भूकम्पका कारण डोटी, बझाङ तथा बैतडीमा समेत केही घर चर्किएका छन् । सुदूरपश्चिममा भूकम्पको खतरा कायमै रहेको भूकम्प मापन केन्द्रले जनाएको छ । भूकम्पछि पराकम्पनहरू आउने भएकाले सबैलाई सतर्क रहन केन्द्रले आग्रह गरेको छ ।

प्रकाशित मिति: बुधबार, कात्तिक २३, २०७९ ०९:१६